މާލޭގެ މޭޔަރުކަމަށް ހޮވިވަޑައިގެންފިނަމަ، ސިޓީ ކައުންސިލުގެ ތެރޭގައި ހިނގާފައި ހުރި ހުރިހާ ގޯހެއް، އެ ގޯސްތައް ހިނގި މީހުންގެ ނަމާއެކު، އާންމުންނަށް ޑޭޓާބޭހެއް ފެންނަ ގޮތް ހައްދަވާނަން ކަމަށް، މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ފަރާތުން މާލޭގެ މޭޔަރުކަމަށް ވާދަކުރައްވާ އަލްއުސްތާޛު ޢަބްދުالله މަހްޒޫމް މާޖިދު މިރޭ ވިދާޅުވެއްޖެއެވެ. 'އެސްއެސްޓީވީ'ގެ "ބާރު ހަތަރެއް" ޕްރޮގްރާމްގައި ވާހަކަ ދައްކަވަމުން މަހްޒޫމް ވިދާޅުވީ، ކޮންމެ ބަޔަކުވެސް ކުރާ އެއް ކަމަކީ އެއް ބަޔަކު އަނެއް ބައެއްގެ ބޮލުގައި ބަދުނާމު އެޅުވުން ކަމަށާއި، "ކުރީ ސަރުކާރު"، މި ލަފުޒު ތަކުރާރުކުރުން ކަމަށެވެ. ހަމަ އެގޮތަށް މި ސަރުކާރުގެ އަމަލުތައް ވެސް ހުރީ ހަމަ ކުރީ ސަރުކާރުތަކުން ކުރި ވައްކަންތައް ރަނގަޅުކުރާ އުސޫލުން ކަމަށް މަހްޒޫމް ތުހުމަތުކުރެއްވިއެވެ. އޭނާ ވިދާޅުވި ގޮތުގައި މާލޭގެ މޭޔަރު ކަމަށް އިންތިޚާބުކޮށްދެއްވައިފިނަމަ އެކަން ބަދަލުކުރައްވާނީ ދެފުށް ފެންނަ، އަދި ނަޒާހާތްތެރިކަމުގެ ސިޔާސަތުގެ ތެރެއިންނެވެ. އެގޮތުން ސިޓީ ކައުންސިލުގައި ގޯސް ކަމެއް މީހަކު ކޮށްފިނަމަ ޖެހިލުމެއްނެތި ފިޔަވަޅު އަޅުއްވާނެ ކަމަށް މަހްޒޫމް ވިދާޅުވިއެވެ. "ޓްރާންސްޕޭރަންސީއޭ މި ބުނާ ވާހަކައަކީ [މާލޭގެ މޭޔަރުކަމުގެ] މަގާމު އަޅުގަނޑަށް ދީފިކަމުގައިވާނަމަ، މަގާމަށް އަންނަ ފުރަތަމަ ދުވަހުން ފެށިގެން މާލެ ސިޓީ ކައުންސިލުގެ ތެރޭ ހިނގައިފަ ހުރި ހުރިއްޔާ ގޯސްކަމެއް ފާޅުކުރާނަން. ކޮށްފަ އެއީ ކޮން ބައެއްކަން ފަސޭހައިން ފެންނާނެ ޑޭޓާބޭސްއަކަށް ލާނަން. އަދި އަޅުގަނޑު މަގާމާ ހަވާލުވާ ދުވަހުން ފެށިގެން ކޮންމެ ދުވަހަކު ކުރަމުން އަންނަ ޚަރަދުތަކާއި މަހުން މަހަށް އަންނަން ޖެހޭ އަޕްޑޭޓުތައް [ރައްޔިތުންނަށް] އެކްސެސްވެވޭ ނިޒާމެއްގެ ތެރެއިން ފެންނަގޮތް ހަދާނަން،" މަހްޒޫމް ވިދާޅުވިއެވެ. މާލެ ސިޓީ ކައުންސިލުގެ މަސައްކަތް މިފަދައިން ބައްޓަންކުރުމުން، އޭނާއަށާއި ސިޓީ ކައުންސިލުގައި މަސައްކަތްކުރާ ކައުންސިލަރުންނާއި މުވައްޒަފުންނަށް، ވައްކަންކޮށް، އެކި ކަންކަމުގައި ބަދުނާމު އަޅުވަން އުނދަގޫވާނެ ކަމަށް މަހްޒޫމް ވިދާޅުވިއެވެ. ފާހަގަކޮށްލެވޭ ގޮތުގައި މާލޭގެ މޭޔަރުކަމަށް ވާދަކުރައްވާނެކަން މަހްޒޫމް ހާމަކުރެއްވީ މިދިޔަ ޑިސެންބަރު މަހުގެ ފަހުކޮޅެވެ. https://sun.mv/216736 މޭޔަރުކަމަށް ކުރިމަތިލެއްވިކަން ހާމަކުރައްވައި މަހްޒޫމް މީގެ ކުރިން ވިދާޅުވީ، މާލޭގައި މިއަދު ފެންނަ އެންމެ ބޮޑު އެއް މައްސަލައަކީ ވަސީލަތްތައް މަދުވުން ނޫން ކަމަށާއި، ނަމަވެސް ކޮރަޕްޝަންގެ ސަބަބުން ސިޓީގެ މެނޭޖުމަންޓު ބަލިކަށިވުމުގެ މައްސަލަ ކަމަށެވެ. އެގޮތުން ރައްޔިތުން ތަމްސީލުކުރުމުގެ ނިޒާމެއްގެ ގޮތުގައި އޮތް ރިޔާސީ ނިޒާމު ވޯޓު ގަނެ ވިއްކާ ބާޒާރަކަށް ބަދަލުވެފައިވާ ކަމަށް އޭނާ ސިފަކުރެއްވިއެވެ. މަހްޒޫމް ވިދާޅުވީ މިއަދު ހުރިހާ ކަމެއްވެސް ހިނގަނީ ކޮރަޕްޝަން އެކުލެވިގެން ކަމަށެވެ. އެގޮތުން މިއަދު ކަންކަން ހިންގުމަށް ހަވާލުކުރަނީ ސިޔާސީ ގޮތުން އަރިސް، ގުޅުން ހުރި ފަރާތްތަކާކަން އޭނާ ފާހަގަކުރެއްވިއެވެ. މަހްޒޫމް ވިދާޅުވީ، އެއްބަޔަކު އަނެއް ބައެއްގެ ބޮލުގައި ބަދުނާމު އެޅުވުމާއި، ކޮރަޕްޝަންގެ ސަބަބުން މާލެއަކީ އުޅެން އުނދަގޫ ސިޓީއަކަށް ވެފައިވާ ކަމަށެވެ. ނަމަވެސް އޭނާ މޭޔަރު ކަމަށް ވާދަކުރައްވަނީ އެކަންކަން ބަދަލުކޮށް، ވިޔަފާރިއާއި ދިރިއުޅުމުގެ ފެންވަރު ރަނގަޅުކޮށްދިނުމުގެ މަގުސަދުގައިކަމަށް ވިދާޅުވެ، އެ ހުނަރު ރައްޔިތުންގެ އެބަހުރިކަން އޭނާ ފާހަގަކުރެއްވިއެވެ.