ރައީސުންނަށް ހާއްސަކޮށްފައި އޮންނަ ރަށް، ކ. އާރަށަށް މަސައްކަތު މީހުން ހޯދަން އިއުލާނުކޮށްފި އެވެ. ރައްޔިތުން ބިކަ ހާލުގައި ތިއްބާ، ސާޖިދާއަށް ޚިދުމަތް ކުރުމަށް އާރަށަށް ހޯދަށް އިއުލާން ކޮށްފައި ވަނީ 10 މަސައްކަތު މީހުންނެވެ.
އެ ރަށް ބަލަހައްޓާ ޑިފެންސް މިނިސްޓްރީން މިއަދު ކުރި އިއުލާނެއްގައިވާ ގޮތުން އާރަށަށް ހޯދަނީ ޖުމްލަ 10 މަސައްކަތު މީހުންނެވެ.
ގެޒެޓުކުރި އިއުލާނުގައިވާ ގޮތުން އެ މީހުންގެ ވަޒީފާގެ މައިގަނޑު މަސައްކަތްތަކަކަށް ވާނީ، އެ ރަށުގައިވާ އެންމެހާ އިމަރާތްތަކާއި ގޯތިތެރެ ސާފުކޮށް ބެލެހެއްޓުމާއި، މަރާމާތުގެ މަސައްކަތްތަކާއި، ފާހާނާތަކާއި ޖަންކްޝަންތައް ސާފުކޮށް ބެލެހެއްޓުމެވެ. މީގެއިތުރުން ގަސްތައްކޮށާސާފުކޮށް ގަސްތަކަށް ފެންދީ ބެލެހެއްޓުމާއި ވެހިކަލްތައް ސާފުކޮށް ބެލެހެއްޓުންވެސް މަގާމުގެ މަސްއޫލިއްޔަތުތަކުގެ ތެރޭގައިވެ އެވެ.
އެ މަގާމަށް ކުރިމަތިލުމުގެ ޝަރުތަކީ އަސާސީ ތައުލީމު ހުރުމާއި ގިނަ ވަގުތު މަސައްކަތުގައި އުޅުމަށް ސިއްހަތު ތަންދިނުމެވެ. ކުރިމަތިލުމުގެ ފުރުސަތު ސެޕްޓެމްބަރު 26، ގެ މެންދުރުފަހު 2:00 އާ ހަމައަށް ވަނީ ހުޅުވައިލައިފަ އެވެ.
އާރަށު މަސައްކަތު މީހުންނަށް މުސާރައާއި އިނާޔަތްތަކުގެ ގޮތުގައި މަހަކު ޖުމްލަ 7،500ރ. ގެ އިތުރުން އިތުރު ގަޑީގެ ފައިސާ ލިބޭނެ އެވެ.
އާ ރަށަކީ ރައީސުލް ޖުމްހޫރިއްޔާއާއި އެމަނިކުފާނުގެ އާއިލާ ޗުއްޓީ ހޭދަކުރެއްވުމަށް ތައްޔާރުކޮށް، ސިފައިން ބަލަހައްޓާ ރަށެކެެވެ. ކުރީގެ ރައީސް މައުމޫނު އަބްދުލް ގައްޔޫމުގެ ޒަމާނުން ފެށިގެން އެގޮތަށް ބޭނުންކުރަމުން އައި އާރަށް، ކުރީގެ ރައީސް އަބްދުﷲ ޔާމީނުގެ ވެރިކަމުގައި އިތުރަށް ތަރައްގީކޮށް، ބައެއް އިމާރާތްތައް އިތުރުކުރި އެވެ.