މުމްބާއީ: ވީ.އެސް.އާރު ވެންޗާސް ޕްރައިވެޓް ލިމިޓެޑުން އޮޕަރޭޓްކުރާ 'ލިއަރޖެޓް 45' މަރުކާގެ މަތިންދާބޯޓެއް، ޕޫނޭ ޑިސްޓްރިކްޓްގެ ބާރާމަތީ އެއަރފީލްޑަށް ޖައްސަން އުޅުމުގެ ތެރޭގައި ބުދަ ދުވަހުގެ ހެނދުނު ވެއްޓިއްޖެއެވެ. މި ހާދިސާގައި ބޯޓުން ދަތުރުކުރި ފަސް މީހުންވެސް ވަނީ މަރުވެފައެވެ. މަރުވި މީހުންގެ ތެރޭގައި މަހަރާޝްތުރާގެ ޑެޕިއުޓީ ޗީފް މިނިސްޓަރު އަޖިތު ޕަވާރު ހިމެނިވަޑައިގަންނަވައެވެ.
ސިވިލް އެވިއޭޝަން މިނިސްޓްރީން މަޢުލޫމާތު ދޭ ގޮތުގައި، މި ބޯޓު ޖައްސަން މަސައްކަތްކުރީ މޫސުން ގޯސްވެ، ފެންނަ މިންވަރު (ވިޒިބިލިޓީ) ދަށްވެފައިވާ ދަނޑިވަޅެއްގައެވެ.
ފުރަތަމަ ފަހަރު ބޯޓު ޖައްސަން ކުރި މަސައްކަތް ކާމިޔާބު ނުވުމުން، ދެވަނަ ފަހަރަށް ބޯޓު ތިރިކުރަން އުޅުމުގެ ތެރޭގައި ރަންވޭ ފެންނަ ކަމަށް ކްރޫއިން ރިޕޯޓްކުރުމުން ހެނދުނު 8:43 ގައި ވަނީ ބޯޓު ޖެއްސުމުގެ ހުއްދަ ދީފައެވެ. ނަމަވެސް، ޕައިލެޓުގެ ފަރާތުން އެ ހުއްދައަށް އެއްވެސް ޖަވާބެއް ނުލިބި، އޭގެ ކުޑަވަގުތުކޮޅެއް ފަހުން، 8:44 ހާއިރު ރަންވޭ 11 ގެ ފެށޭ ސަރަޙައްދު ކައިރިން ބޯޓުގައި އަލިފާން ރޯވެފައިވާ މަންޒަރު ވަނީ ފެނިފައެވެ.
ހާދިސާ ހިނގި ސަރަޙައްދަށް އިމަޖެންސީ ޚިދުމަތްތެރިން ވަގުތުން ދިޔަ ނަމަވެސް، ބޯޓުން ދަތުރުކުރި އެއްވެސް މީހަކު ސަލާމަތްވެފައެއް ނުވެއެވެ. އެއަރކްރާފްޓް އެކްސިޑެންޓް އިންވެސްޓިގޭޝަން ބިއުރޯ (އޭއޭއައިބީ) އިން މިހާރު ވަނީ މި ހާދިސާގެ ތަޙުޤީޤު ފަށާފައެވެ. އަދި އެ އިދާރާގެ އިސް އޮފިޝަލުން މިހާރު ދަނީ ބޯޓު ވެއްޓުނު ސަރަޙައްދަށް ޒިޔާރަތް ކުރަމުންނެވެ.
ކަމާބެހޭ އިދާރާތަކުން ބުނާ ގޮތުގައި، އެ ބޯޓަކީ އުދުހުމުގެ ހުއްދައާއި ރެޖިސްޓްރޭޝަން ސެޓުފިކެޓު ފުރިހަމައަށް އޮތް ބޯޓެކެވެ. އަދި އެންމެ ފަހުން 2025 ވަނަ އަހަރުގެ ފެބުރުވަރީ މަހު ކުރި ރެގިއުލޭޓަރީ އޮޑިޓުންވެސް، ސަލާމަތީ ގޮތުން ފާހަގަކުރެވޭ ފަދަ އެއްވެސް މައްސަލައެއް ފެނިފައެއް ނުވެއެވެ.