ގިރާވަރުފަޅުގެ ލޭންޑް ޔޫސް ޕްލޭނަށް ގެނެސްފައިވާ ބަދަލާ އެކު 'ބިންވެރިޔާ' ސްކީމުގެ ދަށުން ގިރާވަރުފަޅުން ގޯތި ލިބިފައިވާ މީހުންގެ ބިމުގެ ސަރަހައްދުތައް ކަނޑައެޅުމަށް ގުރުއަތުލުން ކުރިއަށް ގެންދަން ނިންމައިފި އެވެ.
ވީ ކިހިނެއް؟ - ހައުސިން މިނިސްޓްރީން މިރޭ ކުރި އިއުލާނެއްގައި ބުނީ ގިރާވަރުފަޅުން ގޯތި ލިބުނު މީހުންގެ ލޮޓު ނަންބަރުގެ ގުރުއަތު ނެގުން އޮންނާނީ އަންނަ ހޮނިހިރު ދުވަހު ހެނދުނު 9:30ގައި ސޯޝަލް ސެންޓަރުގައި ކަމަށެވެ.
ތަފްސީލް - އެ މިނިސްޓްރީން ބުނީ މީގެ ކުރިން އާންމުކޮށްފައިވާ ގިރާވަރުފަޅުގެ ލޭންޑު ޔޫސް ޕްލޭނުގައި އެ ސަރަހައްދުން ދޫކުރަން ހަމަޖެހިފައިވާ 610 ގޯތި މަދުވާ ކަމަށެވެ.
އެ އަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4،072 ގޯއްޗާ އެކު އާ ލޭންޑް ޔޫސް ޕްލޭން މިހާރު އެކުލަވާލައި އާންމުކޮށްފައިވާ ކަމަށް އެ މިނިސްޓްރީން ބުންޏެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިން:
1،250 އަކަފޫޓުގެ 2603 ގޯތި
1،650 އަކަފޫޓުގެ 1214 ގޯތި
2،050 އަކަފޫޓުގެ 254 ގޯތި
2،450 އަކަފޫޓުގެ 1 ގޯތި
ހައުސިން މިނިސްޓްރީން ބުނީ:
ގޯތިތަކުގެ ގުރު ނަގާނީ މިނިސްޓްރީގެ މުވައްޒަފުން
ގިރާވަރުފަޅުން ބިން ލިބޭ މީހުންގެ ތެރެއިން ގުރުއަތު ނަގާ ސަރަހައްދަށް ގޯތި ލިބިފައިވާ ފަރާތްތަކުގެ ތެރެއިން ކޮންމެ ގޯއްޗަކަށް އެކަކަށް ވަދެވޭނެ
ގުރުއަތު ނެގުން ކުރިއަށްދާއިރު ގޯތި ލިބިފައިވާ މީހުންނަށް ހަމަޖެހޭ ބިން ހިޔާވެހި ޕޯޓަލުން ވަގުތުން ފެންނާނެ
އެސްއެމްއެސްގެ ޒަރިއްޔާ އިން ވެސް އަންގާނެ
ހައުސިން މިނިސްޓްރީން ބުނީ ގޯތި ލިބޭ މީހުންގެ ގުރުނަގާ ނިމުމުން، ގޯތި ހަވާލުކުރުމުގެ އެއްބަސްވުމުގައި ސޮއިކުރުމާއި ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރިއަށްގެންދާނެ ގޮތުގެ މައުލޫމާތު ފަހުން އަންގާނެ ކަމަށެވެ.