ހުޅުމާލެ ފޭސް ދެއަކުން ގެއްލިގެން އިއުލާންކުރި 14 އަހަރުގެ އަންހެން ކުއްޖާ އަމިއްލައަށް އާއިލާއާ ހަވާލުވެއްޖެއެވެ. ފުލުހުން މިއަދު ކުރި އިއުލާނެއްގައި ވަނީ ރ. ދުވާފަރު /ސިކްސް ސެންސް، ޝިބާ ރަޝީދު (14އ) ގެއްލިގެން ހޯދަމުން އަންނަ ކަމަށް ބުނެފައެވެ. ފުލުހުން ބުނީ މިދިޔަ ހުކުރު ދުވަހުގެ 05:55 އެހާކަންހާއިރު ގެއިން ނުކުމެގެން ދިޔަގޮތަށް އެ ކުއްޖާއަށް ވީނުވީއެއް ނޭނގި ގެއްލިފައިވާކަމަށް އާއިލާގެ ފަރާތުން ރިޕޯޓްކޮށްފައިވަނީ ހަމަ އެ ދުވަހު ކަމަށެވެ. އެކަމުގެ މައުލޫމާތު ފުލުހުންނަށް ލިބުމާއެކު ކަމާގުޅުންހުރި ފަރާތްތަކާ އެކަމުގެ މައުލޫމާތު ހިއްސާކޮށް, ކުއްޖާ ހޯދުމުގެ މަސައްކަތް ފަށާފައިވާ ކަމަށް ފުލުހުން ބުންޏެވެ. އެ ކުއްޖާ ހޯދުމަށް އެހާތަނަށް ކުރެވުނު މަސައްކަތުން ފެނިފައިނުވާ ކަމަށް، މިއަދު މެންދުރު ފުލުހުން ބުންޏެވެ. https://sun.mv/214640 ފުލުހުން ދެންމެ މީޑިއާތަކާ ހިއްސާކުރި މެސެޖެއްގައި ވަނީ، މިރޭގެ ވަގުތެއްގައި އެ ކުއްޖާ އަމިއްލައަށް ގެއަށް ގޮސްފައިވާ ކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ. އެ ކުއްޖާގެ ހާލު ރަނގަޅު ކަމަށް ވެސް އެ މުއައްސަސާއިން ބުންޏެވެ. ކުޑަކުދިން ވެސް ހިމެނޭ ގޮތަށް ބައެއް އާއްމުން ގެއްލިގެން ދޭތެރެދޭތެރެއިން ފުލުހުން އިއުލާން ކުރެއެވެ. މީޑިއާގައި އެ އިއުލާން ކުރާތާ ކުޑަ ވަގުތު ކޮޅެއްގެ ތެރޭގައި އެ މީހަކު, އާއްމުކޮށް ފެނެއެވެ.