އިންޑިޔާގެ ބިހާރުގައި ހޫނުގަދަވުމުގެ ސަބަބުން ހެނދުނު 9:00 އިން ފެށިގެން ހަވީރު 6:00 އާއި ހަމަޔަށް، ކެއްކުން މަނާކޮށްފިއެވެ. އެ ޤައުމުގެ ކާރިސާތަކާއި ބެހޭ އިދާރާއަކުން މި ނިންމުން ނިންމާފައިވަނީ، ކެއްކުމުގެ ސަބަބުން ނުރައްކާތެރި އަލިފާނުގެ ހާދިސާއެއް ހިނގުމުގެ ފުރުޞަތު އޮތުމުން ކަމަށް ބުނެއެވެ.
ކެއްކުމުގެ އިތުރުން، ހިންދޫންގެ އަޅުކަންތަކަށް އަލިފާން ބޭނުންކުރުމާއި ދަނޑުތައް ރޯކުރުންވެސް އެ ސްޓޭޓުގައިވަނީ ވަގުތީގޮތުން މަނާކޮށްފައެވެ. އެ ސްޓޭޓުގެ ޗީފް މިނިސްޓަރުގެ އަމުރަކަށް މިކަންކަން މަނާކޮށް ބަޔާނެއް ނެރެފައިވަނީ، ހޫނުގަދަވުމުގެ ސަބަބުން ބިހާރުގައި ހިނގި އަލިފާނުގެ ހާދިސާތަކުގައި މިދިޔަ މަހު އެކަނިވެސް  67 މީހުން މަރުވެފައިވަނިކޮށެވެ.
މިކަމާއި ގުޅިގެން އިންޑިޔާގެ ކާރިސާތަކާއި ބެހޭ އިދާރާގެ އޮފިޝަލެއް ވިދާޅުވީ އެ ސްޓޭޓުގެ ގިނަ ވިލެޖުތަކުގައި ހޫނުގަދަވުމުގެ ސަބަބުން އަލިފާނުގެ ހާދިސާތައް ހިނގަން ބޮޑަށް މެދުވެރިވެފައިވަނީ ކެއްކުމުގެ ތެރޭގައިކަމަށާއި، ހެނދުނު 9:00 ގެ ކުރިން ކެއްކުމުގެ ހުރިހާ މަސައްކަތެއް ކޮށް ނިންމަން ޖެހޭނެ ކަމަށެވެ.
މި ދުވަސްވަރަކީ ހީޓް ވޭވެއްގެ ސަބަބުން އިންޑިއާގެ ބިހާރާއި އެނޫންވެސް ގިނަ ސަރަޙައްދުތަކަށް ހޫނުގަދަ ދުވަސްވަރެކެވެ. އެގޮތުން ބައެއް ސަރަޙައްދުތަކުގެ ފިނިހޫނުމިން 40 ޑިގްރީ ސެލްސިއަސްއަށް ވުރެ މައްޗަށް އުފުލިފައިވާކަމަށް މައުލޫމާތު ލިބެއެވެ.