އާޖެންޓީނާގެ ކެޕްޓަން ލިއޮނަލް މެސީ އެމެރިކާލީގުގައި ދައްކަމުންދާ ތަފާތު މޮޅު ކުޅުމާއެކު، ކުރިއަށް އޮތް ވޯލްޑް ކަޕަށް އޭނާ ހުރީ ތައްޔާރަށްކަން ދުނިޔެއަށް ސާބިތުކޮށްދީފިއެވެ. އުމުރުން 38 އަހަރުގައިވެސް މެސީ ދައްކަމުންދާ މޮޅު ކުޅުމާއި އެކު، ގިނަ ބަޔަކަށް ވަނީ ހައިރާންކަން ގެނުވާފައިއެވެ. މިއީ މެސީ ފަދަ މޮޅު ކުޅުންތެރިން ވޯލްޑް ކަޕް ފަދަ ބޮޑު މުބާރާތަކާއި ދިމާކޮށް އެހެން ޓީމުތަކަށް ދޭ ނުރައްކާތެރި ސިގުނަލެއް ކަމަށް އޭނާގެ ސަޕޯޓަރުން ބުނެއެވެ. ބުދަ ދުވަހުގެ ރޭ އެފްސީ ސިންސިނާޓީއާ ދެކޮޅަށް ކުޅުނު މެޗުގައި އިންޓަ މިއާމީ 5-3 އިން މޮޅުވިއިރު، މެސީ ވަނީ ދެ ލަނޑު ޖަހައި އިތުރު ދެ ލަނޑު ޖެހުމަށް އެހީތެރިވެދީފައެވެ. މި ސީޒަނުގައި ކުޅުނު 12 މެޗުން 11 ލަނޑު މެސީ ކާމިޔާބުކޮށްފައިވާއިރު، މި މޮޅާއެކު މިއާމީ ވަނީ އީސްޓަން ކޮންފަރެންސްގެ ދެވަނައަށް ޖެހިލާފައެވެ. މެޗުގެ 24 ވަނަ މިނެޓުގައި މެސީ ފުރަތަމަ ލަނޑު ޖަހައި މިއާމީއަށް ކުރިހޯދައިދިން ނަމަވެސް، ސިންސިނާޓީން ވަނީ ފަހަތުން އަރައި 2-1 އިން ލީޑު ނަގާފައެވެ. ނަމަވެސް 55 ވަނަ މިނެޓުގައި ރޮޑްރިގޯ ޑި ޕޯލް ތަނަވަސްކޮށްދިން ފުރުސަތަކުން މެސީ ވަނީ ދެވަނަ ލަނޑު ޖަހައި ނަތީޖާ ހަމަހަމަކޮށްފައެވެ. މެޗުގެ ފަހުކޮޅު މެސީގެ އެހީތެރިކަމާއެކު މިއާމީން ވަނީ އިތުރު ލަނޑުތައް ޖަހައި މެޗު ކާމިޔާބުކޮށްފައެވެ. އިންޓަ މިއާމީގެ ކޯޗު ގިލާމޯ ހޯޔޮސް މެސީއަށް ތައުރީފު ކުރަމުން ބުނީ، "ލިއޯއާ ބެހޭގޮތުން ވާހަކަދެއްކުމަކީ އެހާ ފަސޭހަކަމެއް ނޫން ކަމަށެވެ. ކޯޗު ބުނި ގޮތުން މެސީގެ މޮޅު ކުޅުމުގެ ވާހަތައް ދެއްކުމަކީ އޭނާއަށް ބޮޑު ހައިރާންކަމެއް ލިބޭ ކަމެއްކަމަށެވެ. އަދި މެސީ މިހާރު ހުރީ އޭނާގެ އެންމެ ރަނގަޅު ފޯމުގައި ކަމަށްވެސް ކޯޗު ފާހަގަކުރިއެވެ. 2022 ވަނަ އަހަރުގެ ވޯލްޑް ކަޕް ކާމިޔާބުކޮށްފައިވާ މެސީއަކީ ވޯލްޑް ކަޕް ތާރީޚުގައި އާޖެންޓީނާއަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ. އޭނާ ވަނީ ރެކޯޑް 11 ފަހަރު މެން އޮފް ދަ މެޗު އެވޯޑް ހޯދައި، ދެ ފަހަރު ގޯލްޑަން ބޯލް ކާމިޔާބުކޮށްފައެވެ. ކުރިއަށް އޮތް ވޯލްޑް ކަޕްގައި އާޖެންޓީނާ ހިމެނެނީ އަލްޖީރިއާ، އޮސްޓްރިއާ އަދި އުރުދުންއާއެކު ގްރޫޕް ޖޭގައެވެ. ޖޫން 17 ވަނަ ދުވަހު ކެންސަސް ސިޓީގައި އަލްޖީރިއާއާ ދެކޮޅަށް ކުޅޭ މެޗުން އާޖެންޓީނާގެ ވޯލްޑް ކަޕް ކެމްޕޭން ފަށާއިރު، މިހާރު އޮތް ފޯމަށް ބަލާއިރު މެސީގެ ޓީމަކީ މުބާރާތުގެ އެންމެ ބޮޑު ފޭވަރިޓެވެ.