ގްރީންލޭންޑަށް އޮތް ނުރައްކަލަކީ މުޅި ވިލާތަށް ދެވުނު އިންޒާރެއްކަމުގައި ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެއެވެ. ފަރަންސޭސި ރައީސް އިމަނުއަލް މެކްރޮން ވިދާޅުވީ، އެމެރިކާއިން ގްރީންލޭންޑާ މެދު ގެންގުޅޭ ސިޔާސަތުތަކާއި އިންޒާރުތަކަކީ މުޅި ވިލާތުގެ ގައުމުތައް ހޭލަންޖެހޭ "ސްޓްރެޓީޖިކް" އިންޒާރެއް ކަމަށެވެ. ބުދަ ދުވަހު ޕެރިހުގެ އެލިޒޭ ޕެލަސްގައި ޑެންމާކުގެ ބޮޑުވަޒީރު މެޓޭ ފްރެޑްރިކްސަންއާއި ގްރީންލޭންޑުގެ ބޮޑުވަޒީރު ޖެންސް-ފްރެޑްރިކް ނީލްސަންއާއެކު ބޭއްވި ބައްދަލުވުމެއްގައި މެކްރޮން ވިދާޅުވީ، ވިލާތުގެ ގައުމުތަކުން މިހާރަށްވުރެ ބޮޑަށް އަމިއްލަ ބާރުވެރިކަން އިތުރުކުރަން ޖެހޭ ކަމަށެވެ. https://sun.mv/217113 މި ބައްދަލުވުން ބާއްވާފައި ވަނީ އެމެރިކާގެ ރައީސް ޑޮނަލްޑް ޓްރަމްޕް ގްރީންލޭންޑް ހިފާނެ ކަމުގެ އިންޒާރު ދެއްވުމާ ގުޅިގެން، ވިލާތުގެ ގައުމުތަކުގެ މެދުގައި އޮތް ގުޅުން ވަރުގަދަކޮށް، އެމެރިކާއާ ނުލައި ވެސް އަމިއްލަ ފައިމައްޗަށް ތެދުވުމަށް ކުރާ މަސައްކަތްތަކުގެ ތެރެއިންނެވެ. މެކްރޮން ފާހަގަކުރެއްވި ގޮތުގައި، ވިލާތުން މިހާރު އެންމެ ބޮޑު ސަމާލުކަމެއް ދޭންޖެހޭނީ އާކްޓިކް ސަރަހައްދުގެ ސަލާމަތާއި، ބޭރުގެ ނުފޫޒުތަކާއި ދޮގު މައުލޫމާތު ފެތުރުމާ ދެކޮޅަށް ކުރާ މަސައްކަތްތަކަށެވެ. އަދި ގްރީންލޭންޑްގެ މިނިވަންކަމާއި ސަރަހައްދީ ރައްކާތެރިކަން ދެމެހެއްޓުމަށް ފަރަންސޭސިވިލާތުން ފުރިހަމައަށް ތާއީދުކުރާނެ ކަމުގެ ޔަގީންކަން އޭނާ ދެއްވިއެވެ. މި ބައްދަލުވުމުގައި ވާހަކަދައްކަވަމުން ޑެންމާކުގެ ބޮޑުވަޒީރު ފްރެޑްރިކްސަން ވިދާޅުވީ، ދިފާއީ ކަންކަމުގައި އެމެރިކާއަށް ބަރޯސާވާ މިންވަރު ކުޑަކޮށް، ވިލާތުގެ އަސްކަރީ ބާރު މިހާރުން މިހާރަށް ވަރުގަދަކުރަން ޖެހޭ ކަމަށެވެ. "އަޅުގަނޑުމެން އަސްކަރީ ގޮތުން ވަރުގަދަވުމަށް 2035 ވަނަ އަހަރަށް ކަނޑައަޅާފައިވާ އަމާޒަކީ މާ ލަސް ތާރީޚެއް. އެކަން މިހާރު ކުރަން އެބަޖެހޭ،" އޭނާ ވިދާޅުވިއެވެ. މީގެ އިތުރުން، މީގެ ކުރިން ވިލާތުގެ ގައުމުތަކުން އަސްކަރީ ބަޖެޓު ކުޑަކުރުމަކީ ހެދުނު ބޮޑު ގޯހެއް ކަމަށް ވެސް ޑެންމާކުގެ ބޮޑުވަޒީރު ފާހަގަކުރެއްވިއެވެ. މި ބައްދަލުވުމުގައި މެކްރޮން ވަނީ ގްރީންލޭންޑުގެ އަމިއްލަ ބަހުންނާއި ޑެންމާކު ބަހުން ވާހަކަދައްކަވައި، އެ ގައުމުތަކާއެކު އޮތް ގާތް ގުޅުން ހާމަކުރައްވާފައެވެ. އެމެރިކާގެ ރައީސް ޑޮނަލްޑް ޓްރަމްޕް، ދުނިޔޭގެ އެންމެ ބޮޑު ރަށް ކަމަށްވާ ގްރީންލޭންޑް ގަތުމުގެ ޝައުގުވެރިކަން ފުރަތަމަ ފާޅުކުރެއްވީ 2019 ވަނަ އަހަރު އޭނާގެ ފުރަތަމަ ރިޔާސީ ދައުރުގައެވެ. ނަމަވެސް، ޑެންމާކް ސަރުކާރުން އެކަމަށް އިންކާރުކޮށް، ގްރީންލޭންޑަކީ "ވިއްކަން އޮތް ތަނެއް ނޫން" ކަމަށް ބުނުމުން، އޭރުވެސް ދެ ގައުމުގެ ދެމެދުގައި ބޮޑު ސިޔާސީ ނުތަނަވަސްކަމެއް އުފެދުނެވެ. ގްރީންލޭންޑަކީ ޑެންމާކުގެ ބާރުގެ ދަށުގައި އޮންނަ އަމިއްލަ އިދާރީ ހިންގުމެއް އޮންނަ ސަރަހައްދެކެވެ. އާކްޓިކް ސަރަހައްދުގައި އޮންނަ މި ރަށަކީ ގުދުރަތީ ގޭހާއި، ތެލާއި، އަދި ނާދިރު މައުދަންތަކުން މުއްސަނދި ތަނެކެވެ. މީގެ އިތުރުން، ރަޝިޔާއާއި ޗައިނާއިން އާކްޓިކް ސަރަހައްދުގައި ބާރުގަދަކުރަމުންދާ ދަނޑިވަޅެއްގައި، ގްރީންލޭންޑަކީ އަސްކަރީ ގޮތުންނާއި ޖިއޯ-ޕޮލިޓިކަލް ގޮތުން އެމެރިކާއަށް ނުހަނު މުހިންމު ސަރަހައްދެކެވެ. މިފަހަރުގެ ނުތަނަވަސްކަން ބޮޑުވެފައިވަނީ، ގްރީންލޭންޑް ހޯދުމަށް ޓްރަމްޕް ގެންގުޅުއްވާ ބަސްމަގު ހަރުކަށިވެ، ބާރުގެ ބޭނުންކޮށްގެން ނަމަވެސް އެތަން ހިފާނެ ކަމުގެ އިންޒާރު ދެއްވުމާ ގުޅިގެންނެވެ. މިއީ ދެވަނަ ބޮޑު ހަނގުރާމައަށްފަހު ވިލާތުގެ ގައުމުތަކުގެ ސަލާމަތާއި ރައްކާތެރިކަމަށް އެމެރިކާގެ ފަރާތުން ކުރިމަތިވި އެންމެ ބޮޑު ގޮންޖެހުން ކަމަށް ވިލާތުގެ އިސްވެރިން ދެކެވަޑައިގަންނަވައެވެ. މީގެ ސަބަބުން، ދިފާއީ ކަންކަމުގައި އެމެރިކާއަށް ބަރޯސާވުމުގެ ބަދަލުގައި، ވިލާތުގެ ގައުމުތަކުން އަމިއްލަ އަސްކަރީ ބާރުވެރިކަން އިތުރުކުރުމުގެ ބަހުސް ވަނީ ވަރުގަދަވެފައެވެ.