"ދެން މިޒަމާނަކު ނުޖެހޭ 17 އަހަރުވަންދެން ގާނޫނުއަސާސީ އިސްލާހުކުރަން ތިބި ގޮތަށް ގާނޫނުތައް އިސްލާހުކުރަން ތިބޭކަށެއް. އެއަށްވުރެ މާ ބާރު ސްޕީޑުގަ ރައްޔިތުން އެބަ ބޭނުންވޭ ކަންކަން ކުރިއަށް ދާން،"
އިއްޔެ ރައްޔިތުންގެ މަޖިލީހުން ގާނޫނުއަސާސީއަށް އިސްލާހު ގެނައުމުގެ ބިލު އެދުވަހުން އެދުވަހަށް ފާސްކުރީ މަޖިލީހުގެ ގަވާއިދުގައި ބުނާ ހުރިހާ އިޖުރާއަތްތަކެއް ފުރިހަމަކޮށްގެން ކަމަށާއި، މިއީ އަލަށް ކުރި ކަމެއް ވެސް ނޫން ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ޕާޓީ ބަދަލުކުރާ މެންބަރުންގެ ގޮނޑި ގެއްލޭ ގޮތަށް ސަރުކާރުގެ ފަރާތުން ހުޅުދޫ ދާއިރާގެ މެންބަރު، މުހައްމަދު ޝާހިދު ހުށަހެޅުއްވި ބިލުގެ ފުރަތަމަ ކިޔުން އިއްވައި، ބަހުސްކޮށް އަދި ކޮމެޓީއަށް ފޮނުވައި، ކޮމެޓީން ފާސްކުރުމަށްފަހު މަޖިލީހުން ބިލު ފާސްކޮށްފައި ވަނީ ގާތްގަނޑަކަށް ހަތް ގަޑިއިރު ތެރޭގަ އެވެ.ބިލުގެ މަސައްކަތް އެހާ އަވަސް އަރުވާލައިގެން ނިންމާލުމުން އެކި ފަރާތްތަކުން ކިޔަމުންދާ ފާޑުކިޔުންތައް، އަބްދުއްރަހީމް ވަނީ ދިފާއު ކުރައްވާފަ އެވެ. ޕީއެސްއެމް ނިއުސްއަށް ދެއްވި އިންޓަވިއުއެއްގައި އޭނާ ވިދާޅުވީ 20 ވަނަ މަޖިލީހުން އިއްޔެ ފާސްކުރި އިސްލާހުތަކަކީ މީގެ ކުރީގެ ދެ ސަރުކާރަށް ވެސް ކުރަން ކެރުނު ކަމެއް ނޫން ކަމަށެވެ.އަބްދުއްރަހީމް ވިދާޅުވީ 18 އަދި 19 ވަނަ މަޖިލީހުން ވެސް އެންޓި ޑިފެކްޝަން ބިލު ފާސްކުރި ކަމަށާއި ނަމަވެސް އެކަމަށް ދާއިމީ ހައްލެއް ލިބެން އޮތީ ގާނޫނުއަސާސީ އިސްލާހު ކޮށްގެން ކަމަށް އޭރުވެސް ވިދާޅުވަމުން އައި ކަމަށެވެ."އަޅުގަނޑު މިސާލަކަށް އައީ ފޮނަދޫ ދާއިރާގެ މެންބަރަކަށް ޕީއެންސީ ޓިކެޓުގަ ހޮވިގެން، އައިސްފަ އަޅުގަނޑުގެ އަމިއްލަ ފައިދާއަށްޓަކާ މާދަން އެޕާޓީ ދޫކޮށްފަ އެހެން ޕާޓީއަކަށް ދާން ނުވަތަ އެޕާޓީ ދޫކޮށްފަ މިނިވަންވާން އަޅުގަނޑަށް އިހްތިޔާރު އޮންނަ ކަމަށްވަންޏާ ރައްޔިތުންގެ ހައްގުތަކެއް އެބަދެޔޭ ނިގުޅައިގަނެގެން، ގެއްލިގެން،" ގާނޫނުއަސާސީ އިސްލާހު ކުރި ސަބަބުތައް ސާފުކޮށްދެއްވަމުން އަބްދުއްރަހީމް ވިދާޅުވި އެވެ.އެކި ފަރާތްތަކުން ކިޔަމުންދާ ފާޑުކިޔުންތަކަށް ރައްދު ދެއްވަމުން އޭނާ ވިދާޅުވީ ގާނޫނުއަސާސީއަށް އިސްލާހު ގެންނަ ހުރިހާ ކަމެއްގައި ރައްޔިތުންގެ ހިޔާލު ހޯދަން ނުޖެހޭނެ ކަމަށެވެ. މިއީ އެފަދަ ކަމެއް ކަމަށާއި ރައްޔިތުންގެ ހިޔާލު ހޯދަން ޖެހޭ ކަންކަމުގައި ހޯއްދަވާނެ ކަމަށެވެ.
އަދި އެ ބިލުގެ މަސައްކަތް އެއް ދުވަހުން ނިންމާލުމުން ހައިރާންވާން ނުޖެހޭނެ ކަމަށާއި، 18 އަދު 19 ވަނަ މަޖިލީހުގައި ވެސް އެގޮތަށް ބިލުތައް ފާސްކޮށްފައިވާ ކަމަށެވެ. އެއީ މަޖިލީހުގެ ގަވާއިދުން މަނާ ކުރާ ކަމެއް ވެސް ނޫން ކަމަށާއި، ބިލު ފާސްކޮށްފައި ވަނީ ގަވާއިދުގައި ބުނާ ހުރިހާ އިޖުރާއަތްތަކެއް ނުވަތަ މަރުހަލާތަކެއް ފުރިހަމަ ކޮށްގެން ކަމަށް އަބްދުއްރަހީމް ވިދާޅުވި އެވެ."ދެން މިޒަމާނަކު ނުޖެހޭ 17 އަހަރުވަންދެން ގާނޫނުއަސާސީ އިސްލާހުކުރަން ތިބި ގޮތަށް ގާނޫނުތައް އިސްލާހުކުރަން ތިބޭކަށެއް. އެއަށްވުރެ މާ ބާރު ސްޕީޑުގަ ރައްޔިތުން އެބަ ބޭނުންވޭ ކަންކަން ކުރިއަށް ދާން. އެބޭނުމުގަ ރައްޔިތުން ޕީއެންސީއަށް ސުޕަ މެޖޯރިޓީ ދިނީ،" އަބްދުއްރަހީމް ވިދާޅުވި އެވެ.
ގާނޫނުއަސާސީއަށް ގެނައި އިސްލާހުތަކުގެ ތެރޭގައި ތިން ކަމެއް ހިމެނެ އެވެ. އެއްކަމަކީ މަޖިލީސް މެންބަރުން އެހެން ސިޔާސީ ޕާޓީއަކަށް ބަދަލުވުން ގޮނޑި ގެއްލުމާއި، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން ގޮނޑި ގެއްލުމެވެ.އަނެއް އިސްލާހަކީ ރައީސުލްޖުމްހުރިއްޔާއަށް ލިބިދޭ ބާރުތަކުގެ ތެރެއަށް މާއްދާއެއް އިތުރުކުރުމެވެ. އެގޮތުން ދައުލަތުގެ މައިގަނޑު ސިޔާސަތުތައް ކަނޑައަޅައި، އެ ސިޔާސަތުތައް ސަރުކާރުގެ ކަމާބެހޭ އިދާރާތަކާއި މުއައްސަސާތަކަށް އަންގައި، އެ ތަންތަނަށް ބޭނުންވާ އިރުޝާދު ދިނުމުގެ އިތުރުން، ގައުމީ ތަރައްގީގެ ޕްލޭންތަކާއި ތަސައްވަރުތައް އެކަށައެޅުމުގެ ބާރު ރައީސަށް ލިބޭ ގޮތަށް އިސްލާހު ގެނެސްފައިވެ އެވެ.ދެން އޮތް އިސްލާހަކީ ރާއްޖޭގައި އަސްކަރީ ބޭނުމަކަށް ބޭރުގެ ސިފައިން ތިބެވޭނީ އަދި ހަރަކާތްތެރިވެވޭނީ މަޖިލީހުގެ ހަތަރުބައިކުޅަ ތިންބައިގެ ވޯޓުން ކަމާއި އަދި ރާއްޖޭގެ ސަރަހައްދާއި ކަނޑުގެ ސަރަހައްދަށް ބަދަލެއް ގެނެވޭނީ ވެސް މަޖިލީހުގެ ހަތަރުބައިކުޅަ ތިންބައިގެ ވޯޓުން ކަމެވެ.މި ބިލު އިއްޔެ މަޖިލީހުން ފާސްކުރެއްވުމާއެކު ވަގުތުން ރައީސް ޑރ. މުހައްމަދު މުއިއްޒު ވަނީ ބިލު ތަސްދީގު ކުރައްވާފަ އެވެ.
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ