ސަރުކާރުން މަޖިލީސް މެދުވެރިކޮށް ސުޕްރީމް ކޯޓުގެ ބެންޗު މިހާރު ބަދަލުކުރަން މަސައްކަތް ކުރަމުން ދަނީ، މިހާރު ވާ ބެންޗު އެކުލަވާލީ ރައީސް އަބްދުﷲ ޔާމީންގެ ބަސްފުޅެއް ނުހިމެނޭ ގޮތެއްގައި ކަމަށް ވާތީ ކަމަށް އެމްޑީޕީގެ ރައީސް އަދި ކުރީގެ ރައީސުލްޖުމްހޫރިއްޔާ މުހައްމަދު ނަޝީދު ވިދާޅުވެއްޖެއެވެ.
އެމްޑީޕީއިން ހއ އަދި ހދ އަތޮޅަށް ކުރާ ދަތުރުގައި ފުރާވަޑައިގަތުމުގެ ކުރިން މީޑިޔާއާ ބައްދަލުކުރައްވައި ވާހަކަ ދައްކަވަމުން، ރައީސް ނަޝީދު ވިދާޅުވީ މިހާރުގެ ސުޕްރީމް ކޯޓުގެ ބެންޗު އެކުލަވާލާފައި ވަނީ، އޭރުގެ އެންމެ ބޮޑު ދެ ސިޔާސީ ޕާޓީތައް ކަމުގައިވާ އެމްޑީޕީއާއި ޑީއާރުޕީގެ ބަސް އެކުލެވިގެން ކަމަށެވެ.
ނަމަވެސް، އޭރު ރައީސް ޔާމީން ހުންނެވީ ޕީޕަލްސް އެލަޔަންސް (ޕީއޭ)ގައި ކަމުން، އެ ބެންޗު އެކުލަވާލުމުގައި ރައީސް ޔާމީންގެ ބަސްފުޅެއް ނުހިމެނޭ ކަމަށް ރައީސް ނަޝީދު ވިދާޅުވިއެވެ.
"މިހާރު އެކުލަވާލާފައިވާ ސުޕްރީމް ކޯޓުގެ ބެންޗަކީ އޭރުގެ ރައްޔިތުންގެ މަޖިލީހުގެ ބޮޑެތި ޕާޓީތަކުގެ މަޝްވަރާއާއި އެކު އެކުލަވާލެވުނު ބެންޗެއް. ޚައްސަކޮށް އެމްޑީޕީއާއި ޑީއާރުޕީގެ މަޝްވަރާތަކަށް ފަހު އެކުލަވާލެވުނު ބެންޗެއް. މި ބެންޗު އެކުލަވާލެވުނު އިރު، އަބްދުﷲ ޔާމީން ހުންނެވީ ޕީއޭގައި. މި ބެންޗު އެކުލަވާލުމުގައި އެބޭފުޅާގެ ބައިވެރިވުން ނެތިފައި ވީ ކަމުން މިހާރު އަލުން އަނބުރައި ބެންޗަށް ބަދަލު ގެންނަވަން އުޅެނީ،" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، ސުޕްރީމް ކޯޓުގެ ބެންޗު ބަދަލުކުރުމުގައި ފުރިހަމަ ކުރަންޖެހޭ އިޖުރާޢަތްތަކެއް ޤާނޫނު އަސާސީގައި ބަޔާންވެފައިވާ ކަމަށާއި، ފަނޑިޔާރަކު ސުޕްރީމް ކޯޓުން ވަކިކުރެވޭނީ ރައްޔިތުންގެ މަޖިލީހުގެ ވަކި އަޣުލަބިއްޔަތަކާ އެކުގައި ކަން ވެސް ސާފުކޮށް ބަޔާންކުރެވިފައި ވާނެ ކަމަށެވެ.
ނަމަވެސް، ޕީޕީއެމްއިން މިހާރު މަސައްކަތް ކުރަމުން ދަނީ މި އުސޫލު ބޭނުން ނުކޮށް ސުޕްރީމް ކޯޓުގެ ބެންޗަށް ބަދަލު ގެންނަން ކަމަށާއި، އެހެންކަމުން މިކަމުގައި ފޮރުވިފައިވާ ރޭވުންތަކެއް އޮތްކަމަށް ލަފާ ކުރެވޭ ކަމަށެވެ.
"އަޅުގަނޑުމެންނަށް ފެންނަ ފެނުމުގައި މީގައި ފޮރުވިފައިވާ ރޭވުންތަކެއް އޮތްކަމަށް ލަފާކުރެވޭ. ވަރަށް ދެރަ ކަމެއް ދެފުށް ފެންނަ ގޮތަށް ސަރުކާރުގެ ސިޔާސަތުތައް ކުރިޔަށް ނުގެންދެވޭތީ. އަޅުގަނޑުމެން ބަލައިގެންފައިވާ ޤާނޫނު އަސާސީގެ އެންމެ ބޮޑު ތަރަހައަކީ ދެފުށް ފެނުން. އަޅުގަނޑު ދެކޭ ގޮތުގައި މިހާރު ގެންނަވަން އުޅޭ ބަދަލު، އަދި ކާކުތޯ ބެންޗުގައި ތިއްބަވާތީ ނުވަތަ ނުތިއްބަވާނީ، މިބާވަތުގެ މަޢުލޫމާތު އަޅުގަނޑުމެންނަކަށް ނުލިބޭ،" ރައީސް ނަޝީދު ވިދާޅުވިއެވެ.
މީގެ އިތުރުން، ރައީސް ނަޝީދު ވިދާޅުވީ ޝަރުޢީ ނިޒާމު އިސްލާހު ކުރުމަށް ކުރެވޭނެ ކިތަންމެ ކަމެއް އެބަހުރި ކަމަށާއި، އަދި ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަކީ މިކަމުގެ ތެރޭގައި ހިމެނޭ ކަމެއް ވާ ނަމަވެސް، މިކަން ކުރަން ޖެހޭނީ ޤާނޫނު އަސާސީގައި ކަނޑައަޅާފައިވާ ތަރުތީބެއްގެ ތެރެއިން ކަމަށް ރައީސް ނަޝީދު ވިދާޅުވިއެވެ.
"އަޅުގަނޑަށް ފެންނަ ފެނުމުގައި މި މަސައްކަތް މި ހިންގެނީ، ރައީސް ޔާމީން އަބްދުލްޤައްޔޫމްގެ ސީދާ ބާރުގެ ދަށަށް، އަދި އެބޭފުޅާގެ ސީދާ ބާރުވެރިކަމާޢި އަމުރުވެރިކަން ހިންގާނެ ގޮތަކަށް އެ ބެންޗު އެކުލަވާލުމަށް،" ރައީސް ނަޝީދު ވިދާޅުވިއެވެ.