ކަރަންޓު ސަބްސިޑީ ކަނޑާލުމާ ގުޅިގެން އިއްޔެ ހދ. ކުޅުދުއްފުށީގަ ފިހާރަތައް ބަންދުކޮށް، އިހުތިޖާޖު ކުރުމަށްފަހު މިއަދު ފިހާރަތައް ހުޅުވައިފި ނަމަވެސް ކަރަންޓުގެ އަގުގެ މައްސަލާގައި އެ އަތޮޅު މަކުނުދޫ ބައެއް ފިހާރަތައް މިއަދު ވަނީ ބަންދު ކޮށްފަ އެވެ.
ކުޅުދުއްފުށީ ކައުންސިލްގެ މެމްބަރު މުހައްމަދު އައިމަން "އަވަސް" އަށް މިއަދު ވިދާޅުވީ މިއަދު ހެނދުނު 8:00ގަ ގިނަ ފިހާރަތަކެއް ހުޅުވާފަވާ ކަމަށެވެ. ނަމަވެސް ވިޔަފާރިތައް ހުޅުވީ ހައްލެއް ލިބިގެންތޯ ނުވަތަ ނޫންތޯ ވެސް ދަންނަވަން ނޭނގޭ ކަމަށް އައިމަން ވިދާޅުވި އެވެ.
ކުޅުދުއްފުށީގައި އިއްޔެ މުޒާހަރާ ކޮށްފައި ވަނީ ކަރަންޓް ސަބްސިޑީޒް ކަނޑާލުމުން އެކަމާ ކަންބޮޑުވުން ފާޅުކޮށް ކުޅުދުއްފުށީ ވިޔަފާރިވެރިން ރައީސް އަބްދުﷲ ޔާމީނަށް ފޮނުވި ސިޓީއަށް ޖަވާބެއް ލިބިފައި ނުވާތީ އެވެ. އެ ރަށުގެ 100 އަށް ވުރެ ގިނަ ފިހާރަ އިއްޔެ ބަންދުކޮށް ވިޔަފާރިވެރިން ވަނީ ކައުންސިލް އިދާރާ ކުރިމަތީ އިހުތިޖާޖު ކޮށްފަ އެވެ.
ކުޅުދުއްފުއްޓަކީ ކައިރި އަތޮޅުތަކުގެ އެކި ރަށްރަށުން ވެސް ވިޔަފާރި ކުރަން ގިނަ އަދަދެއްގެ ބަޔަކު ކޮންމެ ދުވަހަކު ޒިޔާރަތްކުރާ، އެ ސަރަހައްދުުގެ ވިޔަފާރީގެ މައި މަރުކަޒެވެ.