މާލޭގެ ފުރުޤާން މިސްކިތުގައި ހުރި މުސްހަފުތައް އުކާލައި، ކަރަންޓު ބޯޑުތަކާއި އިސްކުރުތައް ހަލާކުކޮށްލާއި ބޮޑެތި ގެއްލުންތަކެއް ދީފިއެވެ.
މި މައްސަލައާ ގުޅިގެން ޝެއިޚް އާދަމް ނިޝާން ވިދާޅުވެފައިވަނީ، މިކަން ކޮށްފައިވަނީ "ބުއްދިފިލާ ގޮސްފައިވާ" ޒުވާނެއް ކަމަށެވެ. އަދި މީގެ ކުރިންވެސް މިފަދަ ޢަމަލުތައް ހިންގާފައިވާ ކަމަށް ޝެއިޚް ވިދާޅުވިއެވެ.މި ހާދިސާއާ ގުޅިގެން ޝެއިޚް އާދަމް ނިޝާން ވަނީ މިސްކިތްތަކުގައި ކެމެރާ ހަރުކޮށްފައި ހުރުމުގެ ފައިދާއަކާމެދު ސުވާލު އުފައްދަވާފައެވެ. މިފަދަ ހާދިސާތައް ހިނގާއިރުވެސް ކެމެރާތަކުން ފެންނަ މަންޒަރުތަކުގެ ބޭނުން ނުހިފޭކަން ފާހަގަކުރެއްވިއެވެ.ފަހަކަށްއައިސް މިފަދަ މައްސަލަތައް އިތުރުވަމުންދާކަން ފާހަގަކުރެވެއެވެ. ނަމަވެސް، ގިނަފަހަރު މިފަދަ މައްސަލަތައް ނިންމާލަނީ ނަފްސާނީ ބަލިމަޑުކަމެއް ހުރި މީހުން ކުރާ ކަމެއްގެ ގޮތުގައި ކަމަށް ބުނެއެވެ. މިކަމާ ގުޅިގެން އާންމުން ވަނީ ކަންބޮޑުވުން ފާޅުކޮށްފައެވެ.ފުލުހުންގެ ފަރާތުން މި މައްސަލަ ތަޙުޤީޤުކުރަމުންދާ ކަމަށާއި، އިތުރު މަޢުލޫމާތު ލިބުމުން ހިއްސާކުރާނެ ކަމަށް ބުނެފައިވެއެވެ.