ސާފްގެ ފުރަތަމަ ފުޓްސަލް ޗެމްޕިއަންޝިޕްގައި ދިވެހި ގައުމީ ޓީމުން ހޯދި ފުރިހަމަ ކާމިޔާބީ ފާހަގަކުރުމާ އެކު، މިރޭ އާޓިފިޝަލް ބީޗުން ޓީމަށް ހޫނު މަރުހަބާއެއް ކިޔައިފި އެވެ. 
ތަފްސީލް - މިރޭ ވެލާނާ އިންޓަނޭޝަނަލް އެއާޕޯޓަށް ޓީމު އައުމުން އެ ތަނުން ވެސް ހޫނު މަރުހަބާއެއް ކި އެވެ. އެއާޕޯޓުން އާޓިފިޝަލް ބީޗަށް ޓީމު ދަތުރުކޮށްފައި ދިޔައީ ޕިކަޕެއްގަ އެވެ. 
އާޓިފިޝަލް ބީޗުގައި ހަދާފައިވާ ސްޓޭޖް މަތީގައި ސަޕޯޓަރުންނާ އެކު ޓީމުގެ ކުޅުންތެރިން ތަށި ހިފައިގެން ފޮޓޯ ނެގުމުގެ ހަރަކާތްތަކެއް ފުރަތަމަ ގެންދިޔަ އެވެ. 
އުފާ ފާޅުކުރުމުގެ ތެރެއިން އެފްއޭއެމްގެ ރައީސް އަދި މަހިބަދޫ ދާއިރާގެ މަޖިލިސް މެންބަރު އަހުމަދު ތޯރިގް (ޓޮމް) އާއި ސްޕޯޓްސް މިނިސްޓަރު އަބްދުﷲ ރާފިއުއަށް ވަނީ ސާފްގެ ތަށި އަރުވައިފަ އެވެ. 
ސާފް ފުޓްސަލް ޗެމްޕިއަންޝިޕް ރާއްޖެއިން ކާމިޔާބުކުރީ ލީގު އުސޫލުން ކުޅުނު ހަ މެޗުން ވެސް މޮޅުވެ ޖުމްލަ 18 ޕޮއިންޓް ހޯދައިގެންނެވެ.