އުރީދޫ ދިވެހި ޕްރިމިއާ ލީގުގައި ބީޖީ ސްޕޯޓްސް އަތުން 3-1 އިން މޮޅުވެ ވިކްޓަރީ ލީގުގެ ފަސް ވަނަ އަށް ޖެހިލިއިރު، ބީޖީ މިރޭގެ މެޗުން ބަލިވުމުން އަންނަ އަހަރު ލީގުން ޖާގަ ހޯދަން ޕްލޭ އޮފްގައި ކުޅެން ބީޖީ އަށް ޖެހިއްޖެ އެވެ. ވިކްޓަރީ ފަސް ވަނަައިގައި އޮވެ ލީގު ނިންމާލީ 14 މެޗުން 17 ޕޮއިންޓާ އެކު އެވެ. ހަ ވަނައިގައި ވެލެންސިއާ އޮތީ 14 މެޗުން 16 ޕޮއިންޓް ހޯދައިގެންނެވެ. ހަތް ވަނައިގައި ބީޖީ 14 މެޗުން 13 ޕޮއިންޓާ އެކު އޮތްއިރު، އެންމެ ފުލުގައި މަހިބަދޫ އޮތީ 14 މެޗުން ދެ ޕޮއިންޓާ އެކު އެވެ. އެ ޓީމު ވަނީ ރެލިގޭޓްވެފަ އެވެ. މިރޭގެ މެޗުގައި ވިކްޓަރީގެ ތިން ލަނޑުގެ ތެރެއިން ދެ ލަނޑު ކާމިޔާބުކުރީ އޮމޮދޫ ގޮޑްފްރޭ ވެސްޓް އެވެ. އަނެއް ލަނޑު ޖެހީ އިބްރާހިމް ޝާތިރު އެވެ. ބީޖީގެ ހަމައެކަނި ލަނޑު ކާމިޔާބުކުރީ ޑެނިއަލް ފިލަމޮން އެެވެ. ވިކްޓަރީ އަށް ލީޑު ނަގައިދިނީ މެޗުގެ 32 ވަނަ މިނިޓްގައި އޮމޮދޫ އެވެ. ބީޖީ އޭރިއާ ރޮނގުކައިރިން މަތިން އައި ބޯޅައެއް މެއިން ކޮންޓްރޯލް ކޮށްލުމަށް ފަހު އޮމޮދޫ ވަނީ ގޯލުގެ ތިރީ ކަނަށް އަމާޒުކޮށްލައިފަ އެވެ. ފުރަތަމަ ހާފް ނިމުމުގެ ކުރިން ބީޖީން އެއްވަރުކުރުމާ ގާތަށް ޖެހިލި އެވެ. މެޗުގެ 39 ވަނަ މިނިޓްގައި ބީޖީގެ އިބްރާހިމް ހަމްދާން ފޮނުވާލި ބޯޅަ ގޯލަށް ވަންނަން ދަނިކޮށް ވިކްޓަރީގެ އަލީ އިފާޒު ވަނީ ގޯލު ރޮނގުމަތިން އެ ބޯޅަ ބޭރުކޮށްލައިފަ އެވެ. ވިކްޓަރީގެ ދެ ވަނަ ލަނޑު އޮމޮދޫ ކާމިޔާބުކުރީ މެޗުގެ 71 ވަނަ މިނިޓްގަ އެވެ. ޝާތިރު ނަަގައިދިން ހުރަހަކުން އޮމޮދޫ މި ލަނޑު ޖެހީ ބޮލުންނެވެ. ވިކްޓަރީން ލީޑުފުޅާ ކުރުމާ އެކު ބީޖީން ވަނީ ކުޅުން ރަނގަޅުކޮށް ލަނޑެއް ޖަަހައިފަ އެވެ. މެޗުގެ 77 ވަނަ މިނިޓްގައި ބީޖީގެ ލަނޑު ޖެހީ އެޓީމުގެ ނައިޖީރިއާ މިޑްފީލްޑަރު ޑެނިއަލް އެވެ. މެޗުގެ 88 ވަނަ މިނިޓްގައި ބީޖީގެ ކީޕަރު އިފްރާހް އަރީފަށް ހެދުނު ގޯހެއްގެ ފައިދާ ނަގާ ޝާތިރު ވަނީ ވިކްޓަރީގެ ތިން ވަނަ ލަނޑު ޖަހައިފަ އެވެ. މެޗުގެ އިތުރު ވަގުުތުގައި ވިކްޓަރީގެ އަހުމަދު ނިޔާޒަށް ކުރި ފައުލަކާ ގުޅިގެން ބީޖީގެ އަހުމަދު ޒުބައިރަށް ވަނީ ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. ޕްލޭ އޮފް ދެ މެޗު ކުޅޭނީ މި މަހު ހަތަރު ވަނަ ދުވަހާއި ހަ ވަނަ ދުވަހު އެވެ. ޕްލޭ އޮފްގައި ބީޖީ ނުކުންނާނީ ދެ ވަނަ ޑިވިޝަންގެ ރަނަރަޕް ޓީމާ ދެކޮޅަށެވެ. ވިކްޓަރީގެ ކޯޗު އަހުމަދު ނާޝިދު (ނާދު) ބުނީ މެޗަށް ނުކުތީ ތިން ޕޮއިންޓް ހޯދުމަށް ކަމަށާއި އެކަން ހާސިލްވުމުން ހިތްހަމަޖެހޭ ކަމަށެވެ. "މެޗަށް ނުކުތީ ތިން ޕޮއިންޓް ހޯދައި ގަދަ ހަޔެއްގައި ނިންމާލުމަށް. އެކަން ހާސިލްވުމުން ހިތްހަމަޖެހޭ. ވިކްޓަރީ އަކީ އެންމެ ފަހުން ލީގަށް ތައްޔާރުވި ޓީމު. އެހެންވުމުން ރަނގަޅު ކުޅުންތެރިން ހޯދުމަށް ވެސް ދަތިތަކެއް ދިމާވި. އެގޮތަށް ބަލާއިރު ގަދަ ހަޔެއްގައި ނިންމާލެވުން އެއީ ރަނގަޅު ނަތީޖާ އެއް،" ނާދު ބުންޏެވެ. މި ސީޒަނުގެ ނިޔަލަށް ވިކްޓަރީއާ އެކު ހަދާފައިވާ އެއްބަސްވުމުގެ މުއްދަތު ހަމަވި ނަމަވެސް އެ ކްލަބްގައި އަންނަ އަހަރު ހުންނަން ބޭނުންވާ ކަމަށް ނާދު ވަނީ ބުނެފަ އެވެ. ބީޖީގެ ކޯޗު މުހައްމަދު ޝާޒްލީ (ޝާޒް) ބުނީ މެޗަށް ނުކުތްއިރު ވެސް އެޑްވާންޓޭޖް ބޮޑީ ވިކްޓަރީ އަށް ކަމަށެވެ. "އުނދަގޫ މެޗެއް ނިންމާމިލެވުނީ. ވިކްޓަރީ އަށް އެޑްވާންޓޭޖް އޮތް މެޗަށް ނުކުތްއިރު ވެސް. އެ ޓީމަކީ މިފަދަ މެޗުތަކުގައި ތަޖުރިބާ ލިބިފައި އޮތް ވަރުގަދަ އަށް ކުޅޭ ޓީމެއް. ޕްލޭ އޮފްގައި ކުޅެން ޖެހުނަސް އުއްމީދުކުރަނީ އެ މެޗުން މޮޅުވެ އަންނަ އަހަރުގެ ލީގުން ބީޖީ ފެންނާނެ ކަމަށް،" ޝާޒް ބުންޏެވެ. ލީގުގައި މާދަމާ ހަވީރު މާޒިޔާ އާއި އީގަލްސް ކުޅޭއިރު، މާދަމާރޭ ނިއު ބައްދަލުކުރާނީ ޓީސީއާ އެވެ. ނިއުގެ މެޗަށް ފަހު އެޓީމާ ލީގުގެ ޝީލްޑް ހަވާލުކުރާނެ އެވެ.