މުޖުތަމައަށް ބޭނުންވާ ގާބިލު ލީޑަރުންނާއި އާ އީޖާދީ ވިސްނުންތައް އުފަންވަނީ އިލްމީ ބަހުސްތަކާއި ހިޔާލުބަދަލުކުރުންތަކުގެ ތެރެއިންކަމަށް ދިވެހިބަހާއި ސަގާފަތާއި ތަރިކައާ ބެހޭ މިނިސްޓަރު ހީނާ ވަލީދު ވިދާޅުވެއްޖެއެވެ. އެކަމަނާ މިހެން ވިދާޅުވީ، ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ ދަރިވަރުންގެ ޔޫނިއަނުން ބޭއްވި ބަހުސް މުބާރާތުގެ ނިމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
މިނިސްޓަރު ހީނާ ވަލީދު ވިދާޅުވި ގޮތުގައި، ގައުމެއްގެ އުޖާލާ މުސްތަގުބަލެއް ކަށަވަރުކުރުމަށްޓަކައި އިލްމީ ބަހުސްތަކަށް ފުޅާ ދާއިރާއެއްގައި ފުރުސަތު ދިނުމަކީ ކޮންމެހެން ކުރަންޖެހޭނެ ކަމެކެވެ. އެހެންކަމުން، ތައުލީމީ އެންމެހައި މަރުހަލާތަކެއްގައި، ހާއްސަކޮށް މަދަރުސީ އަދި ޔުނިވަރސިޓީ ފެންވަރުގައި ބަހުސްކުރުމުގެ ރޫހު އާލާކުރުމަށް އެކަމަނާ ވަނީ ބާރުއަޅުއްވާފައެވެ.
މިހާރުގެ މުޖުތަމައުގައި ހުރި މައްސަލަތަކާމެދު އިލްމީ ނަޒަރަކުން ބަހުސްކުރެވި، އަންނަން އޮތް ޖީލުތަކަށް ރަނގަޅު މަގެއް ކޮށައިދިނުމުގެ މުހިންމުކަން ވެސް މިނިސްޓަރުގެ ވާހަކަފުޅުގައި ފާހަގަކުރެއްވިއެވެ. ހަމައެހެންމެ، އެކިއެކި ދާއިރާތަކުން މީހުން ހޭލުންތެރިކުރުވައި ވިސްނުން ތަނަވަސްކުރުމަށް ގިނަ މަސައްކަތްތަކެއް ކުރަންޖެހިފައިވާކަން ބަޔާންކުރައްވަމުން، އެމްއެންޔޫގެ ދަރިވަރުންގެ ޔޫނިއަންގެ ހިންގުންތެރިކަމަށް އެކަމަނާ ތައުރީފުކުރެއްވިއެވެ. އަދި އެ ޒުވާނުންނަކީ މި އަމާޒުތަކަށް ވާސިލުވުމުގެ ފުރިހަމަ ގާބިލުކަން ހުރި ބައެއްކަން ފާހަގަކުރައްވައި އެފަރާތްތަކަށް ޝުކުރުއަދާކުރެއްވިއެވެ.
އެމްއެންޔޫ ސްޓޫޑަންޓް ޔޫނިއަނުން ކޮންމެ އަހަރަކު ކުރިއަށްގެންދާ ބަހުސް މުބާރާތަކީ އެ ޖަމުއިއްޔާގެ އެންމެ ޝަރަފުވެރި އަދި އެންމެ ދުވަސްވީ އެއް ހަރަކާތެވެ. މި މުބާރާތުގެ މައިގަނޑު ބޭނުމަކީ ދިވެހި ބަހުގެ ހަމަތަކާއި އުސޫލުތައް ހިފަހައްޓައި، ފަށުވިކަމާ އެކު ވާހަކަދެއްކުމުގެ ހނަރު ދަރިވަރުންގެ ކިބައިގައި އަށަގެންނެވުން ކަމަށް އެ ޔޫނިއަނުން މައުލޫމާތުދެއެވެ. މި މުބާރާތުގެ ތެރެއިން މިހާތަނަށް މޮޅެތި ވާހަކަދެއްކުންތެރިންތަކެއް ވަނީ މުޖުތަމައަށް ނެރެދީފައެވެ.