ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލައިގެން 2028ގައި ރައީސް މުހައްމަދު މުއިއްޒަަށް ބޮޑު ލަނޑެއް ލިިބިދާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެެވެ.
ވީ ކިހިނެއް؟ - މިހާރު ހިނގަމުންދާ 20 ވަނަ މަޖިލީހުގެ ފަސް އަހަރުގެ ދައުރު 1 ޑިސެމްބަރު 2028އަށް ކުރުކޮށް، މަޖިލިސް އިންތިހާބާއި ރިޔާސީ އިންތިހާބު އެއްކޮށްލުމަށް ގާނޫނުއަސާސީއަށް ރައްޔިތުންގެ މަޖިލީހުން ވަނީ އިސްލާހު ގެނެސްފަ އެވެ.
އެ އިސްލާހު ތަސްދީގުކުރެވޭނީ ރައްޔިތުންގެ ރުހުން ލިބިގެންނެވެ. އެހެންވެ، އަންނަ މަހުގެ 4ގައި އޮންނަ ކައުންސިލް އިންތިހާބާ އެކު، މިކަމަށް ހިޔާލު ހޯދުމުގެ ވޯޓެއްވެސް ނަގާނެ އެެވެ. އެގޮތަށް ރައްޔިތުން އެއްބަސްވެއްޖެ ނަމަ، 2028ގެ ރިޔާސީ އިންތިހާބާއި 2029ގެ މަޖިލިސް އިންތިހާބު ބާއްވާނީ އެއް ތާރީހެއްގަަ އެވެ.
ބުނީ ކީކޭ؟ - އެމްޑީޕީން ރޭ ކ. މާފުށީގައި ބޭއްވި ކައުންސިލް އިންތިހާބުގެ ކެމްޕޭން ޖަލްސާގައި ސޯލިހު ވިދާޅުވީ، ގާނޫނުއަސާސީއަށް ބޭނުންހާ ގޮތަކަށް އިސްލާހުތައް ސަރުކާރުން ގެންނަމުންދާއިރު، ގާނޫނުއަސާސީ ތަރުތީބުކުރެވިފައި އޮތީ ނުވިސްނާ ނޫން ކަމަށާއި އެއީ ވަރަށް ދިގުކޮށް ވާހަކަދެކެވި ކޮށްފައި އޮތް ކަމެއް ކަމަށެވެ.
ސޯލިހު ވިދާޅުވީ، އަމިއްލަ ފައިދާއަށް ކަންކަން ކުރަން ހަދައިގެން ބޮޑު ލަނޑެއް ވެސް ލިބިދާނެ ކަމަށެވެ. އެކަމުގެ މިސާލެއް ދައްކަވަމުން ސޯލިހު ފާހަގަކުރެއްވީ 2008 ވަނަ އަހަރުގެ ރިޔާސީ އިންތިހާބު އެމްޑީޕީއަށް ކާމިޔާބުވީއިރު، ރައްޔިތުންގެ މަޖިލިސް ރައީސް މައުމޫން އަބްދުލްގައްޔޫމަށް ކާމިޔާބުވެގެންދިޔަ ގޮތެވެ. ސޯލިހު ވިދާޅުވީ، އޭގެ ކުރިން ގާނޫނުއަސާސީއަށް އިސްލާހު ގެނައިއިރު މަޖިލީހުގެ ބާބުގައި ގިނަ ބާރުތަކެއް ލިޔުނީ، މަޖިލިސް އިންތިހާބު އެމްޑީޕީއަށް ކާމިޔާބުވާނެ ކަމަށް ބަލައިގެން ކަމަށް ސޯލިހު ވިދާޅުވި އެވެ.
ގާނޫނުއަސާސީގައި ރައްޔިތުންގެ މަޖިލީހުގެ ބާބު ލިޔުމުގެ މަސައްކަތުގައި އުޅުއްވި ބޭފުޅެއްގެ ހައިސިއްޔަތުން ސޯލިހު ވިދާޅުވީ، އޭރު އެ ބާބު ލިޔެ ނިމުމުން "މިއޮތީ ހާދަ ބައިވަރު ބާރުތަކެއް ރައްޔިތުންނަށް ދީފައޭ، މިހެން ވެރިއަކު ވެރިކަންކުރާނީ ކިހިނެއް"ތޯ އެ މަނިކުފާނު ސުވާލުކުރެއްވިން ކަމަށެވެ.
"އަޅުގަނޑަށް އޭރު ވިސްނުނު ގޮތް އެއީ. ރާއްޖޭގެ ސީނިއާ އެމްޕީއެއް ކައިރީ އަޅުގަނޑު އެ ވާހަކަ ދެއްކީ. ކިހިނެއްހޭ ދެން ރާއްޖޭގައި ވެރިކަމެއް ކުރާނީ؟ ރިޔާސީ ނިޒާމެއްގެ ވާހަކައޭ މިދައްކަނީ. ބާރުތައް މިއޮތީ ރައްޔިތުންގެ މަޖިލީހަށް ގަޑުކޮށް ޖަމާކޮށްފައޭ. އޭނާ ވިދާޅުވި، އިބޫއޭ، ތިވާހަކަ އެހާ ބާރަށް ނުދައްކައްޗޭ. އަޅުގަނޑުމެންނަށް ފެންނަ ގޮތުގައި 2008 ވަނަ އަހަރު ވެސް ވެރިކަމަށް އަދި އަންނާނީ ރައީސް މައުމޫން [އަބްދުލްގައްޔޫމް]އޭ. ރައީސް މައުމޫން ބަލިކުރެވޭ ތަނެއް އަޅުގަނޑުމެންނަކަށް ނުފެނެއޭ. އެކަމަކު ރައްޔިތުންގެ މަޖިލިސް ތިމަންނަމެން ނަގާނަމޭ. އެހެންވީމާ އެތާ ނޫންހޭ ބާރުތައް އޮންނަން ވާނީ،" ސޯލިހު ވިދާޅުވި އެވެ.
"އެކަމަކު ވެގެންދިޔައީ ކިހިނެއްތޯ؟ 2008 ވަނަ އަހަރު ވެރިކަން ލިބުނީ އަޅުގަނޑުމެން [އެމްޑީޕީ]އަށް. ރައްޔިތުންގެ މަޖިލިސް ލިބުނީ ރައީސް މައުމޫނަށް. އެހެންވީމާ ކަމެއް ކުރާއިރު ހަމައެކަނި ތިމާއަށް ފައިދާހުރި ގޮތަށް ކަމެއް ކޮށްގެން ލަނޑެއް ލިބިދޭނެ. އެހެންވީމާ ރައީސް މުއިއްޒު މިއަދު [ދެ އިންތިހާބު އެއްކޮށްލަން] އެ ގެންނަވާ އިސްލާހުން ހަމަ ފަހަރުގައި އެ މަނިކުފާނަށް ވެސް 2028ގައި ބޮޑު ލަނޑެއް ލިބުމަކީ އެކަށީގެންވާ ކަމެއް،"
ސޯލިހު ވިދާޅުވީ، 2028ގައި ވެރިކަމަށް ހޮވޭ ސަރުކާރަކާ އެކު މިހާރަށް ވުރެ ބޮޑަށް ރައްޔިތުންގެ މަޖިލިސް ވެރިކަމަށް އަންނަ ބަޔަކަށް ކާމިޔާބުވާނެ ކަމަށް ބެލެވޭ ކަމަށެވެ. އޭގެ ނަތީޖާއަކީ، ސަރުކާރުގެ ފަސް އަހަރު ދުވަހުގެ ބާރާއި ވަޒީފާ އާއި ފައިސާތަކާ އެކު ރައްޔިތުންނަށް ސަރުކާރުން ޖަވާބުދާރީކުރުވަން އޮތް ދޮރު މުޅިން ބަންދުވެގެން ދިއުން ކަމަށް އެ މަނިކުފާނު ވިދާޅުވި އެވެ.
ދެ އިންތިހާބު އެއްކޮށްލުމަށް ހިޔާލު ހޯދުމުގެ ވޯޓެއް ނަގަން އުޅޭއިރު އޭގައި އޮތީ ނުވަތަ އޭގެ މަގުސަދަކީ ކޮބައިކަން ވެސް ރައްޔިތުންނަށް ނޭނގޭ ކަމަށް ސޯލިހު ވިދާޅުވި އެވެ. އެފަދަ ކަމެއް ކުރަންވާނީ އޭގެ ވާނުވާ ކިޔައިދީފަ ކަމަށް އެ މަނިކުފާނު ވިދާޅުވި އެވެ.
ދެ އިންތިހާބު އެއްކޮށްލުމުގެ ވާހަކައަކީ ރައީސް މުއިއްޒުގެ މެނިފެސްޓޯގައި ވެސް ނެތް އެއްޗެއްކަން ފާހަގަކުރައްވައި ސޯލިހު ވަނީ، "ހަމަ ހިތަަށް އެރުމުން" ކަންކަން ނުކުރައްވާ، އޭގެ ނަތީޖާ އާއި ފައިދާގެ ވާހަކަ ވެސް ރައްޔިތުންނަށް ކިޔައިދިނުމަށް އެދިވަޑައިގެންފަ އެވެ. ސޯލިހު ވިދާޅުވީ 60 މިލިއަން ރުފިޔާ ސަލާމަތްކުރާށޭ ކިޔާފައި ދެ އިންތިހާބު އެއްކޮށްލަން ރައްޔިތުން ބޭނުންނުވާ ކަމަށާއި އެއީ އެއަށް ވުރެ ގެއްލުން ބޮޑު ކަމެއް ކަމަށެވެ.
"[ދެ އިންތިހާބު އެއްކޮށްލައިފި ނަމަ] ފަސް އަހަރުދުވަހަށް ސަރުކާރާ ދޭތެރޭގައި އެއްޗެއް ބުނެވޭނެ ފުރުސަތެއް ދެނެއް ނުލިބޭނެ. ކޮންމެ ކަމެއް ކޮންމެ ގޮތަކަށް ކުރިޔަސް. މަޖިލިސް އޮންނާނީ ސަރުކާރާ އެކު. ރައްޔިތުންނާ ހަމައަށް އަންނާކަށް ނުޖެހޭނެ. ދެން ކުރައްވަމުން ގެންދަވަންވީ ނޫންތޯ. އެހެންވީމާ ސިއްރިޔާތުގައި ކުރަން އުޅޭ ކަންތަކަށް އަޅުގަނޑުމެން އެބަޖެހޭ ބޮޑުތަނުން ނޫނެކޭ ބުނަން،" ސޯލިހު ވިދާޅުވި އެވެ.