އެމެރިކާގެ މަޝްހޫރު ލަވަކިޔުންތެރިޔާ ކްރިސް ބްރައުންގެ ގޭގައި ގެންގުޅުނު ކުއްތާއެއް، އޭނާގެ ގޭގައި މަސައްކަތްކުރާ މީހަކަށް ހަމަލާދީ ޒަހަމްކޮށްލި މައްސަލައިގައި، ބްރައުން އެކަމަށް ޒިންމާވާންޖެހޭނެ ކަމަށް ކޯޓުން ނިންމައިފި އެވެ.
ދެހާސް ވިހި ވަނަ އަހަރު ހިނގި މި ހާދިސާގައި ބްރައުންގެ ގޭގައި މަސައްކަތްކުރި އަންހެން މީހާގެ ހަށިގަނޑުގެ ބައެއް ގުނަވަންތަކަށް ބޮޑެތި ގެއްލުންތަކެއް ލިބުނެވެ.
ލޮސް އެންޖެލިސްގައި ދެ ހަފުތާގެ މުއްދަތަށް ކުރިއަށްދިޔަ ޝަރީއަތަށް ފަހު، ޖޫރީން ނިންމީ މި މައްސަލައިގައި ދައުވާކުރި މާރިއާ އަވީލާއާ އެއްކޮޅަށެވެ. ކެލިފޯނިއާގެ ތަރްޒާނާގައި ހުންނަ ބްރައުންގެ ގޭގެ ކުނި އުކާލަން އުޅުމުގެ ތެރޭގައި އަވީލާއަށް ހަމަލާދިނީ، ބްރައުން ގެންގުޅުނު 90 ކިލޯ ބަރުދަން ހުރި "ކައުކޭޝިއަން ޝެޕަޑް" ނަމަކަށް ކިޔާ ބާވަތުގެ ކުއްތާއެކެވެ.
އެމެރިކާގެ މިއުޒިކް މަޖައްލާއެއް ކަމަށްވާ "ބިލްބޯޑް" އިން ރިޕޯޓްކޮށްފައިވާ ގޮތުގައި، މި ހާދިސާގައި އިހުމާލުވެފައި ވާތީ ކްރިސް ބްރައުން އާއި އޭނާގެ ކުންފުނި ކަމަށްވާ "ބްލެކް ޕިރަމިޑް އެލްއެލްސީ" އިން އަވީލާއަށް ބަދަލުގެ ގޮތުގައި 12.9 މިލިއަން އެމެރިކާ ޑޮލަރު ދައްކަން ޖެހޭނެ އެވެ.
އަވީލާ ކޯޓުގައި ބުނެފައިވާ ގޮތުގައި، "ހޭޑީސް" ނަމަކަށް ކިޔާ އެ ކުއްތާ ވަނީ އޭނާގެ ހަށިގަނޑުގެ ބޮޑެތި ބައިތަކެއް ހަފާލައި ކާލާފަ އެވެ. މީގެ ސަބަބުން އޭނާގެ މޫނުގެ ސިފަ ދާއިމީކޮށް ބަދަލުވެ، ލަކުނުލައި، ފެނުމުގެ ބާރު ދެރަވެ، ނާރުތަކަށް ވަނީ ބޮޑެތި ގެއްލުންތަކެއް ލިބިފަ އެވެ.
މި މައްސަލައިގައި ބްރައުން މީގެ ކުރިން ބުނެފައިވަނީ، އެ ކުއްތާއަކީ ސަލާމަތީ ކަންކަން ބެލެހެއްޓުމަށް ގެންގުޅުނު އެއްޗެއް ކަމަށެވެ.
"ރޯލިންގް ސްޓޯން" އިން ރިޕޯޓްކޮށްފައިވާ ގޮތުގައި، ޝަރީއަތުގެ މަޖިލީހަށް ހުށަހެޅި ހެކިބަހުން އެނގޭ ގޮތުގައި، ކުއްތާ ހަމަލާދިނުމުން އަވީލާއަށް އެހީތެރިވުމުގެ ބަދަލުގައި ނުވަތަ ކުއްލި ހާލަތްތަކުގައި ގުޅާ ނަންބަރަށް ގުޅުމުގެ ބަދަލުގައި، ބްރައުން ވަނީ ފިލާފަ އެވެ.
ބްރައުން އެ ތަނުން ދިޔައީ އަވީލާގެ ކަންކަން ބެލުމަށް އޭނާގެ މުވައްޒަފުންނާ ހަވާލުކުރުމަށް ފަހު އެވެ. އޭނާ އެ ސަރަހައްދު ދޫކޮށް ދިޔައީ، ކުއްލި ހާލަތުގެ ނަންބަރު 911 އަށް ގުޅާއިރު އޭނާގެ އަޑު އިވިއްޖެ ނަމަ ނުވަތަ ފުލުހުން އަންނައިރު އޭނާ އެތަނުގައި ހުރެއްޖެ ނަމަ، މީޑިއާގެ ބޮޑު ސަމާލުކަމެއް އެކަމަށް ހުއްޓިދާނެތީ އެކަމާ ބިރުން ކަމަށް ޝަރީއަތުގައި ވަނީ ބުނެފަ އެވެ.