އެޕަލްގެ އަހަރީ ޑަބްލިއުޑަބްލިއުޑީސީ 2026 ކޮންފަރެންސްގައި އެންމެން ވެސް އެންމެ ބޮޑަށް އިންތިޒާރުކުރަމުންދިޔަ، އަދި އިންސާނުން ފަދައިން ގުދުރަތީ ރާގަކަށް ވާހަކަދައްކާ މުޅިން އައު ސިރީ އެޕަލްއިން ރަސްމީކޮށް އިއުލާންކޮށްފިއެވެ. އެޕަލްގެ ސިރީ އިންޖިނިއަރިންގެ ވީޕީ މައިކް ރޮކްވެލް ހާމަކުރެއްވި ގޮތުގައި، އާޓިފިޝަލް އިންޓެލިޖެންސްގެ އެންމެ ފަހުގެ ކުރިއެރުންތަކާއެކު ފަރުމާކޮށްފައިވާ މި އައު ސިރީއަކީ ކުރިއަށްވުރެ މާ ވިސްނުން ތޫނު، ގާބިލު އަދި އިންސާނުން އެކަކު އަނެކަކާ މުއާމަލާތްކުރާ ފަދަ ފުން ތާސީރެއް އެކުލެވޭ އެސިސްޓަންޓެކެވެ. މީގެ އިތުރުން ސިރީގެ އަޑުގެ ރާގާއި އިހުސާސްތައް ބަދަލުވާ ގޮތް ކުރިއަށްވުރެ މާ ފުރިހަމަވެފައި، ސިރީގެ އަޑަށް ކުދިކުދި ބަދަލުތައް (މައިކްރޯ އެޖެސްޓްމެންޓްސް) ގެނައުމުގެ ފުރުސަތުވެސް ޔޫޒަރުންނަށް ލިބިގެންދާނެއެވެ. މި ބޮޑު ބަދަލު ސިރީއަށް ގެނައުމަށްޓަކައި އެޕަލްއިން ވަނީ ސޮފްޓްވެއާގެ ދާއިރާއިން ގޫގުލްއާއެކު ވަރަށް ފުން ގުޅުމެއް ގާއިމުކޮށް، އެޕަލް އިންޓެލިޖެންސް ގެ އައު އާކިޓެކްޗަރ އެއް އެކުލަވާލާފައެވެ. ގޫގުލްގެ ޖެމިނައި މޮޑެލްތަކާއި އެޕަލްގެ އަމިއްލަ މޮޑެލްތައް ގުޅުވާލައިގެން އުފައްދާފައިވާ މި ނިޒާމުގެ އެހީގައި، ސިރީއަށް މިހާރު ޔޫޒަރުންގެ އަމިއްލަ ޑޭޓާ ބޭނުންކޮށްގެން، ފޯނުގެ ސްކްރީންގައި ހިނގާ ކަންކަން ދެނެގަތުމުގެ (އޮންސްކްރީން އެވެއާނެސް) ގާބިލުކަން ލިބިގެންވެއެވެ. މީގެ އިތުރުން ސިރީއަށް ޚާއްސަ އައު އެޕްލިކޭޝަނެއް ތައާރަފްކޮށްފައިވާއިރު، މީގެ ކުރިން ސިރީއާ ދެކެވިފައިވާ ވާހަކަތައް އަލުން ބަލައިލުމުގެ ފުރުސަތު ޔޫޒަރުންނަށް ލިބިގެންދާނެއެވެ. އަދި ކީބޯޑަށް އިތުރުކުރެވުނު އައު އަޕްޑޭޓާއެކު ވޮއިސް ޑިކްޓޭޝަންގެ ޚިދުމަތްވެސް ވަނީ ވަރަށް ބޮޑަށް ރަނގަޅުކޮށްފައެވެ. ސްޓޭޖުގައި ދައްކާލި އަމަލީ ޑެމޯއެއްގައި، އައު ސިރީއަށް ސްކްރީންގައި ހުންނަ ފޮޓޯތަކާއި މައުލޫމާތުތައް ސާފުކޮށް ދެނެގަނެވޭކަން ވަނީ ސާބިތުކޮށްދީފައެވެ. އެގޮތުން ފޮޓޯއެއްގައި ހުންނަ މަޝްހޫރު ބިނާއަކާ ބެހޭގޮތުން ސުވާލުކުރުމުން އެއީ ކޮން ތަނެއްކަން ބުނެދިނުމާއި، އާއިލީ ދަތުރެއްގެ ފޮޓޯތައް ހޯދައިދިނުމަށް އެދުމުން އެ ފޮޓޯތައް ވަގުތުން ދައްކާލުން ހިމެނެއެވެ. އަދި ވަކި ފޮޓޯއެއް ހޮވައި، އެ ފޮޓޯ އާއިލާގެ "ޝެއަރޑް އަލްބަމް" އަށް އިތުރުކޮށްދިނުމަށް ބުނުމުން ސިރީ ވަނީ އެކަން ވަރަށް ފުރިހަމައަށް ކޮށްދީފައެވެ. މީގެ އިތުރުން ސިރީއަށް މިހާރު ދުނިޔޭގެ އެންމެ ފަހުގެ މައުލޫމާތުތައް ހޯދައި، އެއާ ގުޅުވައިގެން ރިމައިންޑާ ސެޓްކޮށްދިނުމުގެ ގާބިލުކަން ލިބިގެންވެއެވެ. ޑެމޯގައި މައިކް ރޮކްވެލް ވަނީ ކުރިއަށް އޮތް މިއުޒިކް ކޮންސެޓެއްގެ ޓިކެޓާ ބެހޭގޮތުން ސިރީއާ ސުވާލުކޮށްފައެވެ. ސިރީ އެ ކޮންސެޓްގެ ޓިކެޓް ލިބެނީ ގުރުއަތަކުން (ލޮޓަރީ) ކަން ބުނެދިނުމުން، "އެ ގުރުއަތުލުން ފެށުމުން ބައިވެރިވާން އަހަންނަށް ހަނދާންކޮށްދީ" އޭ ބުނުމާއެކު ސިރީ ވަނީ ސީދާ އެ ވަގުތަށް ރިމައިންޑަރެއް ހަދާފައެވެ. އައު ސިރީގެ އެހީތެރިކަން ލިބެނީ ހަމައެކަނި އައިފޯނަށް އެކަނި ނޫންކަމަށްވާއިރު، އެޕަލްގެ ހުރިހާ ޕްލެޓްފޯމްތަކެއް ކަމަށްވާ އައިޕެޑް، މެކްބުކް، އަދި ކާޕްލޭ ފަދަ ނިޒާމުތަކުގައިވެސް ބޭނުންކުރެވޭނެއެވެ. ސިއްރުހިފެހެއްޓުމާ ބެހޭގޮތުން ވާހަކަދައްކަވަމުން އެޕަލްގެ ސޮފްޓްވެއަރ އިންޖިނިއަރިންގެ އިސްވެރިޔާ ކްރެގް ފެޑެރިގީ ވިދާޅުވީ، ސިރީ މެދުވެރިކޮށް އެޕަލްގެ ސާވަރުތަކަށް ފޮނުވޭ އެއްވެސް މައުލޫމާތެއް އެޕަލް އިން ރައްކާކޮށްގެން ނުގެންގުޅޭނެ ކަމަށާއި، ޔޫޒަރުން ކުރާ ރިކުއެސްޓްތައް ފުރިހަމަކުރުމަށްފަހު އެ ޑޭޓާތައް ވަގުތުން ފުހެވިގެންދާނެ ކަމަށެވެ.