އެއްވެސް ޝައްކެއް ނެތެވެ. އެންމެ ހިތްދަތިގޮތުގައި ދުނިޔެ ދޫކުރަންޖެހޭ ބައަކީ މަލާއިކަތުން އެމީހާގެ ފުރާނަ ހަށިގަނޑުން ނެރުއްވަވާއިރު އެފުރާނައަށްހުރީ ނަރަކައިގެ ގަދަފަދަ ޢަޛާބު ކަމުގެ އިންޒާރު ދެއްވަމުން ފުރާނަ ނެރުއްވަވާނެ މީހުންނެވެ. ދައްކަން މިއުޅެނީ ގިނަބައަކަށް އެހިތްދަތިކަން ލިބޭ ސަބަބުގެ ވާހަކައެވެ.
﴿97﴾ إِنَّ الَّذِينَ تَوَفَّاهُمُ الْمَلَائِكَةُ ظَالِمِي أَنفُسِهِمْ قَالُوا فِيمَ كُنتُمْ ۖ قَالُوا كُنَّا مُسْتَضْعَفِينَ فِي الْأَرْضِ ۚ قَالُوا أَلَمْ تَكُنْ أَرْضُ اللَّهِ وَاسِعَةً فَتُهَاجِرُوا فِيهَا ۚ فَأُولَٰئِكَ مَأْوَاهُمْ جَهَنَّمُ ۖ وَسَاءَتْ مَصِيرًا
"ހަމަކަށަވަރުން އެއުރެންގެ ނަފްސުތަކަށް އަނިޔާވެރިވެގެން ތިބޭ ޙާލުގައި، މަލާއިކަތުން، އެއުރެންގެ މަރު ހިއްޕަވާ މީހުންނަށް ވިދާޅުވާނެތެވެ. ތިޔަބައިމީހުން އުޅުނީ ކޮންގޮތެއްގައިހޭ؟ އެއުރެން ދަންނަވާނެތެވެ. ތިމަންމެންވީ، ބިމުގައި ނިކަމެތިކަން ލިބިގެންވީ ބަޔަކު ކަމުގައެވެ. އެބޭކަލުން ވިދާޅުވާނެތެވެ. ތިޔަބައިމީހުން، އެ ބިމުގައި ހިޖުރަ ކުރުމަށް ﷲގެ ބިން ތަނަވަސްވެގެންނުވޭހޭ؟ ފަހެ (ޤިޔާމަތް ދުވަހުން) އެއުރެން ތިބެނިވި ތަނަކީ ނަރަކަޔެވެ. އެއީ، ނުބައިވެގެންވާ ނިމިދިޔުމެކެވެ." (އައްނިސާ: 97)
ކޮންމެ މުސްލިމަކުވެސް ސުވަރުގެ ލިބުމަށް އެދޭނެއެވެ. އެދެން އޮތީވެސް ސުވަރުގޭގެ އެންމެ މަތީ ދަރަޖަ ލިބުމަށެވެ. އެހެންކަމާއިއެކުގައިވެސް ސުވަރުގޭގެ އެންމެ މަތީ ދަރަޖަ، ޖަންނަތުލްފިރުދައުސް ހޯދަން މަސައްކަތްކުރުން ފަސްކުރާ މީހަކަށް ގާތީ ނުލިބުމެވެ. އެހެން މިބުނަނީ ފަހުން އަޅުކަންކުރަން ފަށަން މަޑުކުރާ މީހުންނަށް ނުފެށި އުޅެނިކޮށް މަރާއި ބައްދަލުކުރަންޖެހޭކަން ފެންނަމުންދާވަރު ގިނަކަމުންނެވެ!
އާމްދަނީ ލިބެން ފެށުމާއިއެކު އެންމެންނަށްވެސް ސަމާލުކަން ދެވެނީ ދުނިޔޭގެ ދިރިއުޅުމަށެވެ. ރަނގަޅު ސަރަހައްދަކުން ރަނގަޅު ގެއަކަށާއި އުފާވެރިކަމާއިއެކު ޙަޔާތުގެ ދުވަސްތައް ހޭދަކުރެވޭނެ ތަނަވަސްކަމަށެވެ. ޢުމުރުން ދުވަސްވުމުން ވެސް އުފަލުގައި ދިރިއުޅެވޭނެ ވަރަށް ފައިސާ ޖަމާކުރުމަށެވެ.
ހިތާމައަކީ މަދު މީހަކު ނޫނީ ޖަންނަތުލްފިރްދައުސް ލިބިގަންނަން މަސައްކަތްނުފަށާކަމެވެ. ފަރުޟު 5 ނަމާދަށް ދޭންޖެހޭ ސަމާލުކަން ނުދެވޭކަމެވެ. ސުންނަތް އަޅުކަން ކުރަން ހަނދާންވެސް ނުކުރެވޭ ކަމެވެ. އެކަންކަން ކުރުން ފަހަށް ބާއްވައިލެވޭ ކަމެވެ.
މިއީ އެންމެ ދެރަ ކަންތަކެވެ. ދުނިޔޭގެ ދިރިއުޅުން ކުރިއެރުން ހޯދަންކުރާ މަސައްކަތަށްވުރެ އަޅުކަމަށްދޭ ސަމާލުކަން އިތުރުނުކޮށް ސުވަރުގެ ނުލިބޭނެކަން ޤަބޫލުކުރަންޖެހޭނެއެވެ. އެކަމަށް މަސައްކަތްފަށަންވީ ޢުމުރުން ދުވަސްވުމަކުން ނޫނެވެ. އެންމެ ޒުވާން އުމުރުގައެވެ.
ފަރުޟު ނަމާދުތަކަށް ، ވަކިން ޚާއްޞަކޮށް ފަތިސް ނަމާދަށް ސަމާލުކަން ނުދީ ދުނިޔޭގެ ދިރިއުޅުންވެސް ކާމިޔާބުކުރެވޭނީ ކިހިނަކުން ހެއްޔެވެ؟ ވީމާ ފައިސާ ހޯދަން ކުރާ މަސައްކަތުގެ ފުރަތަމަ ބައަކީ ﷲ ތަޢާލާ އަންގަވާފައިވާ އަޅުކަންކުރުން ކަމުގައި ހަދާށެވެ!
ޔަޤީންކުރަންވީ ކަމަކީ ނަމާދުތައް ފުރިހަމައަށް އަދާކުރަމުން ގެންދާ މީހާގެ ކުރިއެރުން ނުހުއްޓުވޭނެ ކަމެވެ. އެމީހާއަށް ރަޙްމަތުގެ ދޮރުކޮޅުތައް ހުޅުއްވަވައި ދެއްވަވާނެކަމެވެ. ރަޙްމަތުގެ ދޮރުކޮޅުތައް އެމީހަކަށްޓަކައި ﷲ ތަޢާލާ ހުޅުއްވަވައި ދެއްވެވުމުން ބަންދުކުރެވޭނެ ހަމައެކަކުވެސް ނުހުންނާނެކަމެވެ!
އަދި ކީއްހެޔެވެ؟ ދުނިޔެއިން ތިއަ އެދޭ ކަންކަން ޙާޞިލުވުން އޮތީވެސް އެއިރުންކަން ޔަޤީންކޮށްގެން ކުރިއަށްދާން މަސައްކަތްކުރާ މީހާއަށް ދެދުނިޔެވެސް ދެއްވަވާނެތެވެ! އިން ޝާ ﷲ
--މުފްތީ މެންކުގެ ދަރުސަކުން