ޓްރަމްޕް މޮބައިލް ބޭނުންކުރާ ކަސްޓަމަރުންގެ ފޯނު ނަންބަރާއި ގޭގެ އެޑްރެސް ހިމެނޭހެން އަމިއްލަ ޒާތީ މައުލޫމާތުތަކެއް ލީކުވެއްޖެއެވެ. ޓްރަމްޕް މޮބައިލް ޓީ1 ސްމާޓްފޯން ބޭނުންކުރާ ގިނަ އަދަދެއްގެ ކަސްޓަމަރުންގެ އަމިއްލަ ސިއްރު މައުލޫމާތުތަކެއް އިންޓަނެޓަށް ލީކުވެފައިވާކަމަށް އެ ކުންފުނިން ވަނީ އެއްބަސްވެފައެވެ. މިގޮތުން ލީކުވި މައުލޫމާތުތަކުގެ ތެރޭގައި ކަސްޓަމަރުންގެ ފޯނު ނަންބަރުތަކާއި، ގޭގެ އެޑްރެހުގެ އިތުރުން އީމެއިލް އެޑްރެސްތައް ހިމެނެއެވެ. https://sun.mv/216182 މި މައުލޫމާތުތައް ލީކުވިކަމަށް އެ ކުންފުނިން އެއްބަސްވެފައި ވަނީ، ބައެއް ކަސްޓަމަރުންގެ އަމިއްލަ މައުލޫމާތު އިންޓަނެޓުން ފެންނަން ހުރިކަން ފާހަގަކޮށް އެކަމުގެ ޝަކުވާ ކުރަން ފެށުމުންނެވެ. ނަމަވެސް، ކުންފުނީގެ ތަރުޖަމާނު ބުނި ގޮތުގައި މި ލީކުގެ ތެރޭގައި ކަސްޓަމަރުންގެ މާލީ އެއްވެސް މައުލޫމާތެއް ނުހިމެނެއެވެ. މި ހާދިސާއާ ގުޅިގެން ޓްރަމްޕް މޮބައިލްގެ ފަރާތުން ކަސްޓަމަރުންނަށް ރަސްމީކޮށް އެއްވެސް އެންގުމެއް އަންގާފައެއް ނުވެއެވެ. އެ ކުންފުނީގެ ތަރުޖަމާނު ކްރިސް ވޯކާ މިކަމުގެ ޒިންމާ އަޅުވާފައިވަނީ އެ ކުންފުނީގެ މަސައްކަތްތަކަށް އެހީތެރިވެދޭ ތިންވަނަ ފަރާތެއްގެ ޕްލެޓްފޯމެއްގެ މައްޗަށެވެ. ނަމަވެސް އެއީ ކޮން ބައެއްކަމެއް ކުންފުނިން ހާމައެއް ނުކުރެއެވެ. މި ފޯނުތަކަކީ އެމެރިކާގައި އުފައްދާ ފޯނުތަކެއް ކަމަށް ކުރިން އިސްތިހާރު ކުރި ނަމަވެސް، ފަހުން މާކެޓިން މައުލޫމާތުތައް ވަނީ ބަދަލުކޮށްފައެވެ. އަދި ފޯނުގެ ފަހަތުގައި ޖަހާފައިވާ އެމެރިކާގެ ދިދައިގައި ހުންނަންޖެހޭ 13 ރޮނގުގެ ބަދަލުގައި އިނީ 11 ރޮނގުކަން ފާހަގަކުރެވިފައިވެއެވެ. މީގެ އިތުރުން، މިއީ އަލަށް ފަރުމާކުރި ފޯނެއް ނޫން ކަމަށާއި، މިއީ ޓައިވާން ނުވަތަ ޗައިނާގައި އުފައްދާފައިވާ މެދު ފަންތީގެ ފޯނެއްގައި ރަންކުލަ ލައިގެން ބޮޑު އަގުގައި ވިއްކާ އެއްޗެއްކަމަށް ރިޕޯޓުތައް ބުނެއެވެ. ޓްރަމްޕްގެ "ޓްރުތު ސޯޝަލް" އެޕްލިކޭޝަން އަޅާފައިވާ މި ފޯނު ގަތުމަށް 600،000 އެއްހާ މީހުން ޕްރީ-އޯޑަރު ކުރިކަމަށް ކުރިން އަޑު ފެތުރުނު ނަމަވެސް، މި ލީކުވި މައުލޫމާތުތަކުން އެނގޭ ގޮތުގައި ހަގީގަތުގައި މި ފޯނު ގަނެފައިވަނީ އެންމެ 30،000 އެއްހާ މީހުންނެވެ.