މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުހައްމަދު އަމީން
ބައިކް މޯލްޑިވްސްގެ އިސް ބޭފުޅުންނާ ބައްދަލުކުރައްވައިފިއެވެ.
މި ބައްދަލުވުމުގައި ބައިކް
މޯލްޑިވްސްއަށް ދިމާވެފައިވާ ދަތިތަކާއި ގޮންޖެހުންތަކާ ބެހޭގޮތުން މަޝްވަރާ ކުރެއްވުމުގެ
އިތުރުން، ބައިކް މޯލްޑިވްސްއިން ފޯރުކޮށްދޭ ޚިދުމަތްތަކާއި، ދިމާވެފައިވާ ދަތިތަކާ ބެހޭގޮތުން މިނިސްޓަރ މަޢުލޫމާތު ހޯއްދެވިއެވެ.
މި ބައްދަލުވުމުގައި ގިނަ ކަންތައްތަކަކާމެދު
މަޝްވަރާ ކުރައްވާފައި ވާއިރު، މައިގަނޑު ކަންތައްތަކުގެ ތެރޭގައި ހިމެނެނީ ބައިކް
މޯލްޑިވްސްއަށް ދިމާވެފައިވާ ގޮންޖެހުންތަކަށް ހައްލު ހޯދުމަށް މިނިސްޓްރީއާއި
ބައިކް މޯލްޑިވްސްއާ ގުޅިގެން ކުރެވިދާނެ މަސައްކަތްތަކާ ބެހޭގޮތުންނެވެ. ބައިކް
މޯލްޑިވްސްގެ ފަރާތުން މި ބައްދަލުވުމުގައި ބައިވެރިވެ ވަޑައިގެންނެވި ބޭފުޅުން އެ އެސޯސިއޭޝަންގެ ކުރިމަގާ ބެހޭގޮތުން އޮތް ވިސްނުން ވެސް ހިއްސާ ކުރެއްވިއެވެ.
ބައިކް މޯލްޑިވްސްއަކީ ޔޫނިއަން ސައިކްލިން
އިންޓަނޭޝަނަލް (ޔޫސީއައި) ބީއެމް މޮޓޯއިން ގަބޫލުކުރާ ރާއްޖޭގެ ރަސްމީ ސައިކްލިން
އެސޯސިއޭޝަނެވެ. މި އެސޯސިއޭޝަނުގެ އަމާޒަކީ ރާއްޖޭގެ ނާޒުކު ތިމާވެށި ހިމާޔަތްކުރުމެވެ.