އާޓިފިޝަލް އިންޓެލިޖެންސް (އޭއައި) ދުނިޔޭގައި އެންމެ މަޝްހޫރު އެއް ޗެޓްބޮޓް ކަމަށްވާ ޗެޓްޖީޕީޓީގެ ވޮއިސް މޯޑަށް ބޮޑެތި ކުރިއެރުންތަކެއް ގެނައުމަށް އޯޕެންއޭއައިން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ. މި މައުލޫމާތުތައް ހާމަވެފައިވަނީ ޓެކްނޮލޮޖީއާ ބެހޭ ވެބްސައިޓެއް ކަމަށްވާ އެންޑްރޮއިޑް އޮތޯރިޓީއިން ޗެޓްޖީޕީޓީގެ އެންޑްރޮއިޑް އެޕްލިކޭޝަންގެ އަދި ރިލީޒް ނުކުރާ ވާޝަން (1.2025.294) ގެ އޭޕީކޭ ޓިއާޑައުން ހަދައިގެންނެވެ. އޭޕީކޭ ޓިއާޑައުން ހެދުމަކީ އެންޑްރޮއިޑް އެޕްލިކޭޝަން ޕެކޭޖް (އޭޕީކޭ) ފައިލްތައް ތަހުލީލުކުރުމަށް ބޭނުންކުރާ ޓެކްނިކެކެވެ. މި ބަދަލުތަކާއެކު، ވޮއިސް ޗެޓް ކުރާ ވަގުތު ވެސް ލިންކްތަކާއި މެޕްތައް ފަދަ މުހިންމު މައުލޫމާތުތައް ޗެޓްގެ ތެރެއިން ފެންނާނެއެވެ. މިހާރުގެ ވޮއިސް މޯޑުގައި، ފުޅާ ސްކްރީނެއްގައި އެކަނި ޗެޓް ފެންނައިރު، މިފަދަ މުހިންމު މައުލޫމާތުތައް ނުފެނެއެވެ. އާ ބަދަލާ އެކު، ވޮއިސް ޗެޓް ކުރިއަށްދާނީ މުޅި ސްކްރީންގައި އެ ކަމަށް ޚާއްސަ އިންޓަފޭސްއެއް ފެންނަ ގޮތަށް ނޫން ކަމަށް ވެއެވެ. އޭގެ ބަދަލުގައި، ވޮއިސް ޗެޓް ކުރިއަށްދާނީ މައި ޗެޓް ސްކްރީންގެ ތެރެއިންނެވެ. އަދި، ވޮއިސް ޗެޓް ނިންމާލުމަށް ބޭނުންވާ "އެންޑް ކޮންވާސޭޝަން" ބަޓަނަކާއި، މައިކްރޯފޯން "މިއުޓް/އަންމިއުޓް" ކުރުމުގެ ބަޓަންތަކެއް ވެސް އާ އިންޓަފޭސްގައި ހިމެނޭނެއެވެ. އޯޕެންއޭއައިން ދަނީ ފަހަކަށް އައިސް ޗެޓްޖީޕީޓީއަށް ގިނަ އަދަދެއްގެ ބަދަލުތަކާއި އާ ފީޗާތައް ތައާރަފުކުރަމުންނެވެ. މިގޮތުން، އެ ކުންފުނިން ވަނީ މިދިޔަ ހަފުތާގައި އޭއައި-ޕަވަޑް ވެބް ބްރައުޒާއެއް ކަމަށްވާ ޗެޓްޖީޕީޓީ އެޓްލަސް ތައާރަފުކޮށްފައިވެއެވެ. ޗެޓްޖީޕީޓީން ތައާރަފުކުރާ މި އާ ވޮއިސް މޯޑު އާއްމުކޮށް ބޭނުންކުރަން ފެށޭނީ ކޮން ތާރީޚެއްގައި ކަމެއް އޯޕެންއޭއައިން ރަސްމީކޮށް ހާމަކޮށްފައެއް ނުވެއެވެ. ނަމަވެސް، އެންޑްރޮއިޑް އެޕްލިކޭޝަންގެ ކޯޑުތަކުން މިކަން ފެނުމަކީ، މިއީ ވަރަށް އަވަހަށް އާންމުންނަށް ލިބޭނެ ފީޗާއެއްކަން ދައްކުވައިދޭ ކަމެއް ކަމަށް ދިރާސާވެރިން ބުނެއެވެ. ޗެޓްޖީޕީޓީއަކީ 2022 ވަނަ އަހަރު އޯޕެންއޭއައިން ތައާރަފުކުރި އާޓިފިޝަލް އިންޓެލިޖެންސް (އޭއައި) ޗެޓްބޮޓެކެވެ. މިއީ މުޅި ދުނިޔޭގައި ވެސް އެންމެ މަޝްހޫރު އެއް އޭއައި ޕްލެޓްފޯމު ކަމަށްވާއިރު، މީގެ ވޮއިސް މޯޑަކީ ޔޫޒަރުންނަށް ލިޔުމުގެ ބަދަލުގައި އަޑުން ވާހަކަދައްކައިގެން ޗެޓްބޮޓާ މުއާމަލާތްކުރުމުގެ ފުރުސަތު ލިބޭ ފީޗާއެކެވެ. އޯޕެންއޭއައިން ދަނީ ފަހަކަށް އައިސް ޗެޓްޖީޕީޓީއަށް ގިނަ އަދަދެއްގެ ބަދަލުތަކާއި އާ ފީޗާތައް ތައާރަފުކުރަމުންނެވެ. މިގޮތުން، މިފަދަ ބޮޑެތި ބަދަލުތައް ގެނައުމުގެ މަގްސަދަކީ ޗެޓްޖީޕީޓީގެ ބޭނުންކުރުން އިތުރަށް ފަސޭހަކޮށް، ޔޫޒަރުންނަށް ލިބޭ ތަޖުރިބާ މުއްސަނދިކުރުން ކަމަށް ބެލެވެއެވެ.