އެމެރިކާގެ ރައީސް ޑޮނަލްޑް ޓްރަމްޕާއި އިޒުރޭލުގެ ބޮޑުވަޒީރު ބެންޖަމިން ނަތަންޔާހޫ އަދި ޔޫރަޕުން މަސައްކަތް ކުރަނީ އީރާނުގެ ރައްޔިތުންގެ މެދުގައި ރުޅިވެރިކަން އުފައްދައި، އެތެރޭގައި ހަމަނުޖެހުން ހިންގުމަށް ކަމަށް އީރާނުގެ ރައީސް މަސޫދު ޕެޒެޝްކިއަން ވިދާޅުވެއްޖެ އެވެ.
"އެ މީހުން މަސައްކަތް ކުރީ މައުޝޫމް އެތައް ބަޔަކު މަގުތަކަށް ނެރެ، ގައުމު ބައިބައިކުރުމަށް ހިތްވަރު ދިނުމަށް، އަދި މީސްތަކުންގެ މެދުގައި ފިތުނަވެރިކަމާއި ރުޅިވެރިކަން އުފައްދައި ބައިބައިވުން އުފައްދަން،" ޓީވީ މެދުވެރިކޮށް އިއްޔެ ވާހަކަ ދައްކަވަމުން ޕެޒެޝްކިއަން ވިދާޅުވި އެވެ.
"އާންމު މުޒާހަރާތަކުގައި އެމީހުން ހަތިޔާރެެއް ނުނަަގާ، ސިފައިންނެއް ނުމަރާ، އެމްބިއުލާންސްތަކާއި މާރުކޭޓުތަކުގައި އަލިފާން ރޮލެއް ނުކުރޭ. އެފަދަ މުޒާހަރާގެ ބައިވެރިންނާ އެކު އިށީނދެ، އެ މީހުންގެ ކަންބޮޑުވުންތައް އަޑުއަހައި، އެ މީހުންނަށް ހައްލު ހޯދައިދޭން ޖެހޭ. އަޅުގަނޑުމެން މިތިބީ އަޑުއަހަން،" އޭނާ ވިދާޅުވި އެވެ.
ޕެޒެޝްކިއަން ވިދާޅުވީ އެންމެ ފަހުން ކުރި މުޒާހަރާތަކަކީ "އެންމެންނަށް ވެސް އެނގޭ ގޮތުގައި، ހަމައެކަނި އިޖްތިމާއީ މުޒާހަރާއެއް ނޫން" ކަމަށެވެ.
އަދި އޭނާ ވިދާޅުވީ ބޭރުގެ ބާރުތަކުން މަސަައްކަތް ކުރީ "އަޅުގަނޑުމެންގެ ހުރި މައްސަލަތަކުގެ ނާޖާއިޒު ފައިދާ ނަގައި، މީހުން ރުޅިގަދަކޮށް، މުޖްތަމައު ބައިބައިކުރުމަށް ކަމަށެވެ.
އީރާނުގެ ރަސްމީ ފަރާތްތަކުން ވެސް ގަބޫލު ކުރާ ގޮތުގައި އެ މުޒާހަރާތަކުގައި އެތައް ހާސް ބަޔަކު ވަނީ މަރުވެފަ އެވެ. އަދި ބައެއް ފަރާތްތަކުން ބުނާ ގޮތުގައި އެ އަދަދު އުޅޭނީ 3،000 އަށް ވުރެ މަތީގަ އެވެ. ނަމަވެސް އޭގެ ތެރެއިން ގިނަ މީހުންނަކީ ސަލާމަތީ ބާރުތަކުގެ މީހުން ނުވަތަ މަންޒަރު ބަލަން ނުކުތް މީހުން ކަމަށް ރަސްމީ ފަރާތްތަކުން ބުނެ އެވެ.
އިންސާނީ ހައްގުތަކަށް ވަކާލާތު ކުރާ ޖަމާއަތްތަކުން ބުނާ ގޮތުގައި މަރުވި މީހުންގެ އަދަދު އެއަށް ވުރެ މާ ބޮޑުވާނެ އެވެ.
މިދިޔަ ހޯމަ ދުވަހުން ފެށިގެން އެމެރިކާގެ ނޭވީ އުޅަނދުތައް ވަނީ މެދުއިރުމަތީގެ ކަނޑުގެ ސަރަހައްދަށް ވަދެ އެވެ. އަދި ޓްރަމްޕް ވިދާޅިުވީ ބޭނުންވާ ކޮންމެ ގަޑިއަކު އީރާނަށް ހަމަލާ ދޭން ތައްޔާރަށް އޮތް ކަމަށެވެ.
އީރާނުގެ ހާރިޖީ ވަޒީރު ޢައްބާސް އަރަގްޗީ ވިދާޅުވީ އެމެރިކާއާ އެކު އިންސާފުވެރި މަޝްވަރާތަކަށް އީރާން ތައްޔާރަށް އޮތް ކަމަށެވެ. އޭނާ ވިދާޅުވީ އީރާން އޮތީ މަޝްވަރާތަކުގައި ކުރިއަށް ދިއުމަށް ކަމަށެވެ. ނަމަވެސް އެ މަޝްވަރާތައް ވާން ޖެހޭނީ ބިރުދެއްކުމުގެ ތެރެއިން ކުރެވޭ މަޝްވަރާތަކަކަށް ނޫން ކަމަށެވެ. 
އީރާނުގެ އިންޓީރިއާ މިނިސްޓަރާއި އީރާނުގެ އޮފިޝަލުންނާ ދެކޮޅަށް ދަތިކުރުމުގެ ފިޔަވަޅު އަޅާނެ ކަމުގެ އިންޒާރު އެމެރިކާ އިން ވަނީ ދީފަ އެވެ.