ބްރޯޑްކާސްޓިން ކޮމިޝަން (ބްރޯޑްކޮމް)ގެ ރައީސް ކަމަށް އެ ކޮމިޝަންގެ މެންބަރު ސަފާ ޝަފީގް އިންތިހާބުކޮށްފި އެވެ.
ވީ ކިހިނެއް؟ - އެ ކޮމިޝަންގެ ރައީސްކަމުގެ މަގާމުގައި ހުންނެވި މަރިޔަމް ވަހީދާގެ ދައުރު މިދިޔަ ޑިސެމްބަރު މަހު ވަނީ ހަމަވެފަ އެވެ. 
ތަފްސީލް - ބްރޯޑްކޮމް އަށް ރައީސެއް އައްޔަންކުރީ މިއަދު ބޯޑު މެންބަރުންގެ މެދުގައި ބޭއްވި އިންތިހާބެއްގަ އެވެ. ސަފާގެ އިތުރުން އެހެން އެއްވެސް މެންބަރަކު އެމަގާމަށް ކުރިމަތިލާފައެއް ނުވެ އެވެ. އަދި އޭނާ އިންތިހާބުވީ ކޮމިޝަންގެ މެންބަރުންގެ އިއްތިފާގުންނެވެ.
ސަފާގެ ކުރު ތައާރަފެއް:
ބްރޯޑްކޮމްގެ މެންބަރުކަމަށް ސަފާ އައްޔަންކުރީ 9 މެއި 2023ގައި
ގައުމީ ޔުނިވާސިޓީން ސޯޝަލް ޕޮލިސީގެ ދާއިރާ އިން މާސްޓާސް ޑިގްރީ ހާސިލްކުރައްވާފައިވޭ
މެލޭޝިއާގެ ލިމްކޮކްވިންގް ޔުނިވާސިޓީން މާސްޓާސް އޮފް ކޮމިޔުނިކޭޝަންސް ހާސިލްކުރައްވާފައިވޭ
2006 ވަނަ އަހަރުން ފެށިގެން ޓީވީއެމްގައި ޕްރެޒެންޓަރެއްގެ ގޮތުގައި މަސައްކަތްކުރައްވާފައިވޭ
ގުޅުންހުރި - މަރިޔަމް ވަހީދާގެ އިތުރުން މެންބަރު އަލީ ޔޫސުފްގެ ދައުރު މިދިޔަ 5 ޑިސެމްބަރަށް ހަމަވެފައިވާތީ އެ ކޮމިޝަނަށް ދެ މެންބަރަކު މިހާރުވަނީ އައްޔަންކޮށްފަ އެވެ.
އެއީ މުހައްމަދު އަބްދުﷲ (މުހައްމާ) އާއި އައިމިނަތު ސަރާހަތު އިއްޒަތު އެވެ. މިދިޔަ ބުރާސްފަތި ދުވަހު ދައުުރުން ބޭރުން ބޭއްވި ރައްޔިތުންގެ މަޖިލީހުގެ ޖަލްސާގައި އެ ދެ ބޭފުޅުންނަށް މަޖިލީހުން ރުހުން ދިނުމާ އެކު އިއްޔެ ވަނީ ދެ ބޭފުޅުން މަގާމަށް އައްޔަންކޮށްފަ އެވެ.
އެނގުން މުހިންމު - އެ ކޮމިޝަންގައި މިހާރު ތިއްބެވި މެންބަރުންނަކީ:
ނައިބު ރައީސް މުހައްމަދު ފަޒީން
މެންބަރު އާމިނަތު އަމީނާ
މެންބަރު ޝިފްލާ އިބްރާހިމް
މެންބަރު ސަފާ ޝަފީގް
މެންބަރު އާމިނަތު ނުޒުހާ