މަޝްހޫރު ލަވަކިޔުންތެރިޔާ އަރިޖިތު ސިންގް، ފިލްމުތަކަށް ލަވަކިޔައިދިނުން (ޕްލޭބެކް ސިންގިންގް) ހުއްޓާލަން ނިންމިކަން އިޢުލާންކުރުމާ ގުޅިގެން އޭނާގެ ސަޕޯޓަރުންނަށް ބޮޑު ސިހުމެއް ލިބިއްޖެއެވެ. އޭނާ، މި ނިންމުން ހާމަކުރީ އޭނާގެ ރަސްމީ އިންސްޓަގްރާމް އެކައުންޓް މެދުވެރިކޮށެވެ.
އަރިޖިތު ވަނީ މިވީހާ ދުވަހު އޭނާގެ އަޑު އަހައި، ސަޕޯޓަރުން ދިން ބޮޑު ލޯތްބަށްޓަކައި ޝުކުރު އަދާކޮށްފައެވެ. ނަމަވެސް، މިއަދުން ފެށިގެން ފިލްމުތަކަށް ލަވަކިޔައިދިނުމުގެ އެއްވެސް އާ މަސައްކަތެއް އޭނާ އަތެއް ނުލާނެ ކަމަށް ބުންޏެވެ. 
"އެންމެހާ ބޭފުޅުންނަށް އުފާވެރި އާ އަހަރަކަށް އެދެން. އަހަރެންގެ ލަވަތައް އަޑުއަހާ ސަޕޯޓަރުން މިވީހާ ދުވަހު ދިން ލޯތްބަށް ވަރަށް ބޮޑަށް ޝުކުރުވެރިވަން. މިއަދުން ފެށިގެން ޕްލޭބެކް ސިންގަރ އެއްގެ ގޮތުގައި އެއްވެސް އާ މަސައްކަތެއް ނުކުރަން އަހަރެން ވަނީ ނިންމާފައި. މިއީ ވަރަށް ފުރިހަމަ އަދި އުފާވެރި ދަތުރެއް،" އޭނާ ލިޔެފައިވާ ނޯޓުގައިވެއެވެ.
މީގެ އިތުރުން، އޭނާގެ އަމިއްލަ އެކްސް އެކައުންޓް މެދުވެރިކޮށް ވެސް އޭނާ ވަނީ މި ޚަބަރު ހިއްސާކޮށްފައެވެ. އޭނާ ބުނި ގޮތުގައި، ކަލާނގެ އޭނާއަށް ވަނީ ވަރަށް ބޮޑު ނިޢުމަތެއް ދެއްވާފައެވެ.
އޭނާއަކީ މިއުޒިކަށް ލޯބިކުރާ މީހަކަށް ވާތީ، ކުރިއަށް އޮތް ތަނުގައި އަމިއްލަ ފަންނުވެރިކަން ކުރިއަރުވައި، އާ ކަންތައްތަކެއް ދަސްކުރުމަށް މަސައްކަތް ކުރާނެ ކަމަށް ބުންޏެވެ. ނަމަވެސް، އަރިޖިތު ވަނީ މިއުޒިކް އުފެއްދުން ހުއްޓާނުލާނެކަން ސާފުކޮށްދީފައެވެ. "އަހަރެން މިއުޒިކް އުފެއްދުން ހުއްޓައެއް ނުލާނަން،" އޭނާ ބުންޏެވެ.
އަރިޖިތު ސިންހ އަކީ ހަމައެކަނި ލަވަކިޔުންތެރިއެއް ނޫނެވެ. އޭނާއަކީ މިއުޒިކް ކޮމްޕޯޒަރެއްގެ އިތުރުން މިއުޒިކް އިންސްޓްރޫމަންޓްތައް ކުޅޭ މިއުޒީޝަނެއްވެސް މެއެވެ.
އޭނާގެ ފަންނީ ދަތުރު ފެށުނީ 2005 ވަނަ އަހަރު ބޭއްވި ރިއަލިޓީ ޝޯ "ފޭމް ގުރުކުލް" އިންނެވެ. ހިންދީ ފިލްމީ ދާއިރާއަށް އޭނާ ފުރަތަމަ ތަޢާރަފުވީ 2011 ވަނަ އަހަރު ފިލްމު "މާޑަރ 2" ގެ "ފިރް މޮހައްބަތު" މި ލަވައިންނެވެ. އޭގެ ފަހުން "ތުމް ހީ ހޯ"، "ބިންތޭ ދިލް"، އަދި "ކޭސަރިޔާ" ފަދަ މަޤްބޫލު އެތައް ލަވަތަކެއް އޭނާ ވަނީ ކިޔައިދީފައެވެ.
އޭނާގެ ކާމިޔާބީތަކުގެ ތެރޭގައި ދެ ނޭޝަނަލް ފިލްމް އެވޯޑް ހިމެނޭއިރު، 2025 ވަނަ އަހަރު އިންޑިއާ ސަރުކާރުންދޭ ޝަރަފުވެރި "ޕަދްމާ ޝްރީ" އެވޯޑް ވެސް އޭނާއަށް ވަނީ ލިބިފައެވެ.