މާލެ ސަރަހައްދުގައި "ވީއްލިގެން" އުޅޭ ބުޅާތައް ބަލަހައްޓާނެ ތަނެއްގެ ގޮތުގައި ހުޅުމާލޭގައި ތަރައްޤީކުރިި "އޮޅުހިޔާ"ގެ ހިންގުން ދަނޑުވެރިކަމާއި ދިރޭތަކެއްޗާބެހޭ ވުޒާރާއާ ހަވާލުކުރުމަށް މާލެ ސިޓީ ކައުންސިލަށް އަންގަވައިފިއެވެ. ޒަމާނީ ފެންވަރަށް ޤާއިމުކޮށްފައިވާ ޕެޓް ކެއަރ ފެސިލިޓީ ނުވަތަ "އޮޅު ހިޔާ" ތަރައްޤީކުރީ ދިރޭތަކެއްޗާބެހޭ ވުޒާރާއިން، މާލެސިޓީ ކައުންސިލާ ޙަވާލުކޮށްގެންނެވެ. ނަމަވެސް ދެފަރާތުގެ ދެމެދުގައި އެއްބަސްވެފައިވާގޮތަށް މާލެ ސިޓީ ކައުންސިލުން ކަންކަން ކުރިއަށް ނުގެންދާކަމަށް ވިދާޅުވެ، އެ ފެސިލިޓީ އަނބުރާ ވުޒާރާއާ ޙަވާލުކުރުމަށް އަންގާ މާލެ ސިޓީ ކައުންސިލަށް ވަނީ ސިޓީއެއް ފޮނުއްވާފައެވެ.
މާލެ ސިޓީ ކައުންސިލުން އޮޅުހިޔާ ތަރައްޤީކޮށްފައިވަނީ ދަނޑުވެރިކަމާއި ދިރޭތަކެއްޗާބެހޭ ވުޒާރާގެ ބެލުމުގެ ދަށުންނެވެ. އަދި އެތަން ތަރައްޤީކޮށް، ހިންގަންވެސް ހަވާލުކޮށްފައިވަނީ މާލެ ސިޓީ ކައުންސިލާއެވެ. އެ ފެސިލިޓީ ހުޅުވާދެއްވީ މިދިޔަ މަހުގެ 2 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
ދިރޭތަކެއްޗާބެހޭ ވުޒާރާއާއި މާލެ ސިޓި ކައުންސިޅާދެމެދު ވެފައިޥާ އެއްބަސްވުމުގެ ދަށުން އެ ފެސިލިޓީއަށް މާލޭގައި "ވީއްލިގެން" ނުވަތަ މަގުމަތީގައި އުޅޭ ބުޅާތައް ގެންދިއުމަށް ބަޔާންކޮށްފައިވެއެވެ. އަދި އެކަމަށްޓަކައި ޢަމަލުކުރާނެ ޕްލޭނެއްވެސް ވަނީ އެކުލަވާލާފައެވެ. އެހެންނަމަވެސް އެ ޕްލޭނާ އެއްގޮތަށް، އެތަން އޮޕަރޭޝަނަށް ގެނައުމުގެ އެއްވެސް ކަމެއް ސިޓީ ކައުންސިލުން މިހާތަނަށް ކޮށްފައިނުވާކަން ދިރޭތަކެއްޗާބެހޭ ވުޒާރާއިން ވަނީ ވިދާޅުވެފައެވެ.
މާލޭ ސިޓީ ކައުންސިލާ ހަވާލުކޮށްފައިވާ ޒިންމާތައް އެންމެ ފުރިހަމައަށް އަދާނުކުރާތީކަމަށް ވިދާޅުވެ، ދިރޭތަކެއްޗާބެހޭ ވުޒާރާއިން ވަނީ މާލޭ ސިޓީ ކައުންސިލާ ބައްދަލުކުރައްވައި، މަސައްކަތްތައް ލަސްވަމުންދާ ކަންކަމާ ގުޅޭގޮތުންވެސް މަޝްވަރާކުރައްވާފައިވެއެވެ.
އޭގެ ފަހުން ސިޓީ ކައުންސިލުން ވަނީ ބުޅާތައް ފެސިލިޓީއަށް ގެންދިޔުމުގެ މަސައްކަތް ފަށަން ނިންމާފައިވާކަން އިޢުލާންކުރައްވާފައެވެ. މިކަމާ ގުޅިގެން ދިރޭތަކެއްޗާބެހޭ ވުޒާރާއިން ނެރުއްވި ބަޔާނުގައި ވިދާޅުވީ "އޮޅުހިޔާ"އަށް ބުޅާތައް ގެންދިއުމުގައި ޢަމަލުކުރާނެ ގޮތުގެ އެސްއޯޕީތަކާއި ޕްލޭންތަކާއި ލަފާތައް އެ ވުޒާރާއިން މާލެ ސިޓީ ކައުންސިލާ ހިއްސާ ކޮށްފައިވީ ނަމަވެސް އެ ކަންކަމަށް މިހާތަނަށް އެއްވެސް ޚިޔާލެއް ލިބިފައި ނެތް ކަމަށެވެ. އަދި އެސްއޯޕީތަކަށް ޢަމަލުނުކޮށް، އެ ފެސިލިޓީއަށް ބުޅާތައް މިވަގުތު ގެންދަން ފަށައިފިނަމަ ބުޅާތަކުގެ ޞިއްޙަތަށާއި ދުޅަހެޔޮކަމަށް ނުރަނގަޅު އަސަރުކުރުން އެކަށީގެންވާކަމަށް ދިރޭތަކެއްޗާބެހޭ ވުޒާރާއިން ވިދާޅުވިއެވެ.