"ރަމަޟާންމަހުގެ ވަގުތުތައް ގިނައިން ހޭދަކުރެވެނީ ޓީވީ ސީރީސް، ސޯޝަލްމީޑިއާފަދަ މުނިފޫހިފިލުވުމާއި، ކުޅިވަރާއި، ތަފާތު ވައްތަރުގެ ކާ އެއްޗެހި ތައްޔާރުކޮށް ސުފުރާމަތި ފުރުން ކަމަށް ވަންޏާ ރޯދަމަހުގެ މަގުސަދު ހާސިލުވާނެހެއްޔެވެ؟ ރަމަޟާންމަހު ބަލަންވީ ހެޔޮއަމަލުތައް ގިނަކޮށް ތައުބާވެ ފާފަ ފުއްސެވުން އެދިއެވެ. ތިބާއަށް ދެއްވި ނިއުމަތަށް ޝުކުރުވެރިވެ އަނެއް ރަމަޟާންމަސް ލިބުމަށް އެދި ދެންނެވުމުގައެވެ. އެއީ ދުނިޔެ ދޫކޮށް ކަށްވަޅުގައިވާ އެތައްބަޔެއްގެ އެދުމެވެ. ފުރާނަ ގެންދެވުމުގެ ކުރިން ތިބާގެ ނަފުސް އިސްލާހުކުރުމަށް ވަގުތު ލިބެއެވެ.<"އަބޫބަކުރު އައްތަރާބުލްސީ> *** "ނަރުސް ކުއްޖާ އޭނަގެ ޓެމްޕްރޭޗަރ ބަލައިލުމަށްފަހު ކަންބޮޑުވެފައިވާގޮތަކަށް ބަލައިލިއެވެ. "ހުން އެބަހުރި.." "ވަޓް؟"މިނާހްގެ ސަމާލުކަން ވަގުތުން ލިބުނެވެ."ކިހާވަރަކަށް؟" "37.9" އޯ......." "އަނެއްކާ ވޫންޑް އިންފެކްޓްވީ؟" ހަޔާ ކަންބޮޑުވިއެވެ. އޭނަގެ އަތުން ނާރު ނުފެނިގެން އިންޖެކްޝަންޖަހަން ހަދައިގެން ހާދަ ވޭނެއްގައި އުޅެވިއްޖެއެވެ. ޑޮކްޓަރަކަށްވިޔަސް އޭނައަކީ ކުޑައިރުއްސުރެ "ސިރިންޖް ފޯބިއާ" ހުންނަ ކުއްޖެކެވެ. ނަމަވެސް މިފަހަރު ދިމާވި އިމްތިހާނުން ކެތްތެރިކަމުގެ އިންތިހާއަށް ކެތްތެރިވާން މަޖުބޫރުވިއެވެ. އެ ވޭނާއި ތަދާއި ކުރާ ހަގުރާމައިން ސަލާމަތްވެ އަމިއްލަ ކޮޓަރީގެ މިނިވަން މާހައުލަށް ނޭވާލާން ބޭނުމެވެ. މިތާގައި އޮވެގެން އޭނަގެ ސިކުނޑި ހާސްވަނީއެވެ. "އެހެން އިތުރު އުދަގުލެއްނުވޭ؟"މިނާހް އެހިއެވެ. "ކުޑަކޮށް ގައިގާ އެބަރިއްސާ....ކަރުތެރެއަށް އުދަގޫވޭ..ހީކުރީ ދޮންތަ ގެނައި އަނބު ޖޫސް ފިނިވީމަކަމަށް..އެކަމަކު ވައިރަލް ފީވާއަކަށް ވާނީ...." "ވެދާނެ......އަދި ފީވާ ހަމަޔަކަށް އެޅުނީމަ މިކޮޅުން ޑިސްޗާޖްކުރެވޭނީ...ޑޮކްޓަރ އިރްފާންއާއި ވާހަކަދައްކައިލާނަން..." "ނޫން ނޫން...މިހާރު މިތާ މާ ދުވަސްވެއްޖެ......އައިމް ޑެޑް ޓަޔަޑް..ޕްލީޒް..."ހަޔާގެ ލޯ މިނާހްގެ މޫނަށް ހުއްޓުނެވެ. "ލިސެން ހަޔާ. އަަހަންނަށް އެކަނި ޑިޒިޝަނެއް ނުނެގޭނެ...ހަޔާގެ އަސްލު ޑޮކްޓަރަކީ އިރްފާން...ސޯ....އޭނަ ރިކޮމެންޑް ކޮށްފިއްޔާ ޑިސްޗާޖްކޮށްލަދޭނަން އޯކޭ؟" ނަރުސްކުދިން ނުކުމެގެން ދިޔުމުން މިނާހް ހިނިތުންވެލިއެވެ." އޭރު ކޮން އާޔަތެއް ކިޔަވައިގެން އިމޯޝަނަލް ވީ؟" އޭނަ ހިންދިރުވައިލިއެވެ. ބަލިމީހަކާއި ޑޮކްޓަރެއްގެ ގުޅުމުން ބޭރަށް ދަނީހެން ހީވިއެވެ. ނޫނެކެވެ. އެހެނެއްނުވާނެއެވެ. މިނާހް ހިތްހެޔޮކަމުން ހަގީގަތް އެނގެން ބޭނުންވީއެވެ. އޭނައަށް ނޭގުނަސް އެވަގުތު މޫނުމަތިން ހިތްހަލާކު އަސަރުތަކެއް މިނާހްއަށް ފެނުނީކަމުގައި ވެދާނެއެވެ. ހުރިހާ ޚިޔާލުތައް އެއްކިބާކޮށްފައި އޭނަ ގުރުއާން ހުޅުވިއެވެ. މީހަކަށް އެންމެ އާޔަތެއްގެ މާނަ ކިޔައިދިނަސް އެއީ ލިބޭނެ ސަވާބެކެވެ. އޭނަ ބަގަރާތް ސޫރަތުގެ އެ އާޔަތް ކިޔާދިނެވެ. "ކެތްތެރިކަމާއި ބެހޭގޮތުން ދޯ..ބިއުޓިފުލް ވާސް...ވަރަށް ޓަޗިން...ބުނާނެ އެއްޗެއްވެސް ހަމަ ނޭގޭ............." އެ އާޔަތުގެ މާނަ ފަހުމްވުމާއެކު ހަޔާ މަޚުރަޖުން އާޔަތް ކިޔެވިއިރު ފުރިހަމަކަމުން ހައިރާންވެ އަންތަރީސްވިއެވެ. ސިކުނޑީގައި އެ ތަންކޮޅު ރައްކާކުރެވުނެވެ. ހަޔާއަށްވެސް ނޭގި ދެކެވެން ފެށީ ﷲގެ ވަހީބަސްފުޅުތަކުގެ ފުރިހަމަކަމާއި އެ އާޔަތްތަކަކީ ހަޔާތުގެ ކޮންމެފަދަ ހިތާމައެއްގައިވެސް އޭނަގެ ހިތުގެ ޝިފާއަށްވެފައިވާކަމަށެވެ. "ﷲގެ ވަހީބަސްފުޅުވީމަ. އިންސާނުން އެންމެން މަސައްކަތްކުރިޔަސް މިފަދަ އެންމެ އާޔަތެއްވެސް ލިޔާކަށް ނޭގޭނެ..ކޮންމެ ވޯޑަކީ މިރެކްލްއެއް..." މިނާހްވެސް ގަޔާވެފައި އެވާހަކައިގާ ބައިވެރިވި މިނިޓްކޮޅަށްފަހު އަނެއްކާ ހަޔާ އެދުނީ ގެއަށް ފޮނުވައިލުމަށެވެ. އޭގެ ސަބަބެއް ނުބުނެ ގެއަށް އެހާވަރުން ދާން އުޅުމުން މިނާހްގެ ހިތަށް އުދަގޫތަކެއްވިއެވެ. ނަމަވެސް އޭނަވެސް ވާޖިބު އަދާކުރިއެވެ. ޑޮކްޓަރ އިރުފާންއަށް ގުޅާފައި ވާހަކަދެއްކުމުްނ ހަޔާ ގެއަށް ފޮނުވައިލަން އެއްބަހެއްނުވިއެވެ. ކިއުއެކްސްއަށް ޓެސްޓްކުރަންވެސް އެދުނެވެ. މިނާހް ޑޮކްޓަރ އިރްފާންގެ އިރުޝާދު ކިޔާދިނުމުން ހަޔާ އަށް ވިސްނައިލަން މަޖުބޫރުވިއެވެ. ޑޮކްޓަރުންގެ ލަފާއާއި ދެކޮޅަށް ގެއަށް ގޮސްގެން އަނެއްކާ ދޮންތަމެންނަށް މި ހުންގަނޑު ޖެހިއްޖެއްޔާ ވާނީ ކިހިނެއްހެއްޔެވެ؟ އަދިވެސް އެ އުޅެނީ ބަލިން އެއްކޮށް ރަގަޅުނުވެގެންނެވެ. ދޭތެރެއަކުން ގަދަޔަށް ކެއްސާ ވަރުބަލިވެފައެވެ. އަޔާޝް އަލުން މިކޮޓަރިއަށް ނާންނާނެކަމަށް ހިތަށް ޔަގީންކޮށްދީފައި ހަޔާ އެއްބަސްވިއެވެ. ނަމަވެސް އޭރުވެސް ހިތް ބިރުގަންނަނީއެވެ. މިނާހް އާއި ދުރަށް ދާންވެސް ހިތް އެދެނީއެވެ. އޭނައަށް މި އެރުނީ ކޮންފަދަ އުދަގޫ ނަވަކަށް ހެއްޔެވެ؟ *** މިނާހް ކޮޓަރިއަށް ވަދެފައި އެހެން ދުވަސްތަކާއި ޚިލާފަށް މިއުޒިކް އަޑުއަހައިލަން ބޭނުމެއްނުވިއެވެ. ޚިޔާލަށް އަންނަންފެށީ ހަޔާއާއި ދެކެވުނު ވާހަކަތަކެވެ. އެފަދަ އަޅުވެރި ކުއްޖަކާއި ދެކެވުނު އެންމެ ވާހަކަކޮޅަކުން ނަމާދާއި ގުރުއާނަށް ޝައުގުވެރިވެވުނެވެ. ނަމާދުކޮށްގެން ކުރާ ދުއާ އިޖާބަވާވާނެ ކަމަށް ހަޔާ ބުނުމުން ހިތަށް ފިނިކަމެއް ލިބުނެވެ. އޭނަ ވުޟޫކޮށްލުމަށްފަހު ނަމާދުކުރަން ފެށިއިރު އަލްހަމްދު ފިޔަވާ އެހެން ސޫރަތެއް ކިޔަވަން ނޭގުނެވެ. ހަޔާގެ ފަރާތުން ދަސްވި އާޔަތް ސިކުނޑީގައި ލިޔެވިފައިވާކަން ހަނދާނަށް އައެވެ. އެ އާޔަތް ކިޔެވުމަށްފަހު ނަމާދުކޮށް ނިމިގެން ދުޢާކުރަން އިނދެވުނީ ލޯ މަރާލައިގެންނެވެ. ގެއްލިފައި އިންވަރުން ކޮޓަރިއަށް މީހަކު ވަންކަމެއްވެސް ނޭގުނެވެ. "ވާއު..."އަޔާޝްގެ އަޑަށް އޭނަ އަވަހަށް ތެދުވުނެވެ."ގަބޫލުކުރަން ދަތި......" މިނާހް ލަދުގަންނަގޮތްވިއެވެ. ވައްކަމެއް ކުރަން އުޅެނިކޮށް ފަޅާ އެރުމުން ކުރާނެ އިހުސާސްކުރެވުނެވެ. މޫނަށް ރަތްކުލަ ފާއްދައިލިއެވެ. "ނަމާދުކުރާތަން ފެނުނީމަ ސަޕްރައިޒްވާވަރު ކަމެއް ނޫނެއްނު....." "ނަމާދުކުރީމައެއްނޫން...އެއަށްވުރެ ވަރުގަދަ ކުޅިގަނޑެއް ކުޅޭތީ..." "ކޮންކަމެއް؟"އޭނަ ލޯ ކުޑަކޮށްލިއެވެ."ނޭގުނު ތިބުނި އެއްޗެއް..." "ހަޔާ އަކީ ބަލިމީހެކޭ ކިޔާފައި އިރުއިރުކޮޅާ އެތަނަށްވަންނަން ޖެހެނީ ކީއްކުރަން؟ސަބަބު އަހަން މިއައީ..ޑޮކްޓަރެއްގެ ގޮތުން ދާކަމަކަށް ގަބޫލެއްނުކުރެވޭ.." އޭނައަށް ފުން ނޭވާއެއް ދޫކޮށްލެވުނެވެ.ދޮންބެ އޭނައަށް ފާރަލަނީހެއްޔެވެ؟ "ސޯ....ދޮންބެ ބުނަން ތިއުޅެނީ ކީކޭ؟އޭނަ ގާތަށް ދިޔައީމަ މައްސަލައަކަށްވާން ޖެހޭ ސަބަބެއް ނޭގުނު...." "ސްޓޭ އަވޭ ފްރޮމް ހާރ..."އަޔާޝްގެ ރާގުން އޭނައަށް ލިބުނީ ހައިރާންކަމެކެވެ. އަޔާޝްގެ ހިތުގައިވާ އެއްޗެއް ދެނެގަންނަން އޭނައަށް ފިލޯސަފަރެއްގެ ސިކުނޑިއަކަށް ބޭނުމެއްނުވިއެވެ. މާޒީގައި އަޔާޝްއާއި ހަޔާގެ ކޮންމެވެސް ގުޅުމެއް އޮތީއެވެ. އެހެންނޫންނަމަ އެހާވަރުވާކަށް ނުޖެހޭނެއެވެ. "މިހެން ބުނީ އޭނަގެ އާއިލާގެ ބެކްގްރައުނޑް ރަގަޅަށް އެނގޭތީ. ޓްރަސްޓްމީ. އޭނައަކީ ކާކުކަން އެނގިއްޖެއްޔާ މިނާހް އެއްވެސް ގުޅުމެއް ބާއްވަން ބޭނުމެއްނުވާނެ........އެ އާއިލާގެ މީހަކު އަހަރެންގެ ގެއަކަށް ވަންނަން ބައްޕަވެސް ހުއްދައެއް ނުދެއްވާނެ........." އަޔާޝްގެ އެ އަމުރުވެރިކަމާއި ހަރުކަށިކަމުގެ ސަބަބުން ކުޑައިރުންފެށިގެން ކޮންމެވެސް ވަރަކަށް ޖެހިލުންވިޔަސް އިހުތިރާމް ކުރަނީ ދޮށީ ބޭބެއަށް ވީކަމަށްޓަކައެވެ. އޭނަ އެގޮތަށް ތަރުބިއްޔަތުކޮށްފައިވާތީއެވެ. ނަމަވެސް ހައްދުން ނައްޓަންފެށީމަ ބައެއްފަހަރު ހިމޭނުން ހުރުން އުދަގޫވާ ހާލަތަށް ދަނީއެވެ. މިނާހްގެ ހިތަށް ބުނަން ނޭގޭފަދަ އުދަގުލެއްވިއެވެ. އޭނަ ހިމޭންވީ އެންމެ ސަބަބަކާއިހެދިއެވެ. އޭނަގެ ހިތުގައި އަދި ހަޔާއަށް ޚާއްސަކަމެއްވިޔަސް އެދެމީހުންގެ ދޭތެރޭގައި އެފަދަ ގުޅުމެއް އޮތީއެއްވެސް ނޫނެވެ. ހަޔާ ހުހަށް ހުރިކަމުގެ އިޝާރާތެއް ދޮންތަ ކުރިޔަސް އެދެމީހުންނަށް ވާހަކަދެއްކުނީވެސް ހާދަ މަދުންނެވެ. ނަމަވެސް ދެންމެ އޭނައަށް ދުޢާކުކުރެވުނީ ހަޔާފަދަ ބައިވެރިއަކަށް އެދިއެވެ. އަޔާޝްގެ ވާހަކަތަކުން އުއްމީދުގެ ހުޅުކޮޅު ފަނޑުވާން އުޅުނެވެ. "އޯކޭ..އޯކޭ....ޝީޒް ޖަސްޓް އެ......" "ޕޭޝަންޓް ދޯ..އެކަންވެސް އެނިމުނީ ދޯ ދެން........"އަޔާޝް ބުމަ އަރުވައިލިއެވެ.".އަދި އެހެން ވާހަކައެއް އެބައޮތް...ކިއުއެކްސްއަށް ވެކްސިނެއް ދޭންފެށިކަން އެނގޭތަ؟" "ނޫން...ހާދަ އަވަހަކަށް..ތިހާ އަވަސްއަރުވާލައިގެން ތައްޔާރުކުރި އެއްޗަކަށް ކިހިނެއް ޓްރަސްޓްކުރާނީ؟" "ޓެސްޓްކޮށްފައި އޭގެ ރައްކާތެރިކަން ކަށަވަރުކޮށްފައި ދޭން ފެށީ...އެކަމާއި ނުވިސްނާ..ހުރިހާ އެންމަނަށް މަޖުބޫރުވާނެ ވެކްސިން ޖަހަން...ޚާއްސަކޮށް މި ހޮސްޕިޓަލުގެ މުވައްޒަފުންނާއި ބަލިމީހުން.....އިންކްލޫޑިން ޔޫ........." މިނާހް ހީލުމަކުން ފުއްދައިލިއެވެ. ޔަގީނުންވެސް އޭނަގެ ހިތް ދެކޮޅެވެ. އެތައް ބަޔަަކަށް ބަލިޖެހުމާއެކުވެސް އޭނައަށް އެ ބަލިން މީހަކު މަރުވިކަން ފާހަގައެއް ނުކުރެވެއެވެ. ފެނުނީ އޮޅުވާލުމާއި މަކަރުވެރިކަމެވެ. ފަންޑުހޯދުމާއި ފައިދާގަނޑެއް ނެގުމަކީ ވެރިންގެ ހުންނަ އެންމެ ނުބައި އެއްސިފަކަމަށްވެދާނެއެވެ. އޭނަގެ ބޭބެ އެ ގިންތީގައިގައި ހިމެނޭކަން ދެރައެވެ. *** އަޔާޝް ކޮފީއަކަށްފަހު ކޮފީއެއް ބޯން ބެލްކަނީގައި އިންދާ ޔަލްވީ އެތަނަށް ނުކުތެވެ."އަޔާ...............ތިވަރަށް ކޮފީ ބޯން ހެޔޮނުވާނެ..ވެގެން އުޅޭގޮތެއް ބުނީމަނު އިނގޭނީ.......އާ ޔޫ ނޮޓް ހެޕީ؟ އެހާވަރުން ކެއްކީމަ ނުވެސް ކައި....ބީފް ކިހާ މީރުކޮށްހަދާފައި ހުރީ.." "އިހަށް ވާހަކަ ނުދައްކާ ދުރަށް ދޭބަލަ.." ޔަލްވީގެ ހިތަށް ފިނިވިއެވެ. ހިތުގައި ޒައްރެއްގެ މިންވަރު ލޯބި އޮތްނަމަ އެހާ ފަރުވާކުޑަކޮށް ވާހަކަ ދައްކާނެހެއްޔެވެ؟ އޭނަގެ މޫނަށް ދެވަނަފަހަރަކު ބަލައިލަންވެސް ނޭދޭފަދައެވެ. އެހާ ރީތިކޮށް ހެދުން އަޅައިގެން ތަފާތު މޭކަޕެއްގައި އިސްތަށިގަނޑު ސްޓައިލްކޮށް ކުލަ ޖައްސައިގެން އައީމަވެސް މޫނަށް އެންމެ ފަހަރަކުވެސް ބަލައިލިނަމައެވެ. "އަޔާ....ހޮސްޕިޓަލް ޓެންޝަން ގެއަށް ހިފައިގެން އައީމަ ވާނީ ތިހެން..ކާން ހިނގާ." އޭނަ އަތުގައި ހިފައިލުމާއެކު ފޮޅުވައިލިގޮތުން އަތް ދޮރުފަތުގައި ޖެހި ތަދުވިއެވެ. ލޮލަށް ކަރުނަ އައެވެ. "ބުނެފީމެއްނު މިތަނުން ދާށޭ..މިވަގުތު ބޭނުމީ އެކަނި އިންނަން.." ޔަލްވީގެ ލޮލުން ކަރުނަތިއްކެއް ވެއްޓުނެވެ. އަޔާޝް އޭނަދެކެ ލޯބިނުވާކަމުގެ ކިތައް ހެކި ފެނިއްޖެހެއްޔެވެ؟ ސަތޭކައިން ގުނައިލެވިދާނެއެވެ. އަޔާޝް އެހެން އަންހެނަކާއި ގުޅުމެއްއޮތީހެއްޔެވެ؟ ނޫނީ ގެއްލުނު ލޯތްބެއްގެ ހިތާމަކުރަނީހެއްޔެވެ؟ ނޭގެއެވެ. އޭނަ ހަދާންވީ ކިހިނެއްހެއްޔެވެ؟ އަޔާޝްގެ ހިތުގެ ރަނިކަން ލިބޭނެގޮތެއް ވިސްނަ ވިސްނާނޭގުނެވެ. މިފަހަކަށް އައިސް އަދި މާބޮޑަށް ރުޅިގަދަވެ އޭނައާއި ވާހަކަދައްކަން ފޫހިވާފަދައެވެ. އާސީންއާއި އެވާހަކަތައް ހިއްސާކުރުމުން ބުނާނީ ސީއީއޯއިންގެ ޒިންމާތައް ބުރަކަމުން އެކަމާއިމެދު ވިސްނަނީކަމަށެވެ. ކެތްތެރިވާން ނަސޭހަތްދިނެވެ. *** ވެކްސިންދޭންފެށުމާއެކު އެކަމަށް އެދިއެދި ތިބި މީހުން އަވަސްއަރުވާލައިގެން ވެކްސިން ޖަހަންފެށިއެވެ. އޭގެ ރައްކާތެރިކަމާއި މުހިއްމުވަރު ކެނޑިނޭޅި ޓީވީތަކާއި ނޫސްތަކުގައި ބުނެދީ ހޭލުންތެރިކުރުވަމުން ދިޔައެވެ. އެންމެންވެސް ބޭނުންވީ އެބިރުވެރި ބަލިން ސަލާމަތްވުމަށެވެ. އެއިން ސަލާމަތްވާންއޮތް ހަމައެކަނި ހައްލަކީ ވެކްސިނެވެ. ވެކްސިން ޖަހައިގެން ހުއްޓާ ބަލިޖެހުނަސް ބޮޑުވަރުވުމާއި މަރުވުމުގެ ފުރުސަތު ކުޑަކޮށްދެއެވެ. ހޮސްޕިޓަލަކީ ހުރިހާގަޑިއެއްގައިވެސް ހޭލަމޭލަވާތަނެކެވެ. ދަންވަރު ތިނެއްޖެހިއިރުވެސް ހޮސްޕިޓަލްތެރެ ހަލަބޮލިވެފައި މެޝިންތަކުގެ އަޑުގަދައެވެ. މޮނިޓަރތަކުގެ ސްކްރީން ވަރުބަލިކަމެއްނެތި ދިއްލޭތަންފެނެއެވެ. އެންޓިސެޕްޓިކްގެ ވަސް ހިފާފައިވަނީ އިމާރާތުގެ އެއްބައި ކަމުގައި ވެގެންނެވެ. ކޮރިޑޯތައް ހިމޭންވެފައި ހުރިހާ ދިމާލަކުން ފެންނަނީ އާދަިޔާ ޚިލާފު ހުދުކަމެކެވެ. ސަންގުމަރުމަރުކުލައިން ވިދާ ތަޅުމެވެ. މިނާހް ކޭސްއެއް ނިންމާފައި ނަރސް ސްޓޭޝަން ކައިރިއަށް އައީ ވޯޑްގައި އެޑްމިޓްކޮށްފައިވާ ބަލިމީހުންގެ ފައިލްތައް ބަލައިލުމަށެވެ. ފައިލެއް ހުޅުވައިލުމާއެކު ބޮޑުއަކުރުން ލިޔެވިފައިވީ ވައިރޯނެކްސް ކިއު ވެކްސިން ޖަހަން ބަލިމީާ ދެކޮޅުކަމަށެވެ. ކޮންސެންޓްގައި ސޮއިނުކުރިކަމަށެވެ. އާއިލާގެ ޚަބަރެއްނުވެއެވެ. "ކާމް އެލާޓް.. ރިފިއުޒެސް ވެކްސިނޭޝަން ޑިސްޕައިޓް ކައުންސެލިން.." "ކާމް.."އެ ސިފަކުރުމާއެކު ހިތަށް ގެނެވުނީ ހަޔާއެވެ. މިނާހްއަށް މި ކޭސްްއާއިމެދު ޝައުގުވެރިވިއެވެ. ވެކްސިންއާއި ދެކޮޅުހެދުމަކީ ނާދިރުކަމެކެވެ. އެދެކެ ބިރުގަތުންވެސް ނާދިރެވެ.ވީމަ މިއީ އާދަޔާ ޚިލާފު ކޭސްއެކެވެ. އެންމެންވެސް އާދޭސްކުރަނީ އަވަހަށް ވެކްސިން ދިނުމަށެވެ. އެންމެންކަހަލަ ގޮތަކަށް ހުދު ކޯޓުގައިވާ މީހުންނަށް އިތުބާރުކުރެއެވެ. ހޮސްޕިޓަލްގެ ނަމަށް އިތުބާރުކުރެއެވެ. އޭނަގެ ބޭބެ ނަމަށްވެސް މެއެވެ. "މިއީ އަންހެންކުއްޖެއް...އެޕެންޑިސައިޓިސް ކަމަށް ޝައްކުކުރެވިގެން އެޑްމިޓްކޮށްފައިއޮތީ...ތަންކޮޅެއް ޑިފިކަލްޓް......"ނަރސްކުއްޖަކު ބުނެލިއެވެ. "ޑިފިކަލްޓްއޭ ތިބުނީ؟" "ސުވާލުތައް ގިނަކަމުން..." އެއއާއެކު އޭނަގެ ލޮލުގައި އަޅައިގަތް ނަމާއެކު ހިތް އޮބިނޯވެ ތެޅިގަތެވެ. ވަގުތުން އަތްތިލަ ފިނިވާގޮތްވިއެވެ. ނުނިމޭ