ދިވެހި ސިފައިންގެ 122 ވަނަ އަހަރީ ދުވަހުގެ މުނާސަބާ ފާހަގަ ކުރުމުގެ ގޮތުން ސިފައިންގެ ޝަރަފުގެ ހިނގާލުން މިއަދު ހަވީރު މާލޭގައި ބާއްވައިފި އެވެ.
ކަޅުތުއްކަލާ ކޮށިން މިއަދު 16:30 ގައި ފެށި މި ހިނގާލުން ވަނީ، އަމީނީ މަގުން ރާޅުގަނޑާ ދިމާލަށް ގޮސް، ބޮޑުތަކުރުފާނު މަގުން ހުޅަނގަށް އައިސް ކަޅުތުއްކަލާ ކޮށްޓަށް ނިންމާފަ އެވެ.
މި ހިނގާލުމުގައި، ދަރުބާރުގޭ ފުރަގަހުގައި އޮންނަ އުސްފަސްގަނޑު ސަރަހައްދަށް ހިނގާލުން މަޑުކޮށް، ސިފައިންގެ ބްރާސް ބޭންޑުގެ ފަރާތުން ވަނީ މިއުޒިކްގެ ހުނަރުތަކެއް ވެސް ދައްކާލާފަ އެވެ. އަދި އެމްއެންޑީއެފްގެ ބައެއް ޚިދުމަތްތަކުގެ ދިދަތައް ވެސް ވަނީ ޢާންމުންނަށް ދައްކާލާފަ އެވެ.
ސިފައިންގެ ބްރާސް ބޭންޑުގެ ހަރަކާތްތައް ބަލައިލުމަށް ވަރަށް ގިނަ ޢާންމު ރައްޔިތުންނާއި ކުޑަ ކުދިން އެ ސަރަހައްދަށް މިއަދު ހަވީރު ގޮސްފައި ވެ އެވެ.
މީގެ އިތުރުން، މި ހިނގާލުމުގައި ރާއްޖޭގެ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރޓޑ) މުހައްމަދު ނާޒިމާއި، ޗީފް އޮފް ޑިފެންސް މޭޖަރ ޖެނެރަލް އަޙްމަދު ޝިޔާމާއި، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙްމަދު މުޙައްމަދާއި، ސިފައިންގެ އެހެނިހެން އިސްވެރިން ވެސް ވަނީ ބައިވެރިވެ ވަޑައިގެންފަ އެވެ.
ދިވެހި ސިފައިންގެ 122 ވަނަ އަހަރީ ދުވަސް ކުލަގަދަ ގޮތެއްގައި ފާހަގަ ކުރުމުގެ ގޮތުން، ތަފާތު ހަރަކާތްތަކެއް އެމްއެންޑީއެފްގެ މާލޭ އޭރިއާ، އެމްއެންޑީއެފް ނޮދަން އޭރިއާ، އެމްއެންޑީއެފް ސެންޓްރަލް އޭރިއާ އަދި އެމްއެންޑީއެފް ސަދަން އޭރިއާގައި ކުރިއަށް ގެންދެވޭނެ ކަމަށް އެމްއެންޑީއެފް އިން ބުނެ އެވެ.