ދުނިޔޭގެ އެންމެ މަގުބޫލު ސޯޝަލް މީޑިއާ ޕްލެޓްފޯމް، ޓިކްޓޮކް އިން، އެ ކުންފުނީގެ ކޮމިއުނިޓީ ގައިޑްލައިންސްއަށް މުހިންމު ބަދަލުތަކެއް ގެންނަން ނިންމައިފިއެވެ. މިއަހަރުގެ ސެޕްޓެމްބަރު މަހުގެ 13ވަނަ ދުވަހުން ފެށިގެން އަމަލުކުރަން ފަށާ މި އައު އުސޫލުތަކުގެ ސަބަބުން، ލައިވް ކޮންޓެންޓް އުފައްދާ ފަރާތްތަކަށާއި، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުފައްދާ ކޮންޓެންޓަށް އަދި ޔޫޒަރުންނަށް ފެންނަ ކޮންޓެންޓަށް ބޮޑެތި އަސަރުތަކެއް ކުރާނެއެވެ. އައު ގައިޑްލައިންތަކުގެ ދަށުން، ޓިކްޓޮކް ލައިވް ހުށަހަޅައިދޭ ފަރާތްތަކުގެ ޒިންމާތައް ވަނީ އިތުރުކޮށްފައެވެ. އެގޮތުން، ލައިވް ސެޝަނެއްގައި ހިނގާ ކޮންމެ ކަމެއްގެ ޒިންމާ، އެއީ ތާޑް ޕާޓީ ޓޫލްތައް ބޭނުންކޮށްގެން ހިނގާ ކަމެއް ކަމުގައި ވިޔަސް، ލައިވް ކުރާ ފަރާތުން އުފުލަންޖެހޭނެއެވެ. މީގެ އިތުރުން، ވިޔަފާރީގެ މަގުސަދުގައި ހުށަހަޅާ ކޮންމެ ކޮންޓެންޓެއްގައި ކަނޑައެޅިގެން އެކަން ހާމަކުރުމަކީ މަޖުބޫރު ކަމެއްގެ ގޮތުގައި ވަނީ ހަމަޖައްސާފައެވެ. ވިޔަފާރި ކޮންޓެންޓާ ގުޅޭގޮތުން ގެނައި އެންމެ ބޮޑު އެއް ބަދަލަކީ، ޓިކްޓޮކް ޝޮޕްގެ ޚިދުމަތް ލިބެން ހުންނަ މާކެޓްތަކުގައި، ޕްލެޓްފޯމުން ބޭރުން މުދާ ގަތުމަށް ބާރުއަޅާ ކޮންޓެންޓްތަކުގެ ފެނުން ދަށްކުރާނެކަމަށް އަންގާފައިވާ އެންގުމެވެ. މިއީ ޓިކްޓޮކްގެ އަމިއްލަ ވިޔަފާރި މާކެޓްޕްލޭސްއަށް އިސްކަންދިނުމުގެ ސިޔާސަތެއްކަން އެނގެއެވެ. މި ބަދަލުތަކާއެކު ޔޫޒަރުންގެ ތަޖުރިބާ ވެސް އިތުރަށް ޚާއްސަވާނެއެވެ. ކުރިއާ ޚިލާފަށް، ކޮންމެ ޔޫޒަރަކަށް ފެންނަ ސާޗް ނަތީޖާތަކާއި ކޮމެންޓް ސެކްޝަންގައި ކޮމެންޓްތައް ފެންނަ ތަރުތީބު ވެސް ތަފާތުވާނެއެވެ. މިކަން ނިންމާނީ ޔޫޒަރުން ކުރިން ބަލާފައިވާ ވީޑިއޯތަކާއި، ކުރާ ސާޗްތަކާއި، ދޭ ލައިކްތަކުގެ މައްޗަށް ބިނާކޮށެވެ. އޭއައި ބޭނުންކޮށްގެން އުފައްދާ 'ޑީޕްފޭކް' ކޮންޓެންޓާ ގުޅޭ އުސޫލުތައް ވެސް ވަނީ ލުއިކޮށްފައެވެ. ކުރިން، މަޝްހޫރު ފަރާތްތަކުން އެއްޗަކަށް ތާއީދުކުރާ ކަމަށް ދައްކުވައިދޭ ވީޑިއޯތައް މަނާކޮށްފައި އޮތް ނަމަވެސް، އެ އުސޫލު މިހާރު ވަނީ އުނިކޮށްފައެވެ. އޭގެ ބަދަލުގައި، އާންމު މަސްލަހަތާ ގުޅޭ ކަންކަމުގައި އޮޅުވާލާ ނުވަތަ މީހުންނަށް ގެއްލުން ހުރި ކޮންޓެންޓް މަނާކުރާނެ ކަމަށް އާންމުކޮށް ބަޔާންކޮށްފައިވެއެވެ. ފާހަގަކޮށްލެވޭ އަނެއް ކަމަކީ، ޓިކްޓޮކުން އެ ޕްލެޓްފޯމް ސިފަކުރާ ގޮތަށް ގެނެސްފައިވާ ބަދަލެވެ. ކުރިން ޕްލެޓްފޯމަކީ "ސަލާމަތްތެރި، އިތުބާރު ހުރި، އަދި ދިރުން ހުރި" ތަނެއްގެ ގޮތުގައި ސިފަކޮށްފައި އޮތް ނަމަވެސް، އައު ގައިޑްލައިންތަކުން "އިތުބާރު ހުރި" މި ލަފުޒު ވަނީ އުނިކޮށްފައެވެ. މިހާރު ޓިކްޓޮކް ސިފަކުރަނީ "އެންމެންނަށްވެސް ސަލާމަތްތެރި، މަޖާ، އަދި އުފެއްދުންތެރި" ތަނެއްގެ ގޮތުގައެވެ.