ރާއްޖޭގައި ހަލުވިކަމާއެކު ކޮވިޑް-19 ބަލި ފެތުރޭތީ، ބައްޔާ ގުޅިގެން އަޅާފައިވާ ފިޔަވަޅުތައް އިތުރަށް ވަރުގަދަކުރަން ކުރީގެ ރައީސް މައުމޫން އަބްދުލް ގައްޔޫމް ގޮވާލައްވައިފިއެވެ.
ރައީސް މައުމޫން ކުރެއްވި ޓުވީޓެއްގައި ވަނީ މިހާރު ރާއްޖޭގެ ކޮވިޑް-19 ގެ ހާލަތާއި ގުޅިގެން ކަންބޮޑުވުން ފާޅުކުރައްވާފައެވެ. އެެހެންކަމުން ކޮވިޑާއި ގުޅިގެން އަޅާފައިވާ ފިޔަވަޅުތައް ހަރުކަށިކުރުމަށް ވަނީ ގޮވާލައްވާފައެވެ.
ރައީސް މައުމޫންގެ ޓުވީޓްގައި ރައީސް އޮފީހާއި، ހެތްލް ޕްރޮޓެކްޝަން އެޖެންސީވެސް ޓެގް ކުރައްވާފައިވެއެވެ.
ރާއްޖޭގައި ކޮވިޑްގެ ކޭސްތައް އިތުރުވަމުން އަންނައިރު، އިއްޔެ އެކަނިވެސް 300 އަށް ވުރެ ގިނަ މީހުން ރާއްޖެއިން ޕޮޒިޓިވްވެފައި ވެއެވެ.
ރާއްޖޭގައި ކޮވިޑްގެ އަނެއްކާވެސް ކޭސްތައް އިތުރުވާން ފަށާފައި މިވަނީ، ދުވާލަކަށް ޕޮޒިޓިވްވާ ކޭސްތަކުގެ އަދަދު 100 އިންވެސް ތިރިއަށް ދިޔުމަށް ފަހުގައެވެ.
ކޮވިޑްގެ ކޭސްތައް އިތުރުވާތީ، ހޮސްޕިޓަލްތަކުގައި އެޑްމެޓްކޮށްގެން ފަރުވާދޭ މީހުންގެ އަދަދުވެސް ވަނީ އިތުރުވާން ފަށާފައެވެ.
ބަލީގެ ސަބަބުން އަތޮޅުތެރެއިންވެސް ގިނަ ރައްތަކެއް މޮނިޓަރިންގެ ހާލަތުގައި އޮތް އިރު، މާލެ ސަރަހަށްދުގައި އެޅި ގިނަ ފިޔަވަޅުތަކަށް ވަނީ ލުއިދީފައެވެ. އެގޮތުން ސުކޫލްތަކާއި ޕާކުތައް ހުޅުވާލުމާއި، ވަކި ގަޑިތަކެއްގައި މާލެ ސަރަހަށްދުގައި ހިންގި ކާފިއުވެސް މިހާރު ވަނީ އުވާލާފައެވެ.