މި މަހުގައި އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ މެޗުތައް ކުޅޭ އެއްވެސް ސްޓޭޑިއަމެއްގައި ވުވުޒޭލާ ބޭނުންކުރުން ފީފާއިން ރަސްމީކޮށް މަނާކޮށްފިއެވެ. މިއީ ފުޓްބޯޅަ ސަޕޯޓަރުންގެ މެދުގައި މަގުބޫލު، ނަމަވެސް ބޮޑެތި ފާޑުކިޔުންތަކެއް އަމާޒުވެފައިވާ މި އާލާތް ބޭނުންކުރުން ހުއްޓުވުމަށް ނިންމި ނިންމުމެކެވެ. ފީފާގެ ސްޓޭޑިއަމް ކޯޑް އޮފް ކޮންޑަކްޓަށް ގެނައި މި ބަދަލާއެކު، ވުވުޒޭލާގެ އިތުރުން އެއާ ހޯން، ފުމޭ އެއްޗެހި އަދި މާ ބޮޑަށް އަޑުގަދަވާ އެހެނިހެން އާލާތްތައް ސްޓޭޑިއަމަށް ވެއްދުން ވަނީ މަނާކޮށްފައެވެ. https://sun.mv/222887 ވުވުޒޭލާ ދުނިޔޭގެ ސަމާލުކަމަށް އައީ 2010 ވަނަ އަހަރު ދެކުނު އެފްރިކާގައި ބޭއްވި ވޯލްޑް ކަޕްގައެވެ. އެ މުބާރާތުގެ މެޗުތަކުގެ ތެރޭގައި މެދުނުކެނޑި އިވޭ ބަޒް އަޑަކީ އެ މުބާރާތުގެ އެންމެ ފާހަގަކޮށްލެވޭ އެއް ސިފައެވެ. ފީފާއިން ހާމަކުރި ގޮތުގައި މި ނިންމުން ނިންމީ ކުޅުންތެރިންނާއި، އޮފިޝަލުންނާއި، ބްރޯޑްކާސްޓަރުން އަދި ސަޕޯޓަރުންނަށް އެކަމުގެ ސަބަބުން މެދުވެރިވާ ދަތި އުނދަގޫތަކުން ސަލާމަތް ކުރުމަށެވެ. ވުވުޒޭލާގެ ސަބަބުން ދަނޑުމަތީގައި ކުޅުންތެރިންނާއި އޮފިޝަލުންގެ މެދުގައި ކުރެވޭ މުއާމަލާތްތަކަށް ވެސް ހުރަސްއެޅި، ސްޓޭޑިއަމްގައި ދެވޭ އިޢުލާންތައް ސަޕޯޓަރުންނަށް އަޑުއިިވުމަށް ދަތިވާކަމަށް ފީފާއިން ފާހަގަކުރެއެވެ. https://sun.mv/222852 މީގެ އިތުރުން، ޓީވީ މެދުވެރިކޮށް މެޗު ބަލާ ފަރާތްތަކަށާއި ބްރޯޑްކާސްޓަރުންނަށް ވެސް މި އަޑުގެ ސަބަބުން ބޮޑެތި އުނދަގޫތަކެއް ކުރިމަތިވެއެވެ. 2010 ވަނަ އަހަރުގެ މުބާރާތުގައި ކޮމެންޓޭޓަރުންގެ އަޑު ސާފުނުވުމާއި، ދަނޑުގެ ގުދުރަތީ އަޑުތަކާއި ސަޕޯޓަރުންގެ ލަވަތަކުގެ އަޑު ކަނޑައިގެންދާ މައްސަލަ ވަނީ ވަރަށް ބޮޑަށް ކުރިމަތިވެފައެވެ. ފީފާގެ އައު ގަވާއިދުތަކުގެ މަގްސަދަކީ ހުރިހާ ސަޕޯޓަރުންނަށް ވެސް އަރާމު އަދި އުފާވެރި މާހައުލެއް ގާއިމުކޮށްދިނުމެވެ. މަނާކޮށްފައިވާ ތަކެތި ހިފައިގެން އަންނަ ސަޕޯޓަރުން ދަނޑަށް ނުވެއްދުމަށް ނުވަތަ އެ ތަކެތި އަތުލުމަށް ވަނީ ހަމަޖެހިފައެވެ. މި ނިންމުމާ ގުޅިގެން ސަޕޯޓަރުންގެ މެދުގައި ވަނީ ޚިޔާލު ތަފާތުވުންތަކެއް އުފެދިފައެވެ. ބައެއް ފަރާތްތަކުން މި ނިންމުމަށް މަރުހަބާ ކިޔާއިރު، އަނެއް ބަޔަކު ގަބޫލުކުރަނީ މިއީ ފުޓްބޯޅައިގެ ސަގާފަތުގެ ތެރެއިން އުނިކުރެވޭ މުހިންމު ބައެއް ކަމަށެވެ. 48 ޓީމާއެކު ބާއްވާ ފުރަތަމަ ވޯލްޑް ކަޕް މިމަހުގައި ފެށޭއިރު، ސްޓޭޑިއަމްތަކުން އިވޭނީ ދެކުނު އެފްރިކާގެ މުބާރާތާ މުޅިން ތަފާތު، ސަޕޯޓަރުންގެ ލަވަތަކާއި ގުދުރަތީ އަޑުތަކުން ފުރިގެންވާ މާހައުލެއް ކަމަށް ބެލެވެއެވެ.