ވެރިކަން ލިބިވަޑައިގެންފިނަމަ ދިވެހި ސިފައިންގެ އަސްކަރީ މަރުކަޒެއް ކަމަށްވާ އުތުރު ތިލަފަޅު ހިއްކާ އެތަނުން ދިވެހި ރައްޔިތުންނަށް ގޯއްޗާއި ފްލެޓް ދޫކުރާނެ ކަމަށް ރިޔާސީ އިންތިހާބުގައި އަމިއްލަ ގޮތުން ވާދަކުރައްވަމުން ގެންދަވާ ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު މިހެން ވިދާޅުވީ ގޯއްޗާއި ފްލެޓް ލިބޭ މީހުން ކަމަށް ބުނެ މިސަރުކާރުން އިއުލާންކޮށްފައިވާ ލިސްޓަށް އުމަރުގެ ވެރިކަމެއްގައި ބަދަލު ގެންނަން ވިސްނަވަންތޯ އާންމުން ސުވާލުކުރާތީ އެކަމާ ގުޅޭގޮތުން ސޯޝަލްމީޑިއާގައި ކުރެއްވި ޕޯސްޓެއް ގައެވެ.
އުމަރު ވިދާޅުވީ ސަރުކާރަކުން، ރައްޔިތުންނާ ސިދާ ގުޅުންހުރި މިފަދަ ކަމެއްގައި ގޮތެއް ނިންމާ، އިއުލާންކޮށްފައިވާ ލިސްޓަކަށް ބަދަލު ގެނައުމަކީ ދެން އަންނަ ސަރުކާރަކުން އެއްގޮތަކަށްވެސް ކޮށްގެން ވާނެ ކަމެއް ނޫން ކަމަށެވެ.
"ވީމާ މި ސަރުކާރުން އިއުލާން ކުރައްވާފައިވާ ލިސްޓަށް ބަދަލެއް ނުގެނެސް، ހަމަ އެލިސްޓަށް އެ ގޯތި ތަކާ ފްލެޓް ދޫކުރެވޭނެ އެވެ،" ރައްޔިތުންގެ ސުވާލަށް ޖަވާބު ދެއްވަމުން އުމަރު ވިދާޅުވި އެވެ.
އުމަރު އިތުރަށް ވިދާޅުވީ އޭނާގެ ވެރިކަމެއްގައި އުތުރު ތިލަފަޅު ހިއްކާ، ގޯތި ދޫކުރާނެ ކަމަށެވެ.
"އަޅުގަޑުގެ ވެރިކަމެއްގައި އުތުރު ތިލަފަޅަކީ އިންޑިއާ ސިފައިންގެ ބަދަރަކަށް ނުވާނެ އެވެ،" އުތުރު ތިލަފަޅުގައި އިންޑިއާ ސިފައިން ގާއިމުވެ ތިބި ކަމަށް ދޭހަވާ ގޮތަށް އުމަރު ވިދާޅުވި އެވެ.
ރިޔާސީ އިންތިހާބުގައި ވޯޓުލާން ގާތްވެފައިވާތީ އާއި ރައީސް އިބްރާހީމް މުހައްމަދު ސޯލިހްގެ ރިޔާސީ ދައުރު ނިމެން ތިން މަސް ދުވަހަށް ވެފައިވާތީ އެކަމަށް އިޝާރާތް ކުރައްވާ އުމަރު ވިދާޅުވީ މިހާރު މުއްދަތު އޮތް ގޮތުން މި ސަރުކާރުން ގޯތި ދިނުމަށް ވެފައިވާ ވައުދު ފުއްދުމަށް ދެން ވަގުތު ލިބޭނެ ކަމަށް ފެނިވަޑައިނުގަންނަވާ ކަމަށެވެ.
"އިރާދަކުރެއްވިއްޔާ އެ ވައުދު ފުއްދާދޭނީ އަޅުގަޑެވެ،" ކުރިން ސިފައިންގޭގައި ވެސް މަސައްކަތް ކުރައްވާފައިވާ އުމަރު ވިދާޅުވި އެވެ.