އިންތިހާބީ ރައީސް ޑރ. މުހައްމަދު މުއިއްޒު ހުވާ ކުރައްވާ ދަރުބާރު 17 ނޮވެމްބަރު ވަނަ ދުވަހުގެ ހަވީރު ޖުމްހޫރީ މައިދާނުގައި ބާއްވަން މަޝްވަރާކޮށްފައިވާ ކަމަށް އިންތިހާބީ ރައީސްގެ އޮފީހުގެ ތަރުޖަމާނު މުހައްމަދު ފިރުޒުލް އަބްދުﷲ ހަލީލް ވިދާޅުވި އެވެ.
ވީ ކިހިނެއް؟ - މިއަދު އިންތިހާބީ ރައީސްގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ، އިންތިހާބީ ރައީސްގެ ފަރާތުން އެދިވަޑައިގަންނަވާ ގޮތަށް ހުވާ ކުރުމުގެ ކަންތައް ކުރިއަށް ގެންދިޔުމަށް ރައްޔިތުންގެ މަޖިލީހުގެ އެއްބާރުލުން ލިބޭ ކަމަށެވެ.
ތަފްސީލް - ފިރުޒުލް ވިދާޅުވީ، 17 ނޮވެމްބަރު ދިމާވަނީ ހުކުރު ދުވަހަކާ ކަމަށާއި އިންތިހާބީ ރައީސް މުއިއްޒު ބޭނުންވެވަޑައިގަންނަވަނީ އެ ދުވަހުގެ ހަވީރު ޖުމްހޫރީ މައިދާނުގައި ހުވާ ކުރުމުގެ ރަސްމިއްޔާތު ބޭއްވުމަށް ކަމަށެވެ.
"މިހާތަނަށް މަޝްވަރާ ކުރެވިފައިވަނީ ކުރިން އިންތިހާބީ ރައީސް ވެސް އިޝާރާތް ކުރައްވާފައިވާ ފަދައިން ޖުމްހޫރީ މައިދާނުގައި މި ދަރުބާރު ބޭއްވުމަށް. މިހާރު މަޝްވަރާ ކުރެވިފައިވާ ގަޑިއަކީ 17 ނިވެމްބަރު ވާ ހުކުރު ދުވަހުގެ ހަވީރު ގެ ވަގުތެއްގައި މި ދަރުބާރު ކުރިއަށް ގެންދަން،" ފިރުޒުލް ވިދާޅުވި އެވެ.
އޭނާ ވިދާޅުވީ މޫސުމަށް ބަލައި ފަހަރުގައި ބައެއް ބަދަލުތައް އައުމަކީ އެކަށީގެންވާ ކަމެއް ކަމަށެވެ.
އެނގުން މުހިއްމު - އިންތިހާބީ ރައީސްގެ ހުވާކުރުމުގެ ރަސްމިއްޔާތަށް ވާންޖެހޭ ތައްޔާރީތައް ވަމުންދާކަމަށް ރައްޔިތުންގެ މަޖިލީހުން ވަނީ ބުނެފަ އެވެ.
މިހާރުގެ ރައީސް އަދި ނިމުނު އިންތިހާބުން ނާކާމިޔާބީ އާ ކުރިމަތިވެ ވަޑައިގެންނެވި ރައީސް އިބްރާހިމް މުހައްމަދު ސޯލިހު 2018 ވަނަ އަހަރު ރައީސް ކަމުގެ ހުވާކުރެއްވީ، އޭގެ ކުރިން 2013ގައި ބޭއްވި ރިޔާސީ އިންތިހާބު އެކި ފަހަރު މަތިން ކޯޓުން ބާތިލުކުރުމުން ކުރިމަތިވި ލަސްތަކާ ހުރެ، 17 ނޮވެމްބަރުގަ އެވެ. ނަމަވެސް، ރައީސް ވަނީ، ކުރީގެ ރައީސުންނެކޭ އެއްގޮތަށް، އެ މަނިކުފާނަށް ފަހު ވަޑައިގަންނަވާ ބޭފުޅުން 11 ނޮވެމްބަރުގައި ހުވާކުރެއްވޭނެ ގޮތް ހައްދަވައިދެއްވާނެ ކަމަށް ވިދާޅުވެފަ އެވެ. ރައީސް މިފަހުން ވެސް ވިދާޅުވީ ގާނޫނީ ހުރަހެއް ނެތް ނަމަ، އެކަން އެގޮތަށް ކުރައްވާނޭ ކަމަށެވެ.