ޖުޑީޝަލް ސާވިސަސް ކޮމިޝަން (ޖޭއެސްސީ)ގެ މެންބަރު ކަމުން ވަކިކުރަން ބަޔަކު މަސައްކަތް ކުރަނީ ރާއްޖޭގެ ރައީސް ކަމަށް އެ މަނިކުފާނު ވަޑައިގެންފާނެތީ ކަމަށް މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ. ޖުމްހޫރީ ޕާޓީގެ ފަރާތުން ރިއާސީ ރޭހަށް ނުކުންނަވާ އެ ޕާޓީގެ ލީޑަރު ގާސިމް އިބްރާހިމް ރޭ ތާޖުއްދީން ސްކޫލްގައި ބޭއްވި ކެމްޕޭން ޖަލްސާގައި ވާހަކަ ދައްކަވަމުން ވިދާޅުވީ މަޖިލީހުގެ އުގޫފާރު ދާއިރާގެ މެންބަރު ޑރ. އަފްރާޝިމް އަލީ ޖޭއެސްސީގެ މެންބަރުކަމުން ވަކިކުރިތާ މާ ގިނަ ދުވަހެއް ނުވެ އެ މަނިކުފާނު ވަރަށް އަނިޔާވެރި ގޮތަކަށް އަވަހާރަކޮށްލާފައިވާ ކަމަށެވެ. އަދި އެގޮތަށް އެ މަނިކުފާނާ މެދު ވެސް ބަޔަކު ކަންތައްކުރަން މަސައްކަތްކުރަނީ ކަމަށް ވެދާނެ ކަމަށް ގާސިމް ވިދާޅުވި އެވެ."އެއީ އަޅުގަނޑު ގަދަވެ ސަލާމަތުން ދުނިޔޭގައި ހުރެ ރައީސުލް ޖުމްހޫރިއްޔާ ކަމުގެ މަގާމު ކާމިޔާބު ކޮށްފާނެތީ މިދެންނެވި މަގުން ބަޔަކު ވިސްނާ ވިސްނުންތަކެއް ވެސް ތޯއްޗެ! އެކަމަކު އެކަމާ އަޅުގަނޑު ކަންބޮޑެއް ނުވޭ." ގާސިމް ވިދާޅުވި އެވެ.އޭނާ ވިދާޅުވީ ރައީސް ކަމަށް ވަޑައިގަތުމުގެ ޝައުގިވެރިކަން އޭނާ ގެންގުޅުއްވަނީ ލިބޭ މުސާރަ އާއި މަގާމުގެ ދަހިވެތި ކަމުގައި ނޫން ކަމަށެވެ. ނަމަވެސް އެ މަނިކުފާނަކީ ރާއްޖޭގެ ޑިމޮކްރަސީ އަށް ގިނަ މަސައްކަތްތަކެއް ކޮށްފައިވާ ފަރާތަކަށްވާތީ އެ މަސައްކަތް ފުރިހަމަކުރުމަށް މިހާރު އޮތް މަގަކީ ވެރިކަމަށް ވަޑައިގަތުން ކަމަށް ވެސް ގާސިމް ވިދާޅުވި އެވެ."އަޅުގަނޑަށް [ވެރިކަމަށް އަންނަން] މަޖުބޫރުވެގެން މިއުޅެނީ މިހުރިހާ ކަމެއް ކުރެވިފައި އޮތުމުން. [ކެހި ކަނޑުލުގެ] ހިތި ފިލުވަން، އަޅުގަނޑު ސާބިތު ކަމާއެކު ދަންނަވަން ތިޔަ ބޭފުޅުން އަޅުގަނޑާ [މަސްއޫލިއްޔަތު] ހަވާލުކޮށްދީފިވިއްޔާ ދިވެހި ރައްޔިތުންނަށް ރޯޝަނީކަން ގެނެސްދޭނަން، އެއްލައްކަ ރުފިޔާގެ މުސާރަ ހޯދާކަށް ނޫން އަޅުގަނޑު މިއުޅެނީ އަޅުގަނޑަށް ވަނީ މި ދައުލަތު ދަށުގައިވާ އެއްވެސް މީހަކަށް ދެއްވި އެންމެ މަތީ ނިއުމަތް ދެއްވާފައި،" ގާސިމް ވިދާޅުވި އެވެ.އެ މަނިކުފާނު ރޭ ވެސް ވަނީ ވައުދުތަކެއް ވެވަޑައިގެންފަ އެވެ. އެގޮތުން ގާސިމްގެ ވެރިކަމެއްގައި ފުލުހުންގެ ތަހުގީގުތަކަށް ބޭނުންވާ އެންމެ ޒަމާނީ ވަސީލަތްތައް ހޯއްދަވައި ދެއްވާނެ ކަމަށް ވައުދުވެ ވަޑައިގަތެވެ. އަދި ފުލުހުން މަގުމަތީގެ އަމަން އަމާންކަން ގާއިމްކުރުމަށް ކުރާ މަސައްކަތް މިހާރަށް ވުރެ ހަލުވި ކުރައްވާނެ ކަމަށް ވިދާޅުވި އެވެ.ގާސިމް އިތުރަށް ވައުދުވެވަޑައިގަތީ މާލޭ ބަނދަރުގައި ހުންނަ ބޯޓުތަކާއި މަސްއޮޑިފަހަރުގެ ސަލާމަތީ ކަންތައްތައް ވަރުގަދަކުރުމަށް ފުލުހުންނަށް އިތުރު ބާރުތަކެއް ދެއްވާނެ ކަމަށެވެ. އަދި އެފަދަ އޮޑިފަހަރުން މާލެ އަންނަ މީހުންނަށް ފަސޭހަވާނެ ގޮތަށް ހާބަރުގައި ގިނަ ހިދުމަތްތަކެއް ތަރައްގީކުރައްވާނެ ކަމަށް ވެސް ވިދާޅުވި އެވެ.