ޖަނަރޭޓަރަށް ދިމާވި މައްސަލައަކާ ގުޅިގެން އިއްޔެ ކަރަންޓު ކެނޑުނު، ރ. އަލިފުއްޓަށް ކަރަންޓު ދީފި އެވެ.
ފެނަކައިން ބުނި ގޮތުގައި އެ ރަށުގެ ޖަނަރޭޓަރުތަކަށް ދިމާވި މައްސަލަ ހައްލުކުރުމަށްފަހު މިހާރު ވަނީ ރަށަށް ކަރަންޓު ދީފަ އެވެ. ރަށަށް އެއްކޮށް ކަރަންޓު ދެވޭވަރުވީ މިއަދު މެންދުރުފަހު 2:30 ހާއިރު އެވެ.
އިއްޔެ ހެނދުނުން ފެށިގެން އެ ރަށުން ކަރަންޓު ކެނޑެމުން ގޮސްފައިވާއިރު ރޭ އިޝާ ނަމާދު ވަގުތު ޖެހުނުތަނާހެން ކަރަންޓު ދިޔަ ގޮތަށް ރަށަށް އެއްވެސް ވަރަކަށް ކަރަންޓު ނުލިބެ އެވެ. އެކަމާ ކަންބޮޑުވުން ފާޅުކޮށް ރައްޔިތުން އިހުތިޖާޖު ވެސް ކޮށްފައިވެ އެވެ.
އަލިފުށީގައި ހުންނަނީ 400 ކިލޯ ވޯޓްގެ ޖަނަރޭޓަރަކާއި 600 ކިލޯ ވޯޓްގެ ޖަނަރޭޓަރެކެވެ. އެ ދެ ޖަނަރޭޓަރަށް ދިމާވި މައްސަލައަކާ ގުޅިގެން އެކަށީގެންވާ ވަރަށް ކަރަންޓު އުފައްދައިދީފައެއް ނުވެ އެވެ. އެކަން މިހާރު ވަނީ ހައްލުކޮށްފަ އެވެ.
ތިން ހާހެއްހާ މީހުން ދިރިއުޅޭ އަލިފުށީގައި މީހުން ދިރިއުޅޭ 400 އެއްހާ ގޭބިސީ ހުރެ އެވެ.