އެމަނިކުފާނަކީ އަބަދުވެސް ސިޔާސީ ގޮތުން ރައީސް ޔާމީންގެ ވާދަވެރިއެއްކަން ރައީސް ޔާމީންއަށް އެނގިވަޑައިގަންނަވާނޭކަން ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ. ރޭ ސަންގު ޓީވީގައި ވާހަކަދައްކަވަމުން އުމަރު ވިދާޅުވީ ރައީސް ޔާމީންގެ ވެރިކަމުގައި ވަޒީރަކަށް ހުންނެވި އިރުވެސް އޭނާއަކީ ރައީސް ޔާމީންގެ ވާދަވެރިއެއްކަމަށެވެ. "އެމަނިކުފާނަށް އެނގިވަޑައިގަންނަވާނެ އަޅުގަނޑަކީ އެމަނިކުފާނުގެ ސިޔާސީ ވާދަވެރިއެއްކަން. އެހެންވީމާ އަޅުގަނޑު، ސިޔާސީ ވާދަވެރިޔާގެ ގޮތުގައި ހޯމް މިނިސްޓަރުކަމުގައި ހުރީ،" އުމަރު ވިދާޅުވިއެވެ. އަދި ރައީސް ޔާމީން ކަމެއް ކުރައްވަން ބޭނުންފުޅު ނަމަ އުމަރަށް ނާންގަވާ އެކަމެއް ކުރައްވާކަންވެސް އުމަރަށް އެނގިވަޑައިގަންނަވާކަމަށް އުމަރު ވިދާޅުވިއެވެ. "އެބޭފުޅާ ކަމެއް ކުރައްވަން ވެއްޖެޔާމުން ބޭނުންވާނަމަ އަޅުގަނޑަށް ނާނގާ އެހެން ބޭފުޅުންނަށް އެކަން އަންގަވައިގެން ކުރައްވާކަން އަޅުގަނޑަށް އެނގޭ. ދެން އަޅުގަނޑަށް ހުއްޓުވޭކަންކަން ހުއްޓުވަންވެސް ހުއްޓުވަން،" އުމަރު ވިދާޅުވިއެވެ. އޭނާ ވިދާޅުވީ އެކަން ރައީސް ޔާމީނަށް އެނގިވަޑައިގެން ނަމަވެސް ގާނޫނާ ހިލާފަށް އެއްވެސް ކަމެއް ކުރުމަށް ދުވަހަކުވެސް އަންގާފައިނުވާކަމަށެވެ. އަދި އަބަދުވެސް ރައީސް ޔާމީންގެ އެއްބާރުލުން ލިބިފައިވާކަމަށެވެ. އުމަރު އިތުރަށް ވިދާޅުވީ 2023 ވަނަ އަހަރު ގެ ރިޔާސި އިންތިހާބު އަންނަ އިރު ކޮންމެ ޕާޓީއަކުން ވެސް ޑިމަކުރަސީ ގެ އުސޫލާ އެއްގޮތަަށް އަމަލުކުރަން އުޅޭނެކަމަށެވެ. ނަމަވެސް އެއްވެސް ޕާޓީއަކުން އެއާ އެއްގޮތަށް އަމަލުނުކުރާކަމަށެވެ. އެގޮތުން އެމްޑީޕީގައިވެސް އަދި ޕީޕީއެމްގައިވެސް ރިޔާސީ ޕްރައިމެރީއެއް ނޯންނާނެކަމަށް އުމަރު ލަފާކުރެއްވިއެވެ.