އަލް ސަފާ ހައްޖު އެންޑް އުމްރާ ގްރޫޕުގެ ހަވާލުގައި އުމްރާއަށް ދިޔަ އުމުރުން ދުވަސްވީ ދެމަފިރިއަކު ނުލައި, އުމްރާވެރިން ގޮވައިގެން އެ ގްރޫޕުން ރާއްޖެ އައި މައްސަލައެއް ފެންމަތިވެއްޖެއެވެ
ސަފާ ގްރޫޕުގެ ހަވާލުގައި އެ މީހުން އުމްރާއަށް ފުރީ މިދިޔަ މަހު 28 ވަނަ ދުވަހުގައެވެ، އަދި އިއްޔެ ހެނދުނު އެނބުރި މާލެ އައުމަށް ހަމަޖެހިފައި އޮތް ކަމަށް އެމީހުންގެ ދަރިއަކު ވަނީ ކިޔައިދީފައެވެ.
އޭނާ ބުނި ގޮތުގައި ރާއްޖެ އައުމަށް އެއާޕޯޓަށް ގޮސް، ބޯޑިންވާން އެ މީހުންނަށް ލިބުނީ ވަރަށް ކުޑަ ވަގުތުކޮޅެއްކަމަށާއި އެ މީހުންނަށް ބޯޑިން ވެވުނުއިރު ފްލައިޓު ނައްޓައިލަން ރެޑީވެ، ގޭޓު ބަންދުކޮށްފައިވާކަމަށެވެ.
އޭނާ ބުނީ އޭރު އެ ގްރޫޕުގެ ވެރިން ވެސް އެއާޕޯޓުގައި ހުރި ކަމަށާއި، ބަޔަކު ނުލައި ދެވޭކަން އޭނާއަށް އެނގިފައި ނުވާކަމަށެވެ.
އޭނާ ބުނީ އެ ގްރޫޕާ ގުޅައިގެން ދެން އެންމެ އަވަހަށް އޮތް ފްލައިޓަކުން އެ ދެމަފިރިން ރާއްޖެ ގެނައުމަށް މަސައްކަތް ފެށި ކަމަށެވެ. އެގޮތުން ހަމަޖެހުނީ އަންނަ ހޯމަ ދުވަހު އެ ދެމަފިރިން ރާއްޖެ ގެނައުމަށެވެ. ނަމަވެސް ޖާގަ ލިބުނީ ވެސް ދެމަފިރިންނަށް ވަކިން ދެ ފްލައިޓަކުންކަން އޭނާ ފާހަގަކުރިއެވެ.
މިކަމާ ގުޅިގެން ސައުދީ އެމްބަސީއިން ބުނީ އެ ތަނުން އެމީހުންނަށް އެހީތެރިކަން ދިން ކަމަށާއި ހެނދުނު އެއާޕޯޓަށް ދިޔަ އެ ދެ މީހުންނަށް އެނބުރި އެ މީހުން ތިބޭ ހޮޓެލްއަށް ދެވުނީ ރޭގަނޑު ވަރަށް ލަސްވި ފަހުންކަމަށެވެ. އަދި އެ މީހުން މި ވަގުތު ހޮޓެލްގައި ތިބީ އަމިއްލަ ޚަރަދުގައި ކަމަށް ވެސް އެމްބަސީން ބުނެއެވެ.
މި މައްސަލައާއި ގުޅިގެން އާއިލާއިން ބުނީ މިއީ ވަރަށް ޒިންމާދާރުކަން ކުޑަ ގޮތަކަށް ވެގެން ދިޔަ ކަމެއް ކަމަށާއި މި ކަމުގައި އެ ގްރޫޕުގެ ވަރަށް ބޮޑު އިހުމާލެއް އޮތް ކަމަށެވެ.
މި މައްސަލައާއި ގުޅިގެން އަދި ސަފާ ގްރޫޕުން ވަކި އެއްޗެއް ބުނެފައެއް ނެތެވެ.