ގޫގުލްގެ އެންމެ ފަހުގެ އޭއައި މޮޑެލް "ޖެމިނައި 3" އަކީ މައިކްރޮސޮފްޓްގެ ކޯޕައިލޮޓަށް ނުކުރެވޭ ބައެއް ކަންކަން ކުރުމުގެ ގާބިލުކަން ލިބިގެންވާ މޮޑެލެއް ކަމަށް މައިކްރޮސޮފްޓްގެ އާޓިފިޝަލް އިންޓެލިޖެންސްގެ ވެރިޔާ މުސްތަފާ ސުލައިމާން ވިދާޅުވެއްޖެއެވެ. ބްލޫމްބާގަށް ދެއްވި ޚާއްޞަ އިންޓަވިއުއެއްގައި ސުލައިމާން ވިދާޅުވީ، ވާދަވެރި ގޫގުލްގެ އައު މޮޑެލްގައި ތަފާތު މޮޅު ކަންތައްތަކެއް ހުރިކަން ޤަބޫލުކުރައްވާ ކަމަށެވެ. ނަމަވެސް، ކޯޕައިލޮޓްގައި ވެސް ޖެމިނައި 3 ގައި ނުހިމެނޭ، އަދި އެއަށްވުރެ ފުރިހަމަ ހައިސިއްޔަތުތަކެއް ހުރިކަން އޭނާ ފާހަގަކުރެއްވިއެވެ. ސުލައިމާން އެންމެ ބޮޑަށް އަލިއަޅުވާލެއްވީ ކޯޕައިލޮޓްގެ "ވިޝަން" ނުވަތަ ފެނުމުގެ ޤާބިލިއްޔަތަށެވެ. އޭނާ ސިފަކުރެއްވި ގޮތުގައި ކޯޕައިލޮޓްގެ ވިޝަން އަކީ "ވަރަށް ހައިރާންކުރުވަނިވި" އެއްޗެކެވެ. މޯބައިލް ފޯނު ނުވަތަ ކޮމްޕިއުޓަރުގެ ސްކްރީން ޝެއާކޮށްލުމުން، އެއަށް ފެންނަ ކޮންމެ އެއްޗަކާ ގުޅޭގޮތުން ވަގުތުން ވާހަކަދައްކައި، އެހީތެރިވެދިނުމުގެ ހުނަރު ކޯޕައިލޮޓްގައި ހުރެއެވެ. "މައިކްރޮސޮފްޓްގެ މައިގަނޑު މަޤްޞަދަކީ ދުވަހުން ދުވަހަށް ކުރާ ކަންކަމުގައި ދަތިވާ ހިނދު އެހީތެރިވެދޭނެ 'ބުއްދިވެރި އެހީތެރިއެއް' ގެ ގޮތުގައި ކޯޕައިލޮޓް ބައްޓަންކުރުން،" ސުލައިމާން ވިދާޅުވިއެވެ. މިކަމާ ގުޅިގެން ގޫގުލްގެ ސީއީއޯ ސުންދަރު ޕިޗައި ވިދާޅުވެފައިވަނީ، ޖެމިނައި 3 އަކީ މަލްޓިމޯޑަލް ފަހުމުގެ ދުނިޔޭގައި މިވަގުތު އޮތް އެންމެ މޮޅު މޮޑެލް ކަމަށެވެ. ގޫގުލްއިން ހާމަކުރާ ގޮތުގައި މި އައު މޮޑެލްއަކީ ކޯޑުކުރުމާއި، އުފެއްދުންތެރި ޚިޔާލުތައް (ކްރިއޭޓިވްވުން) ނެރުމުގައި ކުރީގެ މޮޑެލްތަކަށްވުރެ މާ ފުރިހަމަ ނިޒާމެކެވެ. އޭއައިގެ ވާދަވެރިކަން ބޮޑުވެފައިވީ ނަމަވެސް، ސަލާމަތީ ކަންކަމަށް އިސްކަންދިނުމަށް ސުލައިމާން ވަނީ ގޮވާލައްވާފައެވެ. އޭނާ ވިދާޅުވީ މައިކްރޮސޮފްޓްގެ ސިޔާސަތަކީ "އިންސާނިއްޔަތަށް ޚިދުމަތްކުރާ ސުޕައިންޓެލިޖެންސް" އުފެއްދުން ކަމަށެވެ. މި މޭރުމުން ވާހަކަދައްކަވަމުން ސުލައިމާން ވަނީ ވަރުގަދަ އިންޒާރެއްވެސް ދެއްވާފައެވެ. އޭނާ ވިދާޅުވި ގޮތުގައި އޭއައި ސިސްޓަމެއް އިންސާނުންގެ ކޮންޓްރޯލުން ބޭރުވެއްޖެނަމަ، ނުވަތަ އެފަދަ ބިރެއް ހީވެއްޖެނަމަ، އެ ސިސްޓަމެއް ތަރައްޤީކުރުން ވަގުތުން ހުއްޓާލާނެއެވެ. "ސިސްޓަމްތައް ކޮންޓެއިންމަންޓް (ހިފެހެއްޓުން) އާއި އެލައިންމަންޓް (އިންސާނުންގެ މަޤްޞަދުތަކާ އެއްގޮތްކުރުން) ވުމަކީ، އަޅުގަނޑުމެން ދަމާފައިވާ ރަތް ރޮނގުތަކެއް. މިއީ ދޫކޮށްލެވޭނެ ކަންކަމެއް ނޫން،" ސުލައިމާން ވިދާޅުވިއެވެ. މައިކްރޮސޮފްޓާއި ގޫގުލްއަކީ ޖެނެރޭޓިވް އޭއައިގެ ޓެކްނޮލޮޖީގައި ދުނިޔޭގެ އެންމެ ކުރީގައި އުޅޭ، އަދި އެންމެ ވާދަވެރި ދެ ކުންފުންޏެވެ. މައިކްރޮސޮފްޓުން އޯޕަންއޭއައި (ޗެޓްޖީޕީޓީ އުފެއްދި ކުންފުނި) އާ ގުޅިގެން "ކޯޕައިލޮޓް" ފުޅާކުރަމުންދާއިރު، ގޫގުލްއިން ދަނީ އެކުންފުނީގެ އަމިއްލަ އުފެއްދުމެއް ކަމަށްވާ "ޖެމިނައި" މޮޑެލްތައް ތަރައްޤީކުރަމުންނެވެ. ފާހަގަކޮށްލެވޭ ކަމަކީ، މައިކްރޮސޮފްޓްގެ އޭއައި ވެރިޔާ މުސްތަފާ ސުލައިމާންއަކީ ގޫގުލްއިން ގަތް މަޝްހޫރު އޭއައި ލެބް "ޑީޕްމައިންޑް" ގެ އެއް ބާނީކަމެވެ. އޭނާ މައިކްރޮސޮފްޓާ ގުޅިވަޑައިގެންނެވީ 2024 ވަނަ އަހަރުގެ ކުރީކޮޅުއެވެ. މި ދެ ކުންފުނީގެ މެދުގައި ހިނގަމުންދާ "އޭއައި ރޭހު" ގައި އިންސާނުންނާ އެއްވަރަށް ނުވަތަ އެއަށްވުރެ މޮޅަށް ވިސްނޭ ނިޒާމުތައް (އޭޖީއައި) އުފެއްދުމަށް މަސައްކަތްކުރަމުންދާއިރު، އޭގެ ސަބަބުން ނުކުމެދާނެ ނުރައްކާތަކާ މެދު ދުނިޔޭގެ ފެންވަރުގައި ބޮޑެތި ބަހުސްތަކެއް ވަނީ ފެށިފައެވެ.