މިނިސްޓަރު ވިދާޅުވި ގޮތުގައި ދުނިޔޭގެ ކުރިއަރާފައިވާ ގިނަ ގައުމުތަކުގައި ވެސް މައުލޫމާތު ހޯދުމަށް ވަކި ފީއެއް ނަގައެވެ. ރާއްޖޭގައި ދައުލަތުގެ 80 އެއްހާ މުއައްސަސާ ހިނގަމުންދާއިރު، ކޮންމެ ދުވަހަކު ލިބޭ ގިނަ އަދަދެއްގެ އާރުޓީއައި ހުށަހެޅުންތަކަށް ޖަވާބުދިނުމަށް ކޮންމެ އިދާރާއެއްގައި މަދުވެގެން ދެ މުވައްޒަފުން ތިބެންޖެހޭކަން ފާހަގަކުރައްވައި، މިއީ ހަރަދު ހިނގާ “ކޮސްޓްލީ ޕްރޮސެސް” އެއްގެ ގޮތުގައި އޭނާ ސިފަކުރެއްވިއެވެ.
މީގެ އިތުރުން، ބައެއް ހާލަތްތަކުގައި ހޯދަން އެދޭ މައުލޫމާތަކީ ވަރަށް ތަފުސީލީ އަދި ހޯދަން އުނދަގޫ މައުލޫމާތަށް ވުމުން ވެސް ހަރަދު ބޮޑުވާކަމަށް މިނިސްޓަރު ވިދާޅުވިއެވެ. އަދި މައުލޫމާތު ހާމަކުރުމުގައި، އެހެން މީހުންގެ ޒާތީ މައުލޫމާތު ރައްކާތެރިކުރުމާއި އިންސާފު ހޯދުމުގެ ހައްގު ފަދަ ކަންކަމަށް ރައްކާތެރިވުމަށް ވިސްނަންޖެހޭތީ، މިއީ ހަމައެކަނި އަވަހަށް ފޮނުވާލާ މައުލޫމާތަކަށް ވުރެ ފުންކޮށް ވިސްނަންޖެހޭ ކަމެއް ކަމަށް ވެސް އިހުސާން ވިދާޅުވިއެވެ.