ގިނަ އަދަދެއްގެ މީހުން އިންތިޒާރުކުރަމުން އައި ދިރާގުގެ 'ވިން އަ ސްޕީޑްބޯޓު' ޕްރޮމޯޝަންގެ ނަސީބުވެރިޔާ އިއުލާންކޮށްފި އެވެ.
ވީ ކިހިނެއް؟ - އެ ޕްރޮމޯޝަންގެ ނަސީބުވެރިޔާ ހޮވީ އެކަމަށްޓަކައި ހުޅުމާލެ ސެންޓްރަލް ޕާކުގައި ބޭއްވި ފޯރިގަދަ މިއުޒިކް ޝޯއެއްގަ އެވެ.
ތަފްސީލު - ދިރާގު މޮބައިލް އަދި ބްރޯޑްބޭންޑް ކަސްޓަމަރުންގެ މެދުގައި ނެގި ގުރުގައި ނަސީބުވެރިޔަކަށް ހޮވުނީ ހުސައިން ފަޔާޒު، ގއ. ވިލިނގިލި އެވެ. އޭނާއަށް އިނާމެއްގެ ގޮތުގައި ދީފައިވަނީ ޔަމަހާ 175 ހޯސްޕަވަރުގައި އައުޓްބޯޑު ދެ އިންޖީނު އަޅާފައިވާ އަލް ޝާލީ މެރިންގެ މަޖެލަން 32 ލޯންޗެކެވެ.
ގުރުއަތު ނެގުން އިންސާފުވެރިކަމާ އެކު ކުރިއަށް ގެންގޮސް ބެލެހެއްޓުމަށްޓަކައި ދިރާގުން ވަނީ ތާޑް ޕާޓީ އޮޑިޓަރެއްގެ ގޮތުގައި ނެކްސާ މޯލްޑިވްސް އައްޔަންކޮށްފަ އެވެ. އެ ކުންފުނިން ވަނީ ގުރުއަތުގެ ހުރިހާ މަރުހަލާއެއް ކައިރިން ބަލައި ގުރު ނެގި ވަގުތުގައި ވެސް އެ ތަނުގައި ހަރަކާތްތެރިވެފަ އެވެ.
ގުރުއަތުގެ ބައި ޓީވީއެމް އާއި އައިސްޓީވީގެ އިތުރުން ދިރާގުގެ ފޭސްބުކް އާއި ޔޫޓިއުބް ޗެނަލްއިން ވަނީ ލައިވް ވެސްކޮށްފަ އެވެ.
'ވިން އަ ސްޕީޑް ބޯޓް' ޕްރޮމޯޝަންގެ ގުރުއަތު ނަގަން ބޭއްވި ޝޯގައި
އެކި ދިވެހި މިއުޒިކީ ފަންނާނުންގެ ހުށަހެޅުންތައް ވަނީ ދައްކާލާފަ އެވެ. އަދި އެ ޝޯ ކުރިއަށް ދިޔައީ ގިނަ ރަހަތައް ހިމެނޭ ފުޑް ސްޓޯލްތަކާ ވެސް އެކީގަ އެވެ.