ތިމާވެށީގެ ޖޫރިމަނާތަކުން ދައުލަތަށް ސެޕްޓެމްބަރު 16، 2024ގެ ނިޔަލަށް، 930 މިލިއަން ރުފިޔާ ނުލިބި އެބަ އޮތް ކަމަށް އޮޑިޓު ރިޕޯޓަކުން ދައްކައިފިއެވެ. އޮޑިޓު އޮފީހުން މިއަދު އާންމުކުރި އެންވަޔަރަމެންޓް މިނިސްޓްރީގެ 2019، 2020 އަދި 2021ގެ ކޮމްޕްލަޔަންސް އޮޑިޓުގައި ވަނީ، ތިމާވެއްޓަށް ލިބޭ ގެއްލުންތަކަށް ކޮށްފައިވާ ޖޫރިމަނާތަކަށް 930.3 މިލިއަން ރުފިޔާ ދައުލަތަށް ނުލިބި އޮތްކަން ފާހަގަކޮށްފައެވެ. ނަމަވެސް، އެ ޖޫރިމަނާގެ އިތުރު ތަފުސީލެއް ހިމަނާފައެއް ނުވެއެވެ. އެހެންވެ، އެ ފައިސާ އަނބުރާ ހޯދުމަށް މިނިސްޓްރީން ބައެއް ކަންކަން އިސްލާހު ކުރުމަށް އޮޑިޓުގައި ވަނީ ލަފާ ދީފައެވެ. މިގޮތުން، ކަނޑައަޅާފައިވާ މުއްދަތުގެ ތެރޭގައި ފައިސާ ހޯދުމަށް މަސައްކަތް ކުރުމަށާއި ކަނޑައަޅާފައިވާ މުއްދަތު ހަމަވާއިރު، ފައިސާ ނުލިބިއްޖެނަމަ، ހަތް ދުވަހުގެ ތެރޭގައި ފައިސާ ދައްކަން ހަނދާންކޮށްދޭ ލިޔުމެއް ފައިސާ ދައްކަން ޖެހޭ ފަރާތަށް ފޮނުވަން ވަނީ ލަފާ ދީފައެވެ. މުއްދަތު ފާއިތުވާއިރު ވެސް ފައިސާ ނުދައްކައިފިނަމަ، އިތުރު ހަތް ދުވަސް ދިނުމަށްފަހުގައި އެ މުއްދަތުގައި ފައިސާ ދައްކަން ލިޔުމަކުން އެންގުމަށާއި ފައިސާ ނުދައްކައިފި ނަމަ، ފައިސާ ހޯދުމަށް ޝަރީއަތަށް ހުށަހެޅުމަށް އޮޑިޓުގައި ލަފާ ދީފައިވެއެވެ. އޭގެއިތުރަށް، ޝަރީއަތުން ފައިސާ ދައްކަން އެންގުމުން އެ ކަން ނުކުރާނަމަ، އެ މައްސަލަ ފިނޭންސް މިނިސްޓްރީއަށް ހުށަހަޅައިގެން ކުރިއަށް ގެންދިޔުމަށް ދައުލަތުގެ މާލިއްޔަތު ގަވައިދުގައި ބަޔާންކޮށްފައިވާކަން ރިޕޯޓުގައި ފާހަގަކުރިއެވެ. ފާހަގަކުރެވޭ ގޮތުގައި، ފަރުތަކަށް ބާޖު އެރުމުގެ ހާދިސާތައް ހިނގައި، އެ ތަންތަނަށް ގެއްލުންތައް ލިބިފައި އެބަހުއްޓެވެ. މިގޮތުން، އެ ފަރުތަކަށް ލިބޭ ގެއްލުން ބަލައި، އެންވަޔަރަންމަންޓަލް ރެޖިއުލޭޓަރީ އޮތޯރިޓީ(އީއާރުއޭ)އިން އެ ބާޖުގެ ވެރިފަރާތެއް ޖޫރިމަނާކުރެއެވެ.