ރާއްޖޭގައި މަސްތުވާތަކެތީގެ ހާލަތު ބަދަލުކުރުމަށްޓަކައި އަތޮޅުތެރޭގައި މަސައްކަތް ކުރާ ފުލުހުންނާއި މާލޭގައި މަސައްކަތްކުރާ ހުރިހާ ފުލުހުން ގުޅިގެން ލިބޭ މަޢުލޫމާތުތައް އެއްކޮށްގެން މަސްތުވާތަކެތީގެ ނެޓްވޯކްތަކަށް ވަރުގަދަ ހަމަލާތަކެއް ކުރިޔަށް އޮތް ދުވަސްތަކުގައި ދޭނެކަމުގެ އިންޒާރު ހޯމް މިނިސްޓަރު އުމަރު ނަސީރު ދެއްވައިފި އެވެ.
ފުލުހުން ދާދި ފަހުން ހިންގި މަސްތުވާތަކެތީގެ ދެ އޮޕަރޭޝަނެއް ކާމިޔާބުކަމާއިއެކު ނިންމާލުމާއި ގުޅިގެން އެކަމުގެ އަގުވަޒަން ކުރުމުގެ ގޮތުން މިރޭ ނަސަންދުރާ ޕެލެސް ހޮޓަލުގައި ބޭއްވި ހަފްލާގައި ވާހަކަދައްކަވަމުން އުމަރު ނަސީރު ވިދާޅުވީ ރާއްޖޭގައި މަސްތުވާތަކެތި ބޭނުންކުރުމާއި މަސްތުވާތަކެތި އެތެރެކުރުމުގައި މިހާރު އޮތް ހާލަތު ބަދަލުކުރުމަށް 15 ވަރަކަށް އަހަރު ނަގާނެ ކަމަށެވެ.
ނަމަވެސް ކުރިއަށް އޮތް ފަސް އަހަރު ދުވަހުގެ ތެރޭގައި ވަރަށް ސާބިތުކަމާއިއެކު މަސައްކަތްކޮށްފިނަމަ މިހާރު ރާއްޖޭގައި އޮތް މަސްތުވާތަކެތީގެ ހާލަތު ބަދަލުކުރެވޭނެ ކަމަށް ވެސް އުމަރު ވިދާޅުވި އެވެ.
"ދިވެހިރާއްޖޭގެ މަސްތުވާތަކެތީގެ ހާލަތު ބަދަލުކުރުމަށްޓަކައި 15 ވަރަކަށް އަހަރު ދުވަސް ނަގާނެ ކަމަށް އަޅުގަނޑަށް އަންދާޒާ ކުރެވޭ، އެކަމަކު ކުރިއަށް އޮތް ފަސް އަހަރު ދުވަހުގެ ތެރޭގައި ވަރަށް ސާބިތުކަމާއިއެކު، ވަރަށް ވަރުގަދަ އަޒުމެއްގައި ފުލުހުންގެ މުއައްސަސާ މަސައްކަތްކޮށްފިއްޔާމުން މަސްތުވާތަކެތީގެ ހާލަތު ބަދަލުކުރެވޭނެ." އުމަރު ނަސީރު ވިދާޅުވި އެވެ.
"ވަރަށް ގިނަ މައިންބަފައިންގެ ރުއިމާއި ކަރުނައިން އެމީހުން ސަލާމަތްކުރެވޭނެ، ވަރަށް ގިނަ ޒުވާނުންތަކެއް އަނބުރާ މުޖުތަމައުއަށް ނެރެވޭނެ، އެމީހުންނަށް މަސްތުވާތަކެތީގައި ނުޖެހި ސަލާމަތްވުމުގެ ފުރުސަތު އަޅުގަނޑުމެން މެދުވެރިކުރާނަން." މިނިސްޓަރު އިތުރަށް ވިދާޅުވި އެވެ.
މިނިސްޓަރު ވިދާޅުވީ މަސްތުވާތަކެތީގެ ވަބާއިން ރާއްޖެ ސަލާމަތްކުރުމަށްކުރާ މި މަސައްކަތަކީ ގައުމީ މަސައްކަތެއް ކަމަށާއި މިއީ މީގެ ކުރީގެ ޖީލުތަކަށް ދިމާވި ފަދަ ބޮޑު ހަނގުރާމައެއް ކަމަށެވެ. އަދި މި ހަނގުރާމަ ވަރަށް ވިސްނުންތެރިކަމާއިއެކު ގާނޫނުތަކުގެ ތެރެއިން ކުރަން ޖެހޭނެ ކަމަށް ވެސް މިނިސްޓަރު ވިދާޅުވި އެވެ.
މަސްތުވާތަކެތީގެ ވަބާއިން ދިވެހި ގައުމު ސަލާމަތްކުރުމަށް ފުލުހުން ފަރުވާލެއްނެތި ކުރަމުންގެންދާ ހިތްވަރުގަދަ މަސައްކަތް މަޑުޖެއްސުމަށް މަސްތުވާތަކެތީގެ ވިޔަފާރިކުރާ ފަރާތްތަކުން ޚާއްސަ ސަމާލުކަމެއްދީގެން މަސައްކަތްތަކެއް ކުރަމުންގެންދާކަމަށާއި ނަމަވެސް އެފަދަ އެއްވެސް ފިނޑި އަމަލަކަށް ނުބަލާ ފަސްޖެހުމެއް ނެތި މަސްތުވާތަކެތީގެ ވަބާއިން ދިވެހި ޤައުމު ސަލާމަތްކުރުމަށް ފުލުހުން މަސައްކަތްކުރަމުން ގެންދިޔުމަށާއި މިހާރު ކުރާ މަސައްކަތްތަކަށް އިތުރު ހަލުވިކަމެއްދީ އެއްގިޔަރު ކުރިއަށް ޖައްސައިގެން މަސައްކަތްކުރުމަށް ހުރިހާ ފުލުހުންނަށް ހޯމް މިނިސްޓަ ވަނީ ގޮވާލައްވާފައެވެ.
މި ރަސްމިއްޔާތުގައި ވާހަކަދައްކަވަމުން ކޮމިޝަނަރ އޮފް ޕޮލިސް ހުސެއިން ވަހީދު ވިދާޅުވީ ފުލުހުންކުރާ މަސައްކަތުން 15 އަހަރަށް ވުރެ މާ ކުރު މުއްދަތެއްގެ ތެރޭގައި ރާއްޖެއަށް ދިމާވެފައިވާ މަސްތުވާތަކެތީގެ ވަބާއިން ސަލާމަތްކުރާނެ ކަމަށެވެ.
އަދި މަސްތުވާތަކެތީގެ ބޮޑެތި ނެޓްވޯކްތައް ފުނޑު ފުނޑުކޮށްލުމަށް ފުލުހުން ކުރަމުންގެންދާ މި މަސައްކަތް އިތުރަށް ހަރުދަނާކޮށް އިތުރު ހިތްވަރަކާއި އެކު ކުރިއަށް އޮތްތަނުގައި ކުރިއަށް ގެންދަވާނެކަމުގެ ޔަގީންކަން ހުރިހާ ފުލުހުންގެ ނަމުގައި ކޮމިޝަނަރ އޮފް ޕޮލިސް ވަނީ ހޯމް މިނިސްޓަރަށް އަރުއްވާފައެވެ.