6 ރައީސުންނާއި އެކު މަސައްކަތް ކޮށްފައިވާ 2 މުއައްޒަފަކު، ރައީސް އޮފީހުން ވަކިކޮށް މުއިއްޒު އަނިޔާވެރިކަމާއި އެކު އެއްލާލީ ޕީއެންސީ މީހުންނަށް ވަޒީފާ ދިނުމަށެވެ. ޤައުމިއްޔަތާއި، ޤައުމުގެ ރައްޔިތުންނަށް ހަރާން ކޯރުކަން ވެރިއެއްގެ ފަރާތުން އިހްސާސް ކުރެވޭނީ މިފަދަ އަމަލުތަކުންނެވެ. އެމީހެއްގެ އަސްލު ބުރަސޫރަ ފެނިގެންދާނީ މިފަދަ ކަންކަމުންނެވެ. މިކަން ވެގެން ދިޔައީ މުޅި ޤައުމަށް ލިބުނު ސިހުމަކަށެވެ.
މިކަމާއި ނުރުހުން ފާޅުކޮށް ގިނަ ނޫސްތަކެއްގައި މިވާހަކަ ޖަހާފައިވާއިރު، ގިނަ ފަރާތްތަކަކުން މިވާހަކަ ސޯޝަލް މީޑިޔާގައި ހިއްސާ ކޮށްފައިވެއެވެ.
ޤައުމުގެ އެންމެ އިސް އިދާރާ ކަމުގައިވާ ރައީސް އޮފީހުގައި 17 އަހަރަށް ވުރެ ގިނަ ދުވަހު ޚިދުމަތް ކުރި ދެ އަންހެން މުވައްޒަފުން ކުއްލިއަކަށް ވަޒީފާއިން ވަކިކުރި ޚަބަރަކީ މުޅި ޤައުމު ސިއްސުވާލި ޚަބަރެކެވެ. މި ދެ މުވައްޒަފުންނަކީ ރައީސް މައުމޫނުގެ ވެރިކަމުން ފެށިގެން މިއަދާ ހަމައަށް، 6 ރައީސުންގެ ދައުރުގައި ވަފާތެރިކަމާއެކު މަސައްކަތް ކޮށްފައިވާ ބައެކެވެ.
މި މުވައްޒަފުންގެ ވަޒީފާގެ ދިގު މުއްދަތުގައި، އެ މީހުންގެ އަމިއްލަ ދުޅަހެޔޮކަމަށްވުރެ ވަޒީފާގެ މަސްއޫލިއްޔަތުތައް އިސްކޮށް، އެއްވެސް މެދުކެނޑުމެއްނެތި ޚިދުމަތް ކޮށްދީފައިވެއެވެ. އެތައް ރޭދުވާލެއް އޮފީހުގެ މަސައްކަތުގައި ހޭދަކޮށް، އެ މީހުންގެ ޢާއިލާތަކަށް ދޭންވާ ވަގުތު ވެސް ޤުރުބާން ކޮށްފައިވެއެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 115 ވަނަ މާއްދާއިން ރައީސުލްޖުމްހޫރިއްޔާއަށް މުވައްޒަފުން އައްޔަންކުރުމާއި ވަކިކުރުމުގެ ބާރު ލިބިދީފައިވީ ނަމަވެސް، މިފަދަ ނިންމުންތައް ނިންމަންވާނީ އިންސާފުވެރިކަމާއި، ހާމަކަމާއި، ޖަވާބުދާރީވުމުގެ އުސޫލުތަކާ އެއްގޮތަށެވެ. ނަމަވެސް މި ދެ މުވައްޒަފުން ވަކިކުރުމުގައި މި އުސޫލުތަކަށް ޢަމަލުކޮށްފައިވާކަމަކަށް ނުފެނެއެވެ.
މި ދެ މުވައްޒަފުން ވަކިކުރި ސަބަބު ބަޔާންކޮށްދިނުމެއްނެތި، އެއްވެސް އިންޒާރެއް ދިނުމެއްނެތި، ކުއްލިއަކަށް ވަޒީފާއިން ވަކިކުރުމަކީ އެ މީހުންގެ އިތުރުން، އެ މީހުންގެ ޢާއިލާތަކަށްވެސް ލިބުނު ނުހަނު ބޮޑު ހިތްދަތިކަމެކެވެ.
މި ހާދިސާއިން އުފެދޭ އެންމެ ބޮޑު ސުވާލަކީ، ދިގު މުއްދަތެއްގައި ވަފާތެރިކަމާއެކު ޚިދުމަތްކުރާ މުވައްޒަފުންނަށް ލިބެންވާ ރައްކާތެރިކަމާއި، އިޙްތިރާމް ކޮބައިތޯއެވެ؟ އަދި މި ފަދަ ނިންމުންތަކުން ދައުލަތުގެ އެހެން މުވައްޒަފުންގެ މެދުގައި އުފެދޭނެ ބިރުވެރިކަމާއި، އިތުބާރު ގެއްލުމުގެ މައްސަލަ ކިހާ ސީރިއަސްތޯއެވެ؟
މިފަދަ ޢަމަލުތަކަކީ އަޅުގަނޑުމެންގެ މުޖުތަމަޢުގައި އަންހެނުންގެ ބާރުވެރިކަމާއި ހަމަހަމަކަން ކުރިއެރުވުމަށް ކުރެވޭ މަސައްކަތްތަކަށް ލިބޭ ބޮޑު ލޮޅުމެކެވެ. އަދި ދައުލަތުގެ އިދާރާތަކުގެ މެދުގައި އޮންނަންޖެހޭ އިތުބާރާއި، ވަޒީފާގެ ރައްކާތެރިކަމުގެ އިހުސާސް ގެއްލިގެންދާނެ ކަމެކެވެ.
މި ހިތާމަވެރި ހާދިސާއިން އަޅުގަނޑުމެންނަށް އެނގިގެންދަނީ، ވަޒީފާގެ ރައްކާތެރިކަމާއި، މުވައްޒަފުންގެ ޙައްޤުތައް ހިމާޔަތްކުރުމަށް ރައީސް މުއިއްޒު ބޭނުން ނުވާކަމެވެ. އަދި ދައުލަތުގެ އިދާރާތަކުން ނިންމާ ނިންމުންތަކުގައި އިންސާފުވެރިކަމާއި، ހާމަކަމާއި، ޖަވާބުދާރީވުމުގެ އުސޫލުތައް ރައީސް މުއިއްޒު ޤަބޫލު ނުކުރައްވާތަނެވެ. އަދި ފެނިގެން ދަނީ ދުނިޔޭގެ އެއްވެސް ޤައުމެއްގައި މިވަގުތު ހުރި ރައީސްއެއްގެ ފަރާތުން ފެނިފައި ނުވާ ވަރުގެ އަނިޔާވެރިކަމެވެ.