އެމެރިކާގެ ރައީސް ޑޮނަލްޑް ޓްރަމްޕް ޗައިނާއަށް ފައްޓަވާފައިވާ ދަތުރުގައި އެ ގައުމުގެ ރައީސް ޝީ ޖިންޕިންއާ ބައްދަލުކުރައްވައި މިއަދު މަޝްވަރާތައް ފައްޓަވާނެ އެވެ.
ދުނިޔޭގެ އެންމެ ބޮޑު ދެ ބާރުގެ މެދުގައި އުފެދިފައިވާ މައްސަލަތަކަށް ހައްލެއް ހޯދުމަށް ބާއްވާ މި ސަމިޓުގައި، ވިޔަފާރީގެ ގުޅުންތަކާއި، އީރާން މައްސަލަ އަދި ތައިވާނާ ގުޅޭގޮތުން ފުޅާ ދާއިރާއެއްގައި މަޝްވަރާކުރަން ހަމަޖެހިފައިވެ އެވެ.
ބުދަ ދުވަހުގެ ރޭ އެއާ ފޯސް ވަންގައި ބެއިޖިންއަށް ވަޑައިގަތުމުން، ޓްރަމްޕަށް ޗައިނާއިން ވަނީ ރަތް ދޫލައިގެ  މަރުހަބާއެއް ކިޔައިފަ އެވެ. މި ރަސްމިއްޔާތުގައި 300 އެއްހައި ކުދިން އެމެރިކާ އާއި ޗައިނާގެ ދިދަ ހޫރުވަމުން ދިޔަ އެވެ.
ރަސްމީ މަޝްވަރާތައް ފެށުމުގެ ކުރިން، ޓްރަމްޕް ވަނީ ޗައިނާގެ ތާރީޚީ "ޓެމްޕަލް އޮފް ހެވަން" އަށް ޒިޔާރަތްކުރައްވައިފަ  އެވެ. އަދި މިރޭ ދެ ބޭފުޅުން ބައިވެރިވެވަޑައިގަންނަވާ ހާއްސަ ރަސްމީ ޖާފަތެއް އޮންނާނެއެވެ.
ޓްރަމްޕްގެ އަރިހުގައި މި ދަތުރުގައި އެމެރިކާގެ އެންމެ ބޮޑެތި ކުންފުނިތަކުގެ ސީއީއޯ އިން ބައިވެރިވެވަޑައިގަންނަވަ އެވެ. އޭގެ ތެރޭގައި ޓެސްލާގެ ވެރިޔާ އީލޮން މަސްކް އަދި އެންވިޑިއާ ކުންފުނީގެ ވެރިޔާ ޖެންސަން ހުއާން ހިމެނެ އެވެ.
ޓްރަމްޕް ވިދާޅުވި ގޮތުގައި އޭނާގެ ބޭނުމަކީ ޗައިނާގެ ބާޒާރުތައް އެމެރިކާގެ ކުންފުނިތަކަށް އިތުރަށް ހުޅުވާލުމެވެ. ދެ ގައުމުގެ މެދުގައި އޮތް "ޓްރޭޑް ވޯ" ނުވަތަ ވިޔަފާރީގެ ހަނގުރާމައިގެ ތެރެއިން، މިދިޔަ އޮކްޓޯބަރު މަހު އެއްބަސްވި "ޓެރިފް ޓްރޫސް" ނުވަތަ ޓެކްސް ބޮޑުނުކުރުމުގެ އެއްބަސްވުން އިތުރު ކުރުމާ ބެހޭގޮތުން ވެސް މި ސަމިޓުގައި ގޮތްތަކެއް ނިންމާނެ އެވެ.
މި ބައްދަލުވުމުގެ އެންމެ އުނދަގޫ ވާނީ ސިޔާސީ އަދި ސަރަހައްދީ މައްސަލަތައް ކަމަށް ބެލެވެ އެވެ.
މިއީ 2017 ވަނަ އަހަރަށްފަހު އެމެރިކާގެ ރައީސަކު ޗައިނާއަށް ކުރައްވާ ފުރަތަމަ ދަތުރެވެ. ޓްރަމްޕް ވިދާޅުވި ގޮތުގައި އޭނާ އާއި ރައީސް ޝީއާ ދެމެދު އޮތީ ވަރުގަދަ އަމިއްލަ ގުޅުމެކެވެ. މި ދަތުރަށް ފަހު، 2026 ވަނަ އަހަރުގެ ފަހުކޮޅު ރައީސް ޝީ އެމެރިކާއަށް ކުރައްވާނެ  ތާރީހު ކަނޑައެޅޭނެ ކަމަށް ބެލެވެއެވެ.
ދެ ގައުމުގެ މަޝްވަރާތައް ހުކުރު ދުވަހު ނިންމާލުމަށްފަހު ޓްރަމްޕް އެނބުރި ވޮޝިންގްޓަނަށް ފުރާވަޑައިގަންނަވާނެ އެވެ.