ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުގެ މަގާމާ ހަވާލުވެވަޑައިގެންނެވީ، އެޗްޑީސީއަށް ގެންނަންޖެހޭ އިސްލާޙްތައް ގެންނެވުމަށް ކަމަށާ، އަދިވެސް ބޭނުންވަނީ އެ ކުންފުންޏަށް ޚިދުމަތްކުރައްވަން ކަމަށް، އެމްޑީ މުހައްމަދު މައުރޫފް ޖަމީލް ވިދާޅުވެއްޖެއެވެ. 
މީގެ ހަތް މަސް ދުވަސްކުރީން ޑިސެންބަރު 22, 2024 ގައި އެޗްޑީސީގެ އެމްޑީގެ މަގާމަށް އައްޔަނު ކުރެއްވި މައުރޫފް, މަގާމުން ރިޔަޓާ ކުރައްވަން ނިންމަވާފައިވާކަން މުވައްޒިފުންނަށް އަންގަވާފައިވާއިރު، އެކަމާއި ގުޅިގެން ބައެއް ފަރާތްތަކުން އަންނަނީ އެކި ގޮތްގޮތަށް ވާހަކަތައް ފަތުރަމުންނެވެ. 
އެހެންކަމުން އެހާ ކުޑަ މުއްދަތަކަށް މަގާމުގެ މަސްއޫލިއްޔަތު ތަކާއި ހަވާލުވެވަޑައިގެންނެވި ސަބަބު ހާމަކުރައްވައި، ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން މައުރޫފް ވިދާޅުވީ، އެމްޑީ ކަމުގެ މަގާމާއި ހަވާލުވެވަޑައިގެންނެވުމަށް ރައީސް ޑރ މުޙައްމަދު މުޢިއްޒު އެދިލެއްވިއިރުވެސް ހުންނެވީ ސެމީ ރިޓަޔަރމަންޓްގައި ކަމަށެވެ. 
ގާތްގަނޑަކަށް ސެމީ ރިޓަޔަރ ކޮށްގެން ހުއްޓާ ރައީސް މި އާދަޔާ ޚިލާފް ފުރުސަތު މި ދެއްވީ. އަޅުގަނޑަކީ ހުޅުމާލެ މީގެ 24 އަހަރުކުރިން އުފެއްދުމުގެ މަސައްކަތުގައި އުޅުނު މީހެއް. އެހެންވީމާ 24 އަހަރުފަހުން އަޅުގަނޑަށް ހުޅުމާލޭގެ އެޗްޑީސީގެ އެމްޑީގެ މަގާމު ގަބޫލު ކުރައްވާނަންތޯ އެއްސެވީމަ، އަޅުގަނޑުގެ ފުރަތަމަ ހިތަށް އެރީ ވަރަށް ޔުނީކް ފުރުސަތެކޭ، މި ފުރުސަތު ދޫކޮށްލައިގެން ނުވާނެ އޭ
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު މައުރޫފް ޖަމީލް
މިއާއެކު މައުރޫފް ވިދާޅުވީ، އެމްޑީގެ މަގާމާ ހަވާލުވެވަޑައިގެންނެވިއިރުވެސް އެއީ ވަރަށް ބުރަ މަސައްކަތެއްކަން އެނގިވަޑައިގަންނަވާ ކަމަށާ، އަދި އެމަގާމުގައި އެހާ ގިނަ ދުވަހު ހުންނެވުމުގެ ނިޔަތެއް އޭރުވެސް ނެތް ކަމަށެވެ. އެހެން ނަމަވެސް ކުޑަ ދުވަސް ކޮޅަކު ނަމަވެސް ޚިދުމަތް ކުރައްވަން ބޭނުންވެވަޑައިގަންނަވާތީ މަގާމާ ހަވާލުވެވަޑައިގެންނެވީ ކަމަށް އޭނާ ވިދާޅުވިއެވެ. 
މައުރޫފް ވިދާޅުވީ ކުޑަ ދުވަސްކޮޅަކަށް ނަމަވެސް، މަގާމާއި ހަވާލުވެވަޑައިގެން ހުޅުމާލޭގެ ލޭންޑް ޔޫސް ޕްލޭންގެ މަސައްކަތާއި، އެޗްޑީސީގެ ހިންގުން ހަރުދަނާ ކުރުމުގެ މަސައްކަތް ކުރެވި ގިނަ ކަންކަން ހާސިލް ކުރެއްވުނުކަމަށެވެ. 
މީގެ އިތުރުން ރިޓަޔާ ކުރެއްވުމުގެ އުމުރު ކައިރިވެފައި ވަނިކޮށް އެފަދަ މަގާމަކާ ހަވާލުވެވަޑައިގެންނެވި ސަބަބާއި ގުޅޭ ގޮތުން ވާހަކަ ދައްކަވަމުން މައުރޫފް ވިދާޅުވީ، ކުޑަ މުއްދަތަކަށް ނަމަވެސް ޚިދުމަތް ކުރައްވައި ކަންކަން އިސްލާޙް ކުރައްވަން ބޭނުންވެވަޑައިގެންނެވި ކަމަށެވެ. 
މިކަމަށް އައުމުގެ އެއް ސަބަބަކީ، ކަމުގެ މުހިންމު ކަމާއި، އެޗްޑީސީއަށް އިސްލާހުތަކެއް ގެނައުމުގެ ބޭނުމުގައި. ރައީސް އަކު ރިކުއެސްޓް ކުރެއްވީމާ އެ ބަލައިގަންނަން ޖެހޭނެ. އަދި ކިތަންމެ ކުޑަ ދުވަސްކޮޅަކަށް ވިޔަސް ކޮށްދެވޭނެކަންކަން ހުރިކަން ޔަގީންވާތީ. މިހާރުވެސް އަޅުގަނޑު ރިޓަޔާ ކޮށްފައި އަނެއްކާވެސް ބޭނުންވަނީ އެޗްޑީސީގެ އެޑްވައިޒާ ނޫނީ ކޮންމެސް މަގާމެއްގައި ކޮންޓިނިޔު ކުރަން. ހަމަސް ދުވަހަށް ނަމަވެސް ޓާގެޓް ކޮށްފައި ހުރިކަންކަން ކުރެވޭނެ ނަމަ ކީއްވެތޯ ނުކުރަންވީ؟
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު މައުރޫފް ޖަމީލް
މައުރޫފަށް އެޗްޑީސީގެ ހިންގެވުން ހަވާލުކުރެެއްވީ ކުރިން އެމަގާމުގައި ހުންނެވި ފަޒުލް ރަޝީދު މަގާމުން އިސްތިއުފާދެއްވުމާއި ގުޅިގެންނެވެ.
ފަޒުލް އިސްތިއުފާ ދެއްވީ ގެދޮރުވެރިޔާ ސްކީމާއި ގުޅޭ ބޮޑެތި ހިޔާނާތްތަކެއްގެ ތުހުމަތު ކުރެވިގެންނެވެ.