ސަރުކާރުގެ ހުރިހާ ސްކޫލްތަކެއްގެ ކްލާސް ރޫމްތައް އޭސީކުރަން މިދިޔަ އަހަރު ފެށި މަޝްރޫއުގެ ދަށުން މި އަހަރުގެ ސެޕްޓެމްބަރަށް ހުރިހާ ސްކޫލެއް އޭސީ ކުރެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކިފާނު ރ. އަތޮޅަށް މިހާރު ކުރައްވަމުން ގެންދަވާ ދަތުރުގެ ތެރެއިން މިއަދު އެންމެ ފުރަތަމަ ރަށަކަށް ހުޅުދުއްފާރަށް ވަޑައިގެން ރައްޔިތުންނާ އެކ ބޭއްވި ބައްދަލުވުމުގައި ވިދާޅުވީ ޢާދަކުރަނިވި ހަކަތައިގެ ނިޒާމު ބޭނުންކޮށްގެން ހިންގާ މަަޝްރޫއު ސެޕްޓެމްބަރު މަހުގެ ނިޔަލަށް ނިންމައިލެވޭނެ ކަމަށެވެ.
ސްކޫލްތަކުގެ ކްލާސް ރޫމްތައް އޭސީ ކުރަން "ކޫލް ސްކޫލް" ޕްރޮޖެކްޓް ރަސްމީކޮށް އިފުތިތާހުކުރީ މިދިޔަ އަހަރުގެ ޖޫން 2 ގައި ކ. މާފުށިންނެވެ.
އެޑިއުކޭޝަން މިނިސްޓަރު ޑރ. އިސްމާއީލް ޝަފީގު ވިދާޅުވެފައިވާ ގޮތުގައި ސްކޫލްތައް އޭސީކުރުމުން މިހާރު ދައުލަތުން ކުރާ ހަރަދަށްް އިތުރު ވާނީ 38 ޕަސެންޓް ކަމަށާއި އެ ޕްރޮޖެކްޓްގެ 30 ޕަސެންޓް ކުރިއަށް ދާނީ އިޔާދަކުރަނިވި ހަކަތައިގެ އެހީގައި ކަމަށެވެ. އެގޮތުން މި މަޝްރޫއު ކުރިއަށް ގެންދަނީ ސަރުކާރާއި އަމިއްލަ ފަރާތްތަކުގެ އެހީތެރިކަމާ އެކު ކަމަށް ވިދާޅުވެފައިވެ އެވެ.
ހުޅުދުއްފާރުގައި ރައީސް މިއަދި ވިދާޅުވީ އެ ރަށުގެ ސްކޫލަށް ދިމާވެފައިވާ ޖާގައިގެ ދަތިކަން ހައްލުކޮށް ދޭން 12 ކްލާސްރޫމް އަޅައި ދެއްވާނެ ކަމަށެވެ. އަދި އެ މަސައްކަތް ލަސްތަކެއް ނުވެ ބަޔަކާ ހަވާލު ކުރެވޭނެ ކަމަށް ވިދާޅުވި އެވެ.
"އަޅުގަނޑު ގަބޫލުކުރާ ސިޔާސަތަކީ ޢިމާރާތެއްގެ އިތުރުން ގައުމަށް ތަރައްގީ ގެނެވޭނީ ޒުވާން ޖީލަށް ތައުލީމާއި ތަރުބިއްޔަތު ދީގެން،" ރައީސް ވިދާޅުވި އެވެ ."އެހެންކަމުން ސްކޫލަށް ވަސީލަތް ހޯދައި ދިނުމަކީ ވަށައިޖެހޭ ތަރައްގީ. ހިތްހަމަ ޖެހޭ މާހައުލެއް ޤާއިމްކުރުމަކީ އޭގެ އުފާވެރިކަން ލިބޭނެ ކަމެއް."
އެހެންކަމުން ސްކޫލަކަށް ބޭނުންވާ އިންފްރާސްޓްރަކްޗާ އާއި އެ ނޫންވެސް ވަސީލަތް ގާއިމުކޮށް ތަޢުލީމީ ދާއިރާ އަށް ވަރަށް އިސްކަން ދެއްވާ ކަމަށް ވިދާޅުވި އެވެ.