ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕުގެ ހުރިހާ މެޗަކުން މޮޅުވުމުގެ ރެކޯޑާއެކު، ސަރަހައްދީ ފުޓްސަލް ރަސްކަން ހޯދި ދިވެހި ގައުމީ ފުޓްސަލް ޓީމު ރާއްޖެ އައުމުން މިރޭ ހޫނު މަރުހަބާއެއް ކިޔައިފިއެވެ. ސާފް ފުޓްސަލް ޗެމްޕިއަންޝިޕްގައި ފުރަތަމަ މެޗުގައި ޕާކިސްތާނު އަތުން 7-1ގެ ނަތީޖާއަކުން ރާއްޖެ މޮޅުވިއިރު، ދެވަނަ މެޗުގައި ބަންގްލަދޭޝް އަތުން މޮޅުވީ 6-1 ގެ ނަތީޖާއަކުންނެވެ. ތިންވަނަ މެޗުގައި ސަރަހައްދުގެ ގަދަބާރު އިންޑިއާ އަތުން މޮޅުވީ 5-0 އިންނެވެ. ނޭޕާލް އަތުން 2-1 އިން މޮޅުވިއިރު، ބޫޓާންގެ މައްޗަށް ކުރި ހޯދައި ތަށި ކަށަވަރުކުރީ 3-1 އިންނެވެ. އެއަށް ފަހު ލަންކާއާ ދެކޮޅަށް ކުޅެ ރާއްޖެ ވަނީ 5-2އިން މޮޅުވެފައެވެ. ސާފް ފުޓްސަލް ޗެމްޕިއަންޝިޕް ކާމިޔާބުކުރި ދިވެހި ގައުމީ ފުޓްސަލް ޓީމަށް މަރުހަބާ ކިޔުން -- ސަން ފޮޓޯ/ މޫސާ ނަދީމް އެ ކާމިޔާބީއަށް ފަހު ރާއްޖޭގެ ޓީމު އެނބުރި އައީ މިރޭ 19:45 ހާއިރެވެ. އެ ޓީމަށް ވެލާނާ އިންޓަނޭޝަނަލް އެއާޕޯޓުން ސްޕޯޓްސް މިނިސްޓަރު އަބްދުﷲ ރާފިއުއާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަހުމަދު ތާރިގް (ޓޮމް)އާއި ކޮމިޝަނާ އޮފް ސްޕޯޓްސް މުހައްމަދު ތޮލާލް މަރުހަބާ ދެންނެވިއެވެ. އެއަށްފަހު މާލެ އައިސް، އެ ޓީމުން ވަނީ ތަށްޓާއެކު ޕިކަޕު ބުރެއް ޖަހައިފައެވެ. އެގޮތުން ސޯޝަލް ސެންޓަރުން ފެށިގެން އާޓިފިޝަލް ބީޗަށް ދިޔައީ ޕިކަޕުގައި ތަށި ދައްކާލަމުންނެވެ. https://sun.mv/gallery/view/6870 އާޓިފިޝަލް ބީޗުގައި ފުޓްސަލް ޓީމުގެ ކާމިޔާބީ ފާހަގަކުރުމަށް ގިނަ ބަޔަކު އެއްވެ ތިއްބެވެ. އަދި ޓީމާއެކު ފޮޓޯ ނަގަން ގިނަ އަދަދެއްގެ މީހުންނަށް ފުރުސަތު ދީފައިވެއެވެ. https://sun.mv/217195 އެ ހަރަކާތުގައި ވެސް މިނިސްޓަރު ރާފިއު ބައިވެރިވެވައިގެންނެވިއެވެ. އަދި ހަރަކާތުގެ ތެރެއިން ހަވާ އަރުވައިފައިވެއެވެ. ގައުމީ ފުޓްސަލް ޓީމަށް ލިބުނު ކާމިޔާބީއާއެކު، އެ ޓީމުގެ ކޯޗު، އުޒްބެކިސްތާންގެ ފާރޫކް ޒަކީރޯވް ވަނީ ރާއްޖެއިން ދެން ވިސްނަންވީ އޭޝިއަން ކަޕް ކޮލިފައިންއަށް ކަމަށް މީގެ ކުރިން ބުނެފައެވެ.