ކައުންސިލް އިންތިޚާބުގައި ވާދަކުރަން އިއްޔެގެ ނިޔަލަށް ހުށަހެޅި ފޯމުތަކުން ކެންޑިޑެންސީ ބަލައިގަތީ، 1،040 ފޯމެއްގެ ކަމަށް އިލެކްޝަންސް ކޮމިޝަން (އީސީ)އިން މިއަދު ބުނެފިއެވެ. އެ ކޮމިޝަނުން މިއަދު ވަނީ، އިއްޔެގެ 23:00އަށް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ވާދަކުރަން ހުށަހެޅި ފޯމުތަކުގެ ތަފާސްހިސާބުތައް އާންމުކޮށްފައެވެ. އެ ހިސާބުތަކުން އެނގޭ ގޮތުގައި، ކައުންސިލް އިންތިޚާބުގައި ވާދަކުރަން ހުށަހެޅި ފޯމުތަކުން ކެންޑިޑެންސީ ބަލައިގަތީ، 1،040 ފޯމެއްގެ ކަމަށްވާއިރު، 236 ފޯމެއް ބަލައިގެންފައެއް ނުވެއެވެ. ކެންޑިޑެންސީ ގަބޫލުނުކުރުމުގެ ސަބަބުން 133 ފޯމެއް އަލުން ހުށަހަޅާފައިވެއެވެ. https://x.com/ElectionsMv/status/2016135815852916869 އޭގެއިތުރުން، ޑަބްލިއުޑީސީ އިންތިޚާބުގައި ވާދަކުރުމަށް ހުށަހެޅި ފޯމުތަކުން 817 ފޯމެއް ބަލައިގެންފައިވާ ކަމަށް އީސީގެ ހިސާބުތަކުން ދައްކައެވެ. އެ އިންތިޚާބުގައި ވާދަކުރަން ހުށަހަޅައިގެން، އީސީން ކެންޑިޑެންސީ ގަބޫލުކޮށްފައި ނުވަނީ 161 ފޯމެއްގެއެވެ. ހިސާބުތަކުން ދައްކާ ގޮތުގައި، އޭގެ ތެރެއިން 86 ފޯމެއް އަލުން ހުށަހަޅައިފައިވެއެވެ. ކައުންސިލް އިންތިޚާބުގައި ވާދަކުރަން ކުރިމަތިލުމުގެ ފުރުސަތު ހުޅުވާލީ އަންނަ އާދީއްތަ ދުވަހުގެ ދަންވަރު 12 ޖެހުމުގެ ނިޔަލަށެވެ. އީސީން އިންތިޚާބުގެ ހިސާބުތައް އާންމުކުރިއިރު، އިލެކްޝަންސް ކޮމިޝަނުން އިންތިޚާބުގައި ވާދަކުރަން ހުޅުވާލި މުއްދަތު ކުރު ކަމަށް ބުނެ، އިދިކޮޅު އެމްޑީޕީން މިއަދު ވަނީ ކަންބޮޑުވުން ފާޅުކޮށްފައެވެ. https://sun.mv/217203 އޭގެކުރިން، މިދިޔަ ހޮނިހިރުގައި އެ ޕާޓީން ވަނީ، މެނުއަލްކޮށް ނުވަތަ ގަނޑުކޮށް ފޯމް ބަލައިގަތުމުގެ އިންތިޒާމް ހަމަޖެއްސުމަށް އިލެކްޝަންސް ކޮމިޝަނަށް މިދިޔަ ހޮނިހިރު ދުވަހު ގޮވާލައިފައެވެ. އޭޕްރިލް މަހުގެ ހަތަރުވަނަ ދުވަހު އޮންނަ އިންތިޚާބުގައި ވާދަކުރާ ކެންޑިޑޭޓުން ކުރިމަތިލާން ޖެހޭނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ.