ކޮވިޑް-19 އާ މުޅި ދުނިޔެ ހަނގުރާމަ ކުރާ މި ބިރުވެރި ދުވަސްވަރު ފޮތް ކިޔުމާއި، ކިޔައިދިނުމާއި ފޮތްތެރިކަމުގެ މުހިންމުކަން އިހުނަތްވުރެ ބޮޑަށް އިހުސާސް ކުރެވޭ ކަމަށް ފަންނާއި ސަގާފަތާއި ތަރިކައިގެ ވަޒީރު ޔުމްނާ މައުމޫން ވިދާޅުވެއްޖެއެވެ.
އޭޕްރީލް މަހުގެ 23 ވަނަ ދުވަހަކީ ކޮންމެ އަހަރުވެސް ދުނިޔޭގެ ފާހަގަކުރެވެމުންދާ ދުނިޔޭގެ ފޮތާއި ކޮޕީ ރައިޓުގެ ދުވަހެވެ.
މި ދުވަހުގެ މުނާސަބަތުގައި މިނިސްޓަރ ދެއްވި ޚިތާބުގައި ވަނީ ކޮވިޑް-19 އާ މުޅި ދުނިޔެ ހަނގުރާމަ ކުރާ މި ބިރުވެރި ދުވަސްވަރު ފޮތް ކިޔުމާއި، ކިޔައިދިނުމާއި ފޮތްތެރިކަމުގެ މުހިންމުކަން އިހުނަތްވުރެ ބޮޑަށް އިހުސާސް ކުރެވޭ ކަމަށާއި މި އާލަމީ ވަބާއިން ރައްކާތެރިވުމުގެ ގޮތުން މީހުން އެއްވެއުޅޭ އާންމު ތަންތަނަށް ނިކުމެ ނޫޅުމުގެ ސަބަބުން ފޮތް ކިޔުމަށް ވަގުތު ލިބިގެންދިޔަކަން ފާހަގަކުރައްވާފައެވެ.
ފޮތް ކިޔުމަށާއި ފޮތުން މައުލޫމާތު އުނގެނުމަށް ލިބިފައިވާ މި ފުރުސަތުގެ ބޭނުން ރަނގަޅަށް ހޯއްދެވުމަށް އެދި މިނިސްޓަރުގެ ޚިތާބުގައި ވަނީ މިދުވަސްވަރަކީ ބަރަކާތްތެރި ރަމަޟާން މަހަށްވުމާއެކު ކީރިތި ގުރުއާން ގިނަގިނައިން ކިޔަވައި އެ ފޮތުގައިވާ އާޔަތްތަކުގެ މާނައާއި މެދު ވިސްނާ ފިކުރުކުރުމަކީ ނުހަނު ބޭނުންތެރިކަމެއް ކަމަށް ވިދާޅުވެފައެވެ.
ކުދިންގެ ތައުލީމީ ބިންގާ ހަރުދަނާ ކުރުމަށްޓަކައި އެކުދިންނަކީ ފޮތް ކިޔާހިތްވާ، ފޮތްތެރިކަމަށް ލޯބިކުރާ ބައެއްގެ ގޮތުގައި ތަރުބިއްޔަތު ކުރުމަށްވެސް މިނިސްޓަރުގެ ޚިތާބުގައިވަނީ އެދިވަޑައިގެންފައެވެ.
މި އަހަރުގެ ދުނިޔޭގެ ފޮތާއި ކޮޕީރައިޓްގެ ދުވަހުގެ ޝިޢާރަކީ "ވާހަކައެއް ހިއްސާކޮށްލަމާ" ނުވަތަ "ޝެއާރ އަ ސްޓޯރީ" މިއެވެ.