މިސަރުކާރުގެ ފުރަތަމަ ޓްއަރިޒަމް މިނިސްޓަރު ޢަލީ ވަހީދު ފުރުވާލީ ރައީސް ޞާލިޙު ކޮމްޕްރޮމައިޒް ވެދާނެފަދަ މަޢުލޫމާތު އޭނާ އަތުގައި ހުރުމުން ކަމަށް ކުރީގެ ހޯމް މިނިސްޓަރު އުމަރުނަސީރު ވިދާޅުވެއްޖެއެވެ.
ރޭ ދިވެހި ޗެނަލްގެ "ހަވާސާ" ޕްރޮގްރާމްގައި ވާހަކަ ދައްކަވަމުން އުމަރު ވިދާޅުވީ މިސަރުކާރުން ޚާއްސަކޮށް ރައީސް ޞާލިޙު އާއި ފޮރިން މިނިސްޓަރު ޝާހިދުއާއި 2 ބޭފުޅުން ޢަލީ ވަހީދު ފުރުވާލީކަމަށާއި އެއީ ސަތޭކަ ޕަސެންޓް ޔަގީންވާ ކަމެއް ކަމަށެވެ.
ސަބަބަކީ ރައީސް ޞާލިޙު ކޮމްޕްރޮމައިޒް ވާނެފަދަ ކޮންމެވެސް ޑޮކިޔުމެންޓެއް ޢަލީ ވަހީދު އަތުގައި އޮތުމުން ކަމަށާއި، އެއީ އެމްއެމްޕީއާރުސީގެ މައްސަލައާއި ގުޅުންހުރި ޑޮކިޔުމެންޓެއްކަމަށްވެސް ވެދާނެ ކަމަށް އުމަރު ވިދާޅުވިއެވެ.
އުމަރު ވިދާޅުވީ ސަރުކާރުން މިއަދު ޢަލީ ވަހީދު އިނގިރޭސި ވިލާތުގައި ބަހައްޓައިގެން ހުރިހާ އުސޫލުތަކަކާއި ޚިލާފަށް ކްރިމިނަލް ކޯޓުގައި މައްސަލަ ނުހިންގޭނެކަމަށާއި، ޕީޖީ ވެސް އެހެން މައްސަލަ ނުހިންގޭނެކަމަށް ވިދާޅުވާ ކަމަށެވެ.
މިއާއި އެކު އުމަރު ވިދާޅުވީ މިއީ ކްރިމިނަލް ކޭހެއްގައި މިފަދައިން ޢަމަލުކުރާ ފުރަތަމަ ފަހަރުކަމަށާއިމިގޮތަށް ޢަމަލުކުރަންފެށުނީ ކިހިނެއްތޯ ސުވާލު އުފައްދާފައެވެ.
އަދި ޢަލީ ވަހީދުގެ މައްސަލަ ހިނގާގޮތުން ޕީޖީ ޝަމީމްވެސް ހުންނެވީ ގޮތް ހުސްވެފައިކަމަށް އުމަރު ވިދާޅުވިއެވެ.
މީގެ އިތުރުން އުމަރު ވިދާޅުވީ އަންހެން ކުދިންތަކަކަށް ޖިންސީ ގޯނާކުރި ރޭޕިސްޓަކު ހިމާޔަތްކޮށް ރައްކާތެރިކަން ދިނުމަށް މިކުރާ މަސައްކަތުގެ ނަތީޖާ 2023 ވަނަ އަހަރުގެ ވޯޓުފޮށިން ފެންނާނެކަމަށެވެ.